الكرسيدا اتفجرت ياريت تنصحونى اعمل ايه

**abf-nassar** · 06-10-2008 09:39 PM

السلام عليكم
نصيحة من واحد مازال محتفظ بهذه السيارة لانها ميراث عن والدي رحمه الله
العربية دي 90% من حاجتها بارخص الاسعار موجودة في المحله علشان تقريبا هي الموديل الاساسي للتاكسي هناك وهتلاقي هناك عربيات متقطعة منها كتير
انا سبق ولفيت علي الضفيرة بتاعتها مابينمصر وبورسعيد ولم اجدها الا في المحلة
بس ياريت وانتنازل هناك تاخد معاك حد متخصص وبيعرف يفاصل علشان هما بيحاولوا يتشطروا علي بتوع القاهرة بالذات علي اساس ان احنا فلوسنا كتير ولله الحمد
وإن شاء الله تتصلح وترجع زي الاول

**NaderNabil** · 06-10-2008 09:44 PM

للأسف مافيش في مصر حاجة اسمها تغيير بودي كامل...

لأنك عشان تغير بودي لازم يبقى له سجل في المرور و رقم الشاسية متسجل عندهم....لكن لو ملهوش يبقي مش هاينفع

غير كده مافيش حد بيبيع هيكل كامل كده لوحده....لو لاقيت هايبقي نصين.....عشان ممنوع استيراد السيارات قطعة واحدة...لازم تتكون متتفككة و تخش مصر تحت بند قطع غيار مستعملة

و أصلا أصلا....طالما العربية موديل قديم...يبقي ماينفعش تحط الحاجات اللي فيها في موديل أحدث!!

ربنا يعينك و تخلص العربية علي خيير ان شاء الله

**abf-nassar** · 06-10-2008 09:48 PM

موضوع قواعد الموتور دا بسيط جدا قاعده الموتور الواحدة لاتزيد ثمنها علي 60 جنيه والتركيب خوالي 80 جنيه للقاعدتين ومتخدش بكلام الميكانيكي لو حاول يزود عليك علي اساس انه هيرفع الموتور والكلام ده الموضوع بسيط والتركيب مابيخدش ساعة

**EL_3OMDA** · 06-10-2008 10:01 PM

طيب اعرف منين لو سمحت ان الحاجات دى سليمه ولا لاء لانها دارت ياجماعه الحمد لله وصوتها تقريبا مفرقش كتير عن الاول باسثناء زى وش كدا نتيجه حاجات فى التابلوه وكده انما مش سامع صوت جديد فى الماتور فياريت النصيحه علشان مينضحكش عليا
وحاجه كمان المحله دا اكيد مضمون ان شاء الله والاسعار فى حدود كام بالنسبه للبابين والسقف علشان مينضحكش عليا وشكرا ليكوا جدا

**Nader** · 06-10-2008 10:44 PM

لا حول ولا قوة الا بالله، قدر الله وما شاء فعل

بسيطة ان شاء الله لو جت على البابين والسقف

غيرهم واشتري استيراد من بورسعيد بس المهم ان

شاسية العربية يكون سليم.

القواعد اللي انت بتقول عليها اعتقد انك تقصد قواعد

الموتور ودي حاجة بسيطة برضة وممكن تتغير في اي

عربية من غير ما تكون عاملة حادثة ولا اي حاجة.

اما بالنسبة للشاسية فمينفعش يتغير في مصر للاسف

لان في مصر بيعتبروا ان الشاسية هو اساس العربية

وتغيير الشاسية معناة تغيير العربية نفسها.

**Karim_Monir** · 07-10-2008 12:07 AM

الاول قدر الله وما شاء فعل
ثانيا ابعد تماما عن تغيير البودي لانك مش هاتلاقي حد يقفلهولك صح زائد هايكون في مليون حاجة مش راكبة على بعض
ولو مشيت بسرعة هاتلاقة هوا دخلك من حتت عجيبة
العربية تغيرلها السقف والبابين وتروح على اي طبلية شاسية في الحرفيين بيبقى عندهممقاسات بالكبيوتر تشوف مقاستها صح ولا لاء وتتاكد ان الخبطة ماطالتش الشاسية
كل اللي بتحكي فيه ده حوار صاج
معرفش يتكلف كاموالحرفيين اغلى ولا المحلة عشان الحرفيين طبيعي اغلى من بورسعيد والمحلة
ولو في المحلة شغالة تاكسي يبقى هاتلاقي تقطيع كتير هناك وتجيبهم ارخص من هنا بكتير
ربنا يوفقك ان شاء الله وتخلص على خير

**دموع الثلج** · 07-10-2008 02:41 AM

المشاركة الأصلية كتبت بواسطة EL_3OMDA

يعنى كدا اخر كلام الحرفيين ولا المحله ولا بور سعيد
ياريت ياجماعه تفيدونى فى الاوفر والاحسن لانى هشترى حاجات كتير
طبعا حضرتكوا عارفين مش هتقف على انى اروح اشترى البابين والسقف
انا عارف ان الميكانيكى هيجهزلى ليسته محترمه وهو نبهنى لكده
وياريت متوسط السعر علشان اعمل حسابى بس لو ممكن شكرا لكم جميعا

الحمد لله الجميه طمنك ان الموضوع بسيط ان شاء الله

لو حبيت تستفسر عن موضوع المحله ده ممكن تسال الاخ حازم خضر على الخاص
هو من المحله وتويوتاوى واظنه هيفيدك كثير بالمعلومات