تجربتى فى التقسيط ليستفيد الجميع
السلام عليكم ورحمة الله وبركاته
طبعا حضراتكم عارفين عملت يجي ميت موضوع الفترة اللى فاتت ، ومحتار اجيب ايه ولا ايه والفلوس بسيطه وكل شوية تلاقونى برأى ، معلش اول عربية هشتريها ومليش اى خبره وقلقان طبعا
المهم كان معايا 10 الاف جنيه وقلت اقدم تقسيط و اجيب عربية مستعملة تقسيط عشان الفايده بتبقى على باقى المبلغ فميبقاش كتير،، رحت كذا مكان وكله قال لى لازم 40 فى المية من تمن العربية
المهم ربنا رزقنى ب 5 الاف كمان بقى معايا 15 الف قلت حلو ، اشوف ماروتى ب 30 الف وادفع 50 فى المية ال 5 الاف واقسط الباقى
وبالفعل نزلت كذا بنك وجبت كذا عرض لقيت اللى بيقسط مستعمل يتعدوا على الصوابع وعلى رأسهم بنك البركة وبنك بلوم،،
البركة قالى 2012 فما فوق بس
وبلوم قالى من اول 2005 يقسط عادي ،،
المهم الاتنين بيتعاملوا مع معارض بس مينفعش تجيب صاحبك كده وتروح تقسط
لفيت فى المعارض طبعا بيقولى ماروتى 2012 ب 35 و 36 الف قلتله حرام دى عند اباظه زيرو 2013 ب 43 الف
فى النهاية قفلت البركه وقلت اشوف بلوم حاجه موديل 2009 ولا 2010 وكده كده هقسط على 3 سنين واحتمال كبير ادفع الباقى كاش بعد سنة ان شاء الله
بلوم قالى تدفع 40 فى المية مقدم ، و فايده 11 فى المية فى السنة ،، وتأمين اجبارى 3.5 فى المية على كامل تمن العربية
طبعا 3.5 فى المية على كامل العربية يعنى 7% على نص تمن العربية اللى هو الباقى حطهم عالفايده يبقى الفايده بقت 18% بس المسميات مختلفة
وادفع 1.5 رسوم ادارية بحد ادنى 750 جنيه
قلت ده حرامى سيبك منه
دورت على معرض لقيت معرض فى اسكندرية لا داعى لذكر اسمه،، قالى فى الموبايل لما كلمته فايده 11% بدون تأمين،، قلت حلو اوى ده
رحت قعدت معاه لقيت الكلام فى الموبايل حماده والحقيقه حماده تانى خالص
بيقولى الباشا مفيش تأمين فوق موديلات 2010 بس ،، قلت جميل انا عايز اصلا فوق 2010 ، قالى بس الفايده تبقى 13% فلت مش مهم مش هتفرق 600 جنيه لأن المبلغ الباقى بسيط
من الكلام معاه وبقوله بنك بلوم، قالى انا كنت شغال فيه وكل اللى فيه تلامذتى وهما بيدوله عروض حلوه عشان صاحبهم
بعدين قالى بقى الحسبه
40% مقدم
1000 مصاريف ادارية
2500 جنيه تسجيل عقد بيع وترخيص
1000 جنيه عمولة لو العربية من المكتب و 1500 جنيه لو عربية انا هجيب صاحبها من برا
فايدة 13% على باقى المبلغ
بصيت لقتنى هدفع حوالى 5000 جنيه وانا لسا بقول يا هادى بعدين فايده على 3 سنين حوالى 6 الاف يبقى 11 الف جنيه فايده على ماروتى
ولو قسط زيرو هدفع 15 الف فايده
المهم طبعا انا لما عملت موضوع هنا كله قالى بلاش تقسيط وانا قلت اسأل جايز الدنيا اتغيرت بس فعلا
التقسيط فى كل خطوة عايزين يمصوا دمك / كل خطوة الف جنيه ويقولك تحت اى مسمى يا باشا مصاريف بتنجانية الف جنيه مصاريف خوخ 1000 جنيه وادفع يا زبون
الخلاصة انا اتصرفت فى 5 الاف جنيه كمان وبقى معايا 20 وقلت هجيب على اد اللى معايا عربية رخصة سارية ولا اوجع دماغى ولا بطيخ
كنت هدفع 700 جنيه قسط، قلت عمر العربية المستعمله ما هصلحها كل شهر ب 700 جنيه لمدة 3 سنين ،، اكيد اوفر طبعا
وناوى على ماروتى ،، وقدامى واحده 2009 صاحبتها طالبة 22 الف وبالفصال وصلنا ل 19 ونص،، المفروض هروح اشوفها بكره،، ربنا يسهل ان شاء الله فيها مع انى شاكك يكون فيها حاجه عشان سعرها قليل على الموديل
وبرضه بشوف الاختيارات التانية بمبلغ 20 الف وربنا يسهل الحال يارب،، اللهم امين
يارب اى حد معدى يكون بيفكر فى تقسيط يقرا الموضوع ده ويفيده
ومعلش طولت عليكم،، د.محمد