الموضوع: حكايتي باختصار مع هيونداي فيرنا وتوكيل غبور

::: اشتريت هيونداي فيرنا 2014 زيرو من حوالي شهرين فقط ... اشترتها من التوكيل بتاعها في طنطا اللي في تقاطع شارع البحر مع طه الحكيم ... أنا كنت موصي الشخص المختص بالمبيعات إن العربية تكون متراجعة كويس عشان أنا عاوز أشتري عربية جديدة ومتعبش فيها وتكون بعيدة عن وجع الدماغ يعني المفترض والعادي إنها تكون مريحاني لمدة 5 سنين على الأقل .. يدوبك الصيانات العادية بس .. المهم العربية اسلمتها أنا وأخويا وكانت تمام شكلاً وخدتها وطلعنا بها على الطريق وعند لما وصلت سرعتها حوالي 90 كم في الساعة لاحظنا إن الدركسيون بيتهز .. أخويا قاللي ده ترصيص ويتظبط بسهولة .. المهم روحنا بالعربية وبعد حوالي شهر كان المفروض أعمل صيانة الـ 1000 كيلو، فرحت لفرع الصيانة اللي دفرة بعد طنطا وقلت لهم إن نور العربية ضعييييييييييييييف جداً وإنها محتاجة ترصيص وإن فرامل اليد خفيفة وإن الفتيس تقيل جداً في النقل ... قعدت حوالي 4 ساعات هناك مع إني كنت جاي تاني أو أول واحد هناك وبعد الوقت الطويل ظبطوا بس فرامل اليد والفتيس بقى معقول ... أما النور فقالوا الكشافات مش موجودة وهنبعت نجيبها وأما أهم حاجة عندي وهي الترصيص فقالوا لي إن جهاز الترصيص بايظ وده طبعاً بعد ما جربنا العربية كذا مرة ولكن ظل الدركسيون يتهز ... وقال لي المدير هناك بالحرف إن هنا بشر وآلات وإننا معرضون للخطأ واعمل الترصيص بتاع العربية بره واحنا نبقى نديك فلوسها !!!!!!!!!!!!!!!!!

المهم أنا طلعت من عندهم وأنا مخنوق جداً الصراحة ورحت عند واحد عندنا في المحلة يرصصها بالكمبيوتر وفعلاً عملها وطلعت جربت العربية لقيت برده الدركسيون بيتهز ... فرجعت له تاني، فطلع جربها معايا واتأكد وبعدين رجعنا وبص على العجل والجنوط فقالي إن فيه جنوط معووج وجاب الاستبن وحطه بداله ... وطلعنا نجرب، ولقينا برده نفس المشكلة ... فوداني هو لواحد تاني بيرصص من خلال جهاز كده بيخش على العجلة وهي راكبة في العربية بدون ما تتشال .. المهم الراجل الأخير ده كان محترف وقاللي إن الجنوط بتاعك كله معووج وإزاي العربية وهي جديدة تبقى كده وقاللي لازم تروح لهم التوكيل ... فاتصلت على 16101 .. ورد خدمة العملاء وخدت منهم ميعاد في التوكيل بتاع قليوب ... ولك أن تتصور إني أول مرة أروح توكيل قليوب ده وأنا من المحلة .. الصراحة دخت بس الحمد لله في الآخر وصلت وبعد ما وصلت هناك أفاجأ بإن "جهاز الترصيص بايظ" !!!!!!!!!!!!!!!! مع إني أساساً حاجز الميعاد معاهم في التليفون عشان المشكلة الخنيييييقة جداً دي ... مدير الاستقبال هناك قاللي إن أحسن حاجة أروح التوكيل اللي في أبو رواش، فرحت هناك بعد ما وصف لي الطريق ... وهناك ، مش هتصدقوا ............... لقيت جهاز الترصيص مش بايظ وشغال الحمد لله ... أخيراً لقيت مكان الجهاز ده شغال فيه ... عمار يا مصر والله ..... المهم قلت لهم على المشكلة وإني عايز أغير الجنوط عشان معووج فقالوا لي لازم نعمل الترصيص الأول ... قلت لهم ماشي ... فرصصوا وبعد حوالي 3 ساعات العربية كانت جاهزة وسألت البشمهندس المسؤول، فقاللي "المشكلة خلاص انتهت، والعربية بقت تمام التمام" .... المهم طلعنا جربناها أنا وبشمهندس تاني، فلقينا برده الدركسيون بيتهز ... يعني عطلوني ع الفاضي كالعادة وحسبنا الله ونعم الوكيل فعلاً ... قالوا لي "خلاص هنغير لك الجنوط" .... طمه كان من الأول يا بشمهندسين وتوفروا وقتي ووقتكم .... المهم إنهم قالوا " بس الجنوط مش موجودة كلها دلوقتي ومفيش غير اثنين وهنتصل بيك بعد يومين أو ثلاثة بالكتير تكون الجنوط الباقية جاءت ونغيرها لك ونشوووووووووف" .... وعليها يا جماعة ... عدى أكثر من 10 أيام أهه ومفيش حد اتصل بي ولا حاجة ... وعلى فكرة كنت مسافر مرسى مطروح من يومين ولقيت إني لما بعلي السرعة لـ 140 فيما فوق .. العربية كلها بتتهز مش الدركسيون بس ... حسبنا الله ونعم الوكيل في التوكيل بتاع غبور وفي خدمة العملاء اللي بس شاطرين جداً في الكلام ... نصيحة واحد جرب وطلع عينه "لا تشتروا من غبوووووووور" لأنه لا يوجد خدمة لكم بعد البيع وعربياتكم هتروح عليكم فلوسها