لا لاحتكار الاتصالات في مصر

**medo55** · 06-10-2008 11:12 AM

السلام عليكم ورحمة الله وبركاته

والله ياجماعه انا مش عارف ابتدي منين بس فعلا انا عن نفسي زهقت من الاحتكار . الشعب المصري كله زهق من الحديد واسعار الحديد واحتكاره والي بئت في العالي لانه محتكر ومش حاسين باحتكار الاتصالات رغم ان ال 80 مليون مواطن دلوقتي تقريبا كلهم بيستخدمو الاتصالات اكتر من استخدامهم للحديد

يعني خط ارضي واسعاره عماله تزيد و DSL مفيش اغلى منه لو قارناه بامريكا هنلاقي ان ال 10 ميجا مفتوحه تحمل زي مانت عايز ب 100 دولار ( 540 جنيه مصري ) يعني لو اخدتها مقفوله مثلا 2000 جيجا داونلود هتلاقيها ب 70 دولار تقريبا في الشهر ,, واحنا عندنا ال 8 ميجا ( محدد 130 جيجا في الشهر ) ب 555 جنيه .

الخطوط في امريكا باشتراك ثابت رخيص اتكلمت 24 ساعه زي ما اتكلمت ساعه هو اشتراك ثابت رخيص اقل من فواتيرنا اكيد

الموبايل الشركات ما بتصدق ان عميل يشتري الخط بتاعها وتفضل تديله دقايق مجانيه كتير جدا وبتنزل عروض عدد رخيصه امثال نوكيا وغيرها . دا حتى جوجل تعاقدت مع شركة تصنيع موبايلات تكلفة تصنيعه 198 دولار وهتبيعه في السوق ب 200 دولار علشان تنزل بس نظام التشغيل بتاع الموبايلات الجديد بتاعها

المفروض بجد احنا زي ما وقفنا لعز وصوت الشعب علي عليه لازم كمان نقف للمصريه للاتصالات الي محتكره السوق ومانعانا نستخدم اي اتصال رخيص حتى من خلال النت

بفكر نعمل حمله على النت ونجمع اكتر عدد من الناس علشان صوتنا يعلى ونوصله لاي حد مسئول عنده ضمير او يخاف من صوتنا العالي على الاقل

على فكره انا قلت امثله امريكا لاني ليا تعامل مع بعض الشركات في امريكا في مجال الاتصالات وتكنولوجيا المعلومات وعارف الاسعار التقريبيه ليهم هناك وحالهم حال اي بلد حتى هولندا اصلا الي هي ماسمعناش عنها غير من هنيدي همام في امستردام نفس النظام

يعني احنا مكتوب علينا السرقه من كل الشركات طول العمر !!!! لازم نعمل حاجه والله الواحد زهق

ياريت نعمل حمله شعبيه على النت على الاقل وانا على استعداد اعمل موقع خاص للحمله دي واتكفل بمصاريف الموقع بس فعلا نلاقي مسانده من الشعب . ولو صوتنا اتسمع نبتدي نصلح حاجه حاجه , نبتدي بالمصريه للاتصالات وشركات الموبايل

نفسي نتحرك ونعمل حاجه :(

انا مش عالفيس بوك ولا بقول اي حاجه خارجه عن القانون العمليه مش ناقصه يعني

**eng_mkhalaf** · 06-10-2008 01:16 PM

يا باشا مصر من أرخص الدول فى Dsl تعالى شوف الأسعار فى السعودية عاملة أزاى بالميت ضعف سعر مصر مع خنقة كبيرة فى كمية المواقع المحجوبة

**medo55** · 06-10-2008 01:46 PM

ياباشا انا عارف اسعار الخدمه في السعوديه غاليه , والي هي اصلا خدمه اسواء بكتيييييييير من الخدمه في مصر ,, خدمة مصر ما شاء الله خدمه حلوه ممكن نقارنها بعض الشيئ بالخدمه في اوربا لكن الاسعار غاليه

ولما بنقارن بين الحاجه الي في ايدينا ومش عاجبانا اكيد هنقارنها بحاجه افضل مش بحاجه اقل

الخدمه عند العرب كلها سيئه للغايه سواء في التقطيع والاسعار الغاليه والحجب الكتير في دول الخليج

او في الاسعار الغاليه في مصر ,, واهم ما في الامر الاتصالات . يعني عندك في السعوديه مثلا بتتحاسب بالثانيه (( صاحبي بيكلمني دولي بيتحاسب بالثانيه )) لكن هنا في مصر لو اتكلمت ثانيه يخصم منك 4 جنيه :s

انا شايف ان الاحتكار لشيئ يعتبر اتاوه على الشعب خصوصا انها مملوكه بنسبة 51% للحكومه

محتاجين نعلي صوتنا ونسمعه للمسئوليه زي ما متعودين من نايل موتورز

**AhmedGen2** · 06-10-2008 01:54 PM

لا مجال للمقارنة ، واحد صاحبى فى ألمانيا عنده خط 24 ميجا لوحده وتقريبا مبيدفعش حاجة.

**الطنطاوي** · 06-10-2008 02:03 PM

أنت بتحلم

كل سنة وانت طيب

**medo55** · 06-10-2008 02:28 PM

اسلام باشا , انا بقارن بين مستوى الخدمه لكن مش بقارن بالاسعار :) مشكلتنا هي الاسعار :s

أبو عبدالرحمن , كل نجاح بيبتدي بحلم :) همتك معانا نجمع اكبر عدد ونوصل بيه لاي حد مسئول في البلد ونايل موتورز وصل صوتها لرئيس الوزراء علشان يحلو مشكله مروريه في جسر السويس واتحلت الحمد لله

خلينا نحلم بحاجه اكبر ( نرخص اسعار الاتصالات في مصر ولا لاحتكار الاتصالات )

**TaoTao** · 07-10-2008 01:05 AM

موضوع مهم جدا وبيخليني اشد شعري !
الخدمة في مصر ممتازة والبنية الأساسية في مصر -ودي إحدى النقط المضيئة اللي باعترف بيها- ممتازة مقارنةً بدول الشرق الأوسط.
إنما الأسعار غالية بشكل مبالغ فيه، يعني سرعة 512 كيلو بت / ثانية بـ 150 جنيه اشتراك مفتوح بينما أخي بألمانيا يدفع 20 يورو (150 جنيه) مقابل سرعة 6 ميجا بت / ثانية اشتراك مفتوح!!

المشكلة الحقيقة بقه إن الشركات مستعدة تخفض الأسعار للنصف (زي لينك وتي إي داتا) اللي واقفلهم مين تتصوروا؟ هيئة تنظيم الاتصالات !! ودي هيئة مستقلة -يعني حكومية بس مش عاوزين يقولوا- مهمتها تنظيم الاتصالات والعكننة ع المواطن ..
يعني الحاجة الوحيدة اللي بترخص في البلد ييجي جهاز حكومي ويرفض وكمان يفرض عقوبات على الشركات اللي بتخفض أسعارها (تم فرض عقوبات على الشركتين ومنع مهندسيها من دخول السنترالات لفترة كعقوبة فنية ومالية!!)
ودي إحدى النقط السودة اللي مش باينة وسط بجر الظلمات اللي عايشين فيه :)

**medo55** · 08-10-2008 04:54 PM

والله فعلا يا Taotao مشكله الاسعار فعلا :s هم لو يزودنلنا السرعات وتكون بنفس الاسعار مفيش مشكله بس يدولنا سرعات زي الناس الي بره

طيب والله واحد مصري قاعد في قطر بيقول ان الارضي دا هناك اشتراكه 35 ريال في الشهر والمكالمات مجانا كلها لان هناك اصلا اشتغلو Voip والمكالمات رخيصه

عايزين نعمل حاجه .. !! ياريت نلاقي دعم اكبر