هل ممكن ترجع تسوق مانيوال تاني بعد ماتعودت عالاوتوماتيك ؟؟؟

انا طول عمري بسوق اوتوماتيك ومابعرفش اسوق مانيوال اساسا

وبصراحه مابحبوش يعني ليه اقعد اوجع في دماغي في نقلات ودبرياج والعربية تبطل مني والحوارات دي لما ممكن اريح نفسي بالاوتوماتيك ؟ :wacky::driving:

بس المشكلة اني عايز اجيب عربية جديدة وعشان اجيبها اوتوماتيك هشيل من دماغي اختيارات كتيييييييييير

وكمان رينج الفلوس كده هيعلى ... يعني هدور على 80 الف وانت طالع ..

لان لو عربية اقل من 80 الف اوتوماتيك اعتقد هتكون مش قد كده :ANSmile05:

يعني حرام اجيب بيكانتو اوتوماتيك ب 70 الف وكمان 1100 سي سي

والفيرنا الاوتو بتاعها معرفش اخباره ايه

----------

المهم يعني هل فيه امل لو واحد اتعود على سواقة الاوتوماتيك انه يتعلم يسوق مانيوال ؟ :g:

هل فيه فرق كبير بينهم ولا الحكاية مش صعبة كده ؟
ي
عني اتوكل على الله واتعلم مانيوال ولا بلاش تجربة فاشلة وخلينا في اللي احنا عارفينه ؟

اتمنى تفيدوني بآرائكم

الموضوع بيبقي مقرف شوية يعني انا والدي اخر عربية جابها هي الابيزا سنة 94 و لحد 2008 من حوالي 3 شهور كده قبل ال 280 كان بيستعمل الابيزا دلوقتي بقاله 3 شهور تقريبا بال 280 اوتو طبعا و مش عايز اقولك لما بييجي يسوق الابيزا بينقل علي لفات غريبة 4000 5000 مش واخد باله ان لازم تنقل اساسا و بصراحة عن تجربة اللي ميعرفش يسوق مانوال يبقي مبيعرفش يسوق اصلا المانوال هو التحكم انت اللي بتمشي العربية و لازم تبقي حاكمها صح و تعرف هتنقل امتي و العربية متعومش منك و انت بتنقل و هكذا في رأيي السواقة=مانوال
خليك في الاوتو احسن طالما متعود عليه و هو مريح فعلا بس المانول ده مزاج

بالظبط كده تعتبر نفسك هتتعلم السواقه من اول وجديد بس المره دى على عربيه مانيول

موضع يخنق شويه انا زى حالاتك كده ومره شفت اوبترا وحبيت اجرب العربيه واشوف قوه موتورها

تخيل انى معرفتش غير انى ادور العربيه ولخبطه فظيعه مع انى ا ول ما اتعلمت زمان اتعلمت على مانيوال

عاوزه ارجع مرشدير وجايبه العربيه على الاول ومصصمه ان العربيه لازم ترجع وراء وطبعا العكس كانت بتطلع قدام :D:D:D:D فضيحه يعنى

هتتعب جامد جدااا

بص... الأساس إنك لازم تكون بتعرف تسوق مانيوال قبل كل شئ وماينفعش تقول أنا بعرف أسوق بس أوتوماتيك لأن المانيوال هو الأساس وبرضه ماتضمنش الظروف تكون مضطر تسوق عربية مانيوال لأي سبب من الأسباب وساعتها تقول سوري... أصلى باسوق أوتوماتيك بس !!!

ثانيا: "في أوروبا والدول المتقدمة" الناس بتفضل المانيوال على الأوتوماتيك لأسباب كتيرة منها السحب والسرعة والأداء والإحساس بالعربية والتوفير في الوقود... الخ الخ الخ

ولكن... في البلاد دي السواقة لها نظام وقواعد الكل بيحترمها واللي بتخلي سواقة المانيوال متعة مش تهذيب وتأديب وأصلاح زي شوارعنا... حتى في الزحمة وأوقات الذروة

أخيرا... المانيوال ممكن يتركب في مصر (وبالمناسبة مش كل الناس بتركب أوتوماتيك) بس بشرط إنك ما تكونش بتسوق كتير في الزحمة كل يوم مثلا علشان ما تكرهش حياتك. فيكون كويس لو يتسوق على طريق طوالي زي الدائري مثلا

أنا شخصيا حولت للأوتوماتيك من حوالي 9 سنين ومش ممكن أفكر أرجع للمانيوال إلا لما ينصلح حال الشوارع والسواقين في البلد دي... وفي إعتقادي في المستقبل القريب مش حيكون في غير الــ ستيبترونيك في كل العربيات وحينتهي الأوتوماتيك والمانيوال

من مميزت المانوال عن الاوتو برضه ان الاوتو بيستهلك تيل امامي اكتر من المانوال فيه فرق ملحوظ

انت عامل زيى مبسوقش غير اوتوماتيك مع انى طبعا اول ما اتعلمت اتعلمت مانيوال طبعا
بس من يوم ما قلت يا سواقه وانا باركب اوتوماتيك لدرجه انى تقريبا نسيت المانيوال
ولما باكون مع واحد صاحبى ويقولى تعالى سوق او اركنها اقوله لأ مش هعرف :)
ومن فتره كدا اظطريت انى اسوق مانيوال فتره مش قادر اقولك كنت بتعذب اد ايه
وبلعن اليوم اللى سقت فيه وركبت عربيه
احساس صعب انك تركب مانيوال بعد اوتوماتيك بالذات لو فتره طويله زى حالتك كدا
مش عايز اعقدك بكلامى بس كل شئ فى الاول صعب وبعد كدا عادى ممكن تتعود
وعموما لو عايز اوتوماتيك ومش عايز فيرنا
ممكن تزود حاجه بسيطه وتجيب افيو ب 84
وربنا يوفقك

اولا شكرا للجميع على ردودكم

طيب انتو كده خوفتوني من قرار شراء عربية مانيوال

وبعدين اصل انا هروح فين من الزحمة !!!

بس انا بقول ماهي مصر كلها سايقه مانيوال واهي ماشيه وماحدش اشتكى ... ولا الوضع معايا هيبقى مختلف عشان متعود عالاوتو ؟؟؟؟؟

والله انا حيران لان ده هيأثر على نوع العربية وسعرها اللي ناوي اشتريها خصوصا اني عايز عربية في رينج 60 او 70 الف
بالكتير حاجة و70
فاكيد المانيوال في الفئة دي متوفر اكتر بكتيير عن الاوتو

المانيوال امتع ، لكن الأوتوماتيك اريح

السواق الصح يسوق اي حاجة في اي وقت

بالنسبه لى
انا اتعلمت على المانيوال وبعدين كنت سافرت وركبت اوتوماتيك فتره
اول ما رجعت اشتريت اوتوماتيك
طبعا راحه ودلع وشارى دماغى
كنت كل ما اركب عربيه تانيه معرفش اسوقها
لحد ما اشتريت عربيه مانيوال
تعبت شويه فى الاول
بس صدقنى مبفكرش اركب اوتوماتيك تانى
ده متعه فى السواقه والشد
بس لما بروح القاهره واشوف الزحمه
ببقى نفسى اركن العربيه واركب تاكسى
يعنى المعادله مش صعبه انك تركب مانيوال تانى لو كنت اتعلمت السواقه عليه
كلها شهر واحد وهتنسى الاوتوماتيك

بص انا طول عمرى بسوق مانيوال بس فى الفترة الأخيرة مع تغيير العربيات جبناهم اوتوماتيك و بصراحة فى الأول كنت مخنوق و كان نفسى فى مانيوال بس الحمد لله تعودت على الأوتوماتيك لأن اصلا هوة مش محتاج تعود !

و بعدين دلوقتى انا لسة بحب المانيوال جدا و ان شاء الله لو حشترى عربية لوحدى خالص حشتريها مانيوال و انا دلوقتى كل فترة كدة باخد عربية حد من قرايبى مانيوال علشان منساش بس الحمد لله بسوق طبيعى جدا جدا جدا و زى زمان بالظبط و مفيش اى مشاكل و هوة دة المفيد انى دلوقتى بسوق الأتنين 100 100

المهم انت دلوقتى اكنك حتتعلم من اول و جديد و لو عندك خلفية عن المانيوال يعنى لو اتعلمت علية حيبقى الموضوع اسهل من انك تسوق مانيوال لأول مرة بس ان شاء الله كلة تعود و بعد اسبوع ولا حاجة حتلاقى رجلك بتنقل لوحدها و كلة تمام

اللى ميعرفش يسوق مانيوال مبيعرفش يسوق

الاتوماتيك راحه راحه راحه بالذات فى مصر

المانيوال متعه بس مش فى كل الاوقات

انا بسوق التيدا وبعدين اروح ارجع لل 128 علشان امشى رجلى على المانيوال بس معتقدش ان الواحد ممكن ينسى يسوق المانيوال حتى لو بعد فتره واتعود على الاتوماتيك

انا بنزل من الاوتوماتك للمانيول و العكس عادى جدا ولا اى مشكله

أنا بقى عمرى ما سوقت أوتوماتيك !

اقتباس:

---

المانيوال امتع ، لكن الأوتوماتيك اريح

---

+111111111111111
بالظبط كده


بس انا زي حضرتك متعود عالأوتو وبحس بلخبطة كبيره لما أسوق مانيوال بحس أني لسه اول مرة اسوق مع اني متعلم عالمانيوال

وبرضو بدور على أوتو في رينج 60 70 ألف ومحتار ,, قلت أجيب بيكانتو بس مستحرم تمنها وكمان عزمها حيقل جدا ..

انا الاول كنت مانول و دلوقتى اوتوماتك المانوال بيديك سحب اعلى و تحكم رهيب فى العربية عن الاوتوماتيك بس الاتوماتيك اريح و بالذات لو شوارع زحمة زى شوارع مصر الحبيبة و الموضوع دا بيختلف من واحد للتانى فى واحد عاوز راحة و مش عاوز سحب و جرى يبقى يشترى اوتوماتيك و فى واحد عاوز يجرب و يلعب و مش فارقة معاه الزحمة يجيب مانوال و انا بعد ما جربت الاتنين بالنسبة لى الاتوماتيك احسن عشان اريح

أللى ساق مانيول عمره ما ينساه لكن لو هغير عربيتى او اشتري تانى اكيد اوتوماتيك برده

المانوال متعه في القياده و سحب تحفه وتحس انك فعلا سايق عربيه
اما الاوتوماتيك العربيه هيه اللي سايقاك ..

واللي مابيعرفش يسوق مانوال يبقى معندوش خبره يعني ايه قياده :2003126104835_wrc:

الميزه الوحيده في الاوتوماتيك الراحه وقت الزحمه ... لكن على طريق سريع اسمع بقه احلى صوت للموتور و كانه هيفرقع :D ده غير انه على ماتجمع سرعه معاك فيها ربع ساعه :thinking:

انا طبعا بسوق الاتنين عادي جدا بس بحب المانوال اكتر ..

بصراحة أنا باكره الاوتوماتيك جدا
بالرغم ان معظم العربيات هنا اوتوماتيك و الله اشتريت عربياااااااااات كتير و كنت أمشي أدور ع المانيوال بس حظي الأخير وقعت في اللومينا ( شفروليه ) و هيه اوتوماتيك و للأسف مفيش منها مانيوال الا اللي بيجيي م السعودية و مش موجود كمان .
كمان عربيتي بمصر كرولا 1300 من شهر تقريبا دفعت فلوس ماكينة 1600 و ان شاء الله هاركب عليها الفيتيس المانيوال و أحتفظ بالاوتوماتيك .
اللي مبيسوقش مانيواااااااااااااال ميعرفش يعني ايه متعة القيادة

شوف يا باشا
انا واحد من الناس بحب المانوال
ولكل منهم مزاياه وعيوبه
على فكره كان فيه موضوع سابق بيتكلم عن الحوار ده
اعمل سيرش هيفيدك

وعشان مطولش عليك انا بسوق الاتنين عادي جداااااااا
بس عشان الامانة الاوتوماتيك مريح جدا في الزحمة
لكن المانوال متعةةةةةةةةة
وفي رأيي الموضوع متوقف على اعصابك وعلى البلد الي انت عايش فيها
يعني لو بتتنرفز بسرعه او البلد بتاعتك وطريقك زحمة خليك في الاوتو
ربنا يوفقك

المانوال ليه مميزات برضه عمر افتراضي اطول اعطال اقل سحب و تسارع اعلي تكلفة تصليحه اقل بكتير من الاوتو سهولة في الصيانة عن الاوتو

حيبقى فى صعوبه فى الاول بس بعد كده خلاص

اعتقد الموضوع كلة تعود اه هاتتعب شوية فى الاول بس الموضوع بعد كدة هايكون عادى

على فكرة الموضوع مش مستحيل ولا صعب اوي
هو بس محتاج منك تعود وتشغيل رجلك الشمال وبالذات انك بتسوق اصلا
يعني السنس والتعامل مع العربيات اللي حواليك موجود اصلا هتبقى القصة كلها في تظبيط رجلك الشمال بسسسس!! متقلقشي
انا قعدت سبع سنين فترة الكليه بعربية اتوماتيك بس كانت بتاعة والدتي وبعد التخرج جبت سيات مانوال طبعا وبعدين آتوس مانوال برضة بس بصراحة لو كان معايا فلوس اجيب اوتوماتيك كنت هجيب اوتوماتيك حتى لو ألف ومائة سي سي المهم رجلك على العربية هتبقى عاملة ازاي !!طبعا هتلاقي العربية الوتوماتيك معاك تقيلة على السرعات القليلة وبعدين مش هتحس بفرق بينها وبين المانوال ودا عشان السي سي الصغير

يعني من الآخر لو معاك فلوس تجيب اوتوماتيك يبقى احسن من المانوال عشان معظم الشوارع في معظم الوقت زحمة

اقتباس:

---

المشاركة الأصلية كتبت بواسطة bee

شوف يا باشا
انا واحد من الناس بحب المانوال
ولكل منهم مزاياه وعيوبه
على فكره كان فيه موضوع سابق بيتكلم عن الحوار ده
اعمل سيرش هيفيدك

وعشان مطولش عليك انا بسوق الاتنين عادي جداااااااا
بس عشان الامانة الاوتوماتيك مريح جدا في الزحمة
لكن المانوال متعةةةةةةةةة
وفي رأيي الموضوع متوقف على اعصابك وعلى البلد الي انت عايش فيها
يعني لو بتتنرفز بسرعه او البلد بتاعتك وطريقك زحمة خليك في الاوتو
ربنا يوفقك

---

+100000000000000000

عايز نصحتي انا بسوق مانيول وكارهه حياتي وفعلا عايز اي عربية اوتماتيك وسيبك البلد دي مش بتاع متعة انت جايب عربية علشان تشتغل بيها يبقي تجيب اوتماتيك

اقتباس:

---

المشاركة الأصلية كتبت بواسطة mohamed ibiza

من مميزت المانوال عن الاوتو برضه ان الاوتو بيستهلك تيل امامي اكتر من المانوال فيه فرق ملحوظ

---

والمانويال بيستهلك اسطوانه ديبرياج

اقتباس:

---

المشاركة الأصلية كتبت بواسطة Kemo0o

السواق الصح يسوق اي حاجة في اي وقت

---

+10000000000000

اقتباس:

---

المشاركة الأصلية كتبت بواسطة katkootaya

المانوال متعه في القياده و سحب تحفه وتحس انك فعلا سايق عربيه

اما الاوتوماتيك العربيه هيه اللي سايقاك ..

واللي مابيعرفش يسوق مانوال يبقى معندوش خبره يعني ايه قياده :2003126104835_wrc:

الميزه الوحيده في الاوتوماتيك الراحه وقت الزحمه ... لكن على طريق سريع اسمع بقه احلى صوت للموتور و كانه هيفرقع :D ده غير انه على ماتجمع سرعه معاك فيها ربع ساعه :thinking:

انا طبعا بسوق الاتنين عادي جدا بس بحب المانوال اكتر ..

---

اللى فاهم هو راكب ايه مش هتفرق معاه اوتوماتك من مانيوال
دلوقت حتى الاوتوماتك ممكن تتحكمى فى وقت النقله والشد وصوت الموتور وكل حاجة نفسك فيها
المهم تبقى فاهم اللى انت راكبه
وعمر ما العربيه هتسوقك(ده بالنسبة للعربيات الجديدة)

وعلى فكره فى فتيس اوتوماتك بينقل اسرع من الفتيس المانيوال يعنى لا بيجمع فى ربع ساعه ولا كلام من ده
الكلام ده كله كان زمان
دلوقت احنا فى عصر التكنولوجى


المانيوال متعه بس مش فى القاهره والجيزة
الاوتوماتك مريح فى كل مكان وزمان
الجديد فى منه اوتوماتك ومانيوال فى نفس الوقت (عيش حياتك)

شوف بقى انت عايز ايه واختار

اقتباس:

---

المشاركة الأصلية كتبت بواسطة hesham2004

المانيوال امتع ، لكن الأوتوماتيك اريح

---

+111111111

مانيوال ::

اه عادى ممكن تسوق مانيوال بعد فتره من سواقه الأوتوماتيك بشرط انك كنت بتسوق مانيوال بس انا بفضل اسوق المرسيدس(مانيوال)عن الشيروكى (اوتوماتيك) علشان بحب أأمرك كتير

بصراحة المانيوال ليه طعم تانى وانت مش ناقصك غير تتعلم توازن دبرياج مع بنزين

وتنقل امتى لان انت اساسا بتعرف تسوق

اقتباس:

---

المشاركة الأصلية كتبت بواسطة hesham2004

المانيوال امتع ، لكن الأوتوماتيك اريح

---

صح حضرتك كده جبت من الاخر انا عن نفسى بحب المانوال اكثر لانه ممتع اكثر فى السحب و الشد و الجرى لكن الاوتو عقبال م تجمع بتخنق

انا عملتها كان عندى اوبل اوتوماتيك وبعتها وجبت بيجو مانيوال بس بحب الاوتوماتيك اكتر

الاوتوماتيك دة اخترررررررررررررررررراع.... بيظهر اهميتة في شارع زحمة بيتحرك كل 10 ثواني 4 متر وتقف تاني...لمسافة لا تقل عن 5 كيلو.....او علي مطلع كبري مزدحم زي 6 اكتوبر..
رغم اني باحب المانيوال اكتر خصوصا لو علي طريق سفر....ألا ان السواقة داخل المدينة...لاااااازم تكون اوتوماتيك....علشان مرارة الانسان مهمة جدااااا...