الموضوع: بتدى بقشيش للعامل فى محطة البنزين ؟

ماشي نديهم بقشيش و نعرفهم أنه بمزاجنا و بدون إهانة برضه. لكن في ناس بتستعبط. امبارح ماشي باليل و رايق و لقيت بنزينة فاضية قلت أمون، كنت مكسل أفك الحزام و أفتح الباب. اديت المفاتيح لعامل و حسيت أنه بيستقبلني بترحاب كده. المهم حط بنزين و كله تمام، بصيت ورايا لقراءة العداد بعد ما خلص لقيته 18لتر و نص و الحساب 16.65 جنيه بالضبط (شفتوا أنا فاكر إزاي). و في ثانية راح مزير العداد و بدأ يملا عربية تانية. المهم اداني المفاتيح و اديته 50جنيه بدون كلام و مستني الباقي لقيته جايب لي 21جنيه و قام ماشي!!!!!!!! طبعاً أنا متوقع آخد 32 ولا 33
أعمل إيه طبعاً ما دورتش العربية و ندهت للبيه
قلت له: إيه دول؟ هو أنا مش شايف العداد ولا إيه 18 لتر و 16جنيه 65قرش!!!
قال: دول 21 لتر، تعالى يا محمااااااااد. كام حساب البيه؟
محمد: 21!!!!!!!!
أنا: و الـ21 دول الباقي ولا لتر ولا جنيه يا محمد
............... في الوقت ده كان حضر قدامي 5 من عمال البنزينة
أنا: هو العداد بتاع الطرمبة مش هو اللي أنا شايفه قدامي ده و لا في حتة تانية!!!!
واحد فيهم: خلاص يا بيه ناقص لك كام.... هو قصده على زبون تاني
أنا: المرة الجاية أبقى أصورها لك، شكراً
طلعت و نفثت عليهم تراب الأرض من خلفي

الموقف ده حصل معايا في أكثر من بنزينة على فكرة
آه يا حرامية ليه كده؟ والله باسيب لهم جنيه و اتنين كل مرة
هل عشان بيحس أننا بنتعامل بحسن نية؟
هل عشان شافني قاعد في وضع صعب أشوف قراءة العداد؟
هل عشان افتكرني بيه لما اديت له المفاتيح؟
هل عشان ما دفعتش حسابي فكة من الأول؟