الموضوع: سؤال للبنات : لو خيروكي ما بين تتجوزي مصاص دماء او مستذئب تختاري مين !!

سؤال غريب عجيب بفكر فيه وشاغل تفكيري
لو اتقدم عريسين لبنتي واحد مصاص دماء وواحد مستذئب.
هختار مين فيهم !

ولا الي عندو شقة يكسب :)



مش عارف اذا شفتم الفيلم ده معايا ولا لأ فيلم نيو موون. ... والي بتدور فكرتوا على بنت. حبها شبين واحد مصاص دماء والتاني مستذئب بيتحول الى ذئب على مزاجوا ... وهيا. بتحب الاتنين الصراحة وقعدت تفكر تفكر. ففي النهاية بعد ما استخارت قلبها قررت تسيب ابوها وتتحول هيا كمان لمصاصة دماء البشر وتروح تتجوز الواد الصايع مصاص الدماء .

على فكرة الموضوع ده بجد كتير ما بنشوف ان في بنات بيبقى قدامها عريسين ومحتارة بينهم ومش عارفه تقول لده يجي يتقدم لها ولا تقول للتاني يجي يتقدملها. ... وبالذات اذا البت حلوة كده وزي اللوز والمنافسة الحقيقة شديدة عليها لأن البت ذات نفسها شديدة ... (( بتحصل ... وكل شيء وارد الحدوث )) .

بس حتى ولووو. ... الاختيارات صعبة جدددداً
وتلاقي واحد مصاص دماء البشر ودي حقيقة وبنشوفهم ليل وياااا نهار. تلاقي مثلاً الي متقدم لاختك او لبنتك بيشتغل دكتور محترم شكلاً لكن الواقع انوا (( مصاص دماء البشر )) وتلاقيه بيشفط دم وشقى الناس وعلى تحاليل وعلى اشعه من المركز بتاعوا وعلى. لا لا يا ابني انتا ازاي كنت ساكت على نفسك الفترة دي كلها ازاي ... كويس انك جتلي في اللحظة المناسبة. انشاء الله هنمشي على علاج مع بعض عشرين خمسين ستين سنة. كده وانتا هتبقى كويس ... او مثلاً يكون العريس محامي. بس برضوا مصاص دماء ... عارفين النوعيه بتاعت لا لا اطممممممممممن قضيتك مضمونة ويفضل يشفط في اتعاب من دم وشقى موكلوا لغايت ما يشفطوو كلوو اهو النوعية دي من العرسان انا بسميها (( مصاصين دماء البشر )) مش لازم تلاقي مصاصين دماء البشر يوطي كده على رقبت الضحية علشان يمص دموا. لأ في طرق كتيررررر لمص دم وشقى وتعب الغلبان .

وحتى فكرة المستذئب الواد البلطجي. الي بياخود حقو بدراعوا ويهجم على ده وعلى ده كمان موجودين في المجتمع المصري عندنا. يعني مش عارف ليه الفيلم مصنف في خانت الخيال العلمي او القصص الاسطورية رغم انوا بيناقش قضية مجتمعية بحته .... فتلاقي فعلاً اهل البنت بيبقوى محتاريين بين واحد مستذئب وبين واحد مصاص دماء. او بين واحد مستحمر. وابن حلال. والمستحمر ده بيبقى مطلوووووب جداً جداً جداً. في حالة لو البنت بنتك عصبية وبتتكلم بايديها. فانتا ساعتها محتاج مستحمر .... مينفعش تجيب لبنتك عريس مصاص دماء وهيا تكون مستذئبة او مسترجلة ويقعدوا يعضوا في بعض ليل ويا نهار .... لكن بالرغم من ذلك فالاختيارات بتبقى صعبه وفعلاً في النهاية الي بينتصر هو الي معاه شقة ووظيفة ولا تقلي مستذئب ولا تقلي مصاص دماء ... لان. يا فرحتي يكون مصاص دماء ومعندهوش شقه ... هعمل بيه ايه ساعتها !!

هيقولي استنى ياعمي لمن امصلي دم زبونين تلاته عقبال ما اجمعلك تمن شقة يا عمي !
لا يا حبيبي روح مص براحتك وكون نفسك وبعدين تعاللي تكون كونت نفسك واشتريت شقة .

@@@@@@@@@

فعلاً الاختيارات صعبه ... ومتعرفش العريس الي متقدم ده من اي نوع. ياترى بني ادم زينااااا ولا هو مصاص دماء وهيعيش بنتنا في اموال حرام .... ولا هو مستحمر. ولا هو شكلو طبيعي كده وهادي لكن بالليل ووقت بزوغ الشمس والقمر. بيبتدي يتحول الى مستذئب ويطلع عيل ابن ستين تيت. وياخود بنتكم ويعذبهااااا معاه. ... ازاي تسئل عن. عريس. وهتسئل عنوا فين .... في زمن محدش بيعرف فيه حد وكل نظرة الناس لبعض اه ده فلان بتاع الانسر. ولا يكونش قصدك على علان بتاع الفيرنا ولا تكونش قصدك على فلان الي معاه الالنترا النبيتي الحمرة الي وخده بيشلة في الرفرف من جنب اليمين والفلشر بتعها الخلفي محكوووك شوية !!! ده لو بتسئل عن عربية اسهل على كده اما انك تسئل عن عريس وعن أخلاقوا اعتقد بتبقى من سابع المستحيلات ... في الزمن الاغبر بتعنا دهوا. وبعدين المشكلة ولاد لزينة مبيبنش عليهم اذا مستذئب ولا مصاص ولا نوعوا ايه مفيش غير انك تعزمو في يوم. القمر هيكتمل فيه ويبقى بدر كده وتستنى عليه وتشوف هيتحول ولا لأ :)

سلمت امري ليك يا رب .... على اي اسس بتختاروا العريس (( مع الاسف ))
وايه احسن طريقة بتعملوا سيرش بيها عن العريس
وفي النهاية لو عرفتوا انوا مصاص دماء ولا مستذئب ياترى بترفضوا ولا بتقولوا. مصاص مصاص. حد لاقي ... المهم يكون مصاص دماء ابن حلال ويريحها ويهنيهاااا .... وان كان مستذئب نقول مش مشكلة مستذئب مستذئب .... وياسيدي وقت ما يتحول نقول للبت تمتص غضبوا. وتبعد عنوا ساعت مايجي يتحول واهم حاجة ميمدش ايدو عليها او لمن يتحول يجي يطنطط علينا ... فعلاً الاختيار صعب انتم لو كنتم مكانها تختاروا مين. المستذئب. ولا مصاصين الدماء .



@@@@@@@@
وتحياتي