الموضوع: Power Inverter

السلام عليكم ياشباب

من فتره وبعد ما الكعرباء ابتدت تقطع كتير فكرت فى انى اجيب مولد كهرباء ولما نزلت وسألت لقيت انه مش ح يكون حل عملى بالنسبه ليا فابتديت انى اشوف المواضيع اللى بتتكلم عن مشكله الكهرباء ومن الحلول اللى شفتها موضوع الانفرتر وقريت كل اللى كتبتوه عن الموضوع ده ونزلت من يومين عشان اشوف الجهاز على الطبيعه ودى كانت النتيجه بعد مادورت فى كل المحلات تقريبا فى شارع نجسي الريحانى والجمهوريه وعماد الدين لحد العتبه ورمسيس

الاجهزه اللى موجوده فى السوق كلها اجهزه صينى وبصراحه تعبانه اوى موجود منها من اول 600 واط لحد 2000 واط وكل اللى لاقيته مش power inverter pure sine wave
كلهم modified يعنى يشغلوا لمبات او تليفزيون بس مش ح يشغل مراوح ومعطم اللى فى السوق من غير شاحن والاسعار لقيتها لل 600 واط متوسط السعر 700 جنيع تقريبا وال 1000 واط ب 900 جنيه وده لقيت واحد بيبع ال 1000 واط بالشاحن وكان سعره 1350 جنيه
بس برضه modified

المهم بعد البحث لقيت جهاز تقريبا يشبه ال ups بس من غير يطاريات قدرته 875 واط وبينزل من 2000 واط بس مالقتهوش من مميزاته
1- انه صناعه هندى مش صينى
2- فيه smart charger يعنى ح يشحن البطاريه ويفصل الشحن بعد البطاريه ما تتشحن
3- power inverter pure sine wave
4- فيه كارت كنترول يعنى لما الكهرباء تفصل ينقل على البطاريه فى اقل من كسر الثانيه يعنى لو مشغل اجهزه والنور قطع الاجهزه ما بتفصلش ولما النور يرجع يفصل دايره البطاريه ويرجع للكهربا العمومى تانى
5- فيه لمبات للتنبيه منهم الباور . و ال smart charge و over load و no load
6- فيه منطم تيار كهربى يعنى لو شغال على الكهرباء العمومى وحصل ارتفاع او انخفاض فى التيار الجهاز بيفصل التيار العمومى وبيشتغل من على البطاريه لحد ما التيار يظبط وبعدين يرجه تانى يشتغل على التيار مش من البطاريه

ولما سألت عن البطاريات قالولى يفضل انه يشتغل على بطاريات deep cycle لانها مخصصه للنوع ده من التشغيل بس برضه عادى لو استغل على بطاريات عربيه جافه

سعر البطاريات ال deep cycle لقيته
750 جنيه لل 80 امبير و 1450 جنيه لل 1500 امبير ( طبعا سعرها غالى اوى )

لما حسيت الكهرباء اللى انا محتاجها لقيت انى محتاج اشغل lcd و رسيفر ولاب وراوتر ومروحه ولمبات كهرباء يعنى تقريبا 500 واط

المهم قررت انى اجيب الجهاز ده وجبت معاه بطاريه AcDelco 70 امبير جافه

الجهار خارج منه كابلين للتوصيل بالبطاريه وكابل كهرباء لشاحن البطاريه ومكان خارج يتوصل بمشترك للاجهزه اللى ح اشغلها

توصيله بسيط مفيهموش مشاكل المهم ان بعد ماوصلته شغلت الاجهزه اللى واصله منه وفصلت عمومى الكهرباء لقيت كل الاجهزه شغاله ومافيش حاجه حتى عملت restart

حسبه وقت الشغل للبطاريه تقريبا 1.5 ساعه لو شغلت كل الاجهزه اللى انا موصلها وطيعا بعد ما النور بيرجع البطاريه بترجع تشحن تانى

بصراحه لسه الكهرباء ما قطعتش من ساعه ماركبته عشان اعرف الوقت الفعلى اللى ح بشتغله بس ح اقولكوا اى جديد الاقيه

يارب يكون الموضوع مفيد ليكوا

المشاركة الأصلية كتبت بواسطة hosammoner

شكرا ع الموضوع الجميل ده بس قولنا منين وبكام

الله يبارك فيك

التفاصيل كلها فى ردى على mr_vampire عشان كان بيسال على كذا حاجه منها السعر والمكان برضه