فى حل لريحة الكمكمة فى العربية بعد الغسيل؟

**MoustafaElfaek** · 12-04-2014 09:51 PM

السلام عليكم
أنا غسلت عربيتى وعملتلها كار كير فى بنزينة وطنية على الأوتوستراد (ناس كتير شكروا فيها)
العربية الحمد لله طلعت نضيفة خاصة ان الفرش لونه فاتح وكان فيه بقع كتير
المهم ان العربية كمكمت من نسبة الرطوبة اللى كانت فى الفرش واللى مالحقتش تنشف, وطبعا العربية باتت مقفولة فعملت ريحة
هل فى حل للكمكمة دى؟... مع العلم انى صعب أسيب العربية مفتوحة لانها عند البيت هاتتملى تراب
وهل فى مكان بيغسل العربية بدون ما يسيب فيها نسبة الرطوبة دى؟

**مصطفى-حسن** · 12-04-2014 10:04 PM

كحل مبدئى سيبها مفتوحة فى الشمس او اركنها فى مكان كلة شمس وسيب الابواب مفتوحة لفترة

**abofandy** · 13-04-2014 12:06 AM

فية اكتر من حل
1 - انك تسيب جزء من الزجاج فى الاربع ابواب مفتوحه للتهويه
2 - لو تقدر تسيبها فى منطقة مشمسه وتفتح الابواب ويكون الهواء والشمس داخلين للفرش يبقى افضل
3 - لو عند حضرتك فتحت سقف هتفتحها علشان الشمس تدخل وهتتعامد على الاشعة فتطلع ريحة الكمكمه
4 - هتجيب اكتر من فواحاه الغالية الى ليها رائحة مميزة ولازم يكونوا نفس النوع علشان الريحه تبقى مركزه
5 - ممكن تجيب كمان معطر جو وترشه بس كل الكلام دة بعد التهوية الجيدة للسياره
6 - ممكن تجيب فحم علشان الفحم بيسحب الرائحه الكريهه

وممكن تحقق كل الست خطوات دول ولو عملتهم اتحداك تشم اى ريحه فى العربية تانى

**شاهين - بنز** · 13-04-2014 03:56 PM

حصل معايا الموضوع ده وحليته
الحل إنك تسيب حتة مفتوحة في الأربع شبابيك من الصبح حتى المساء لكن متبيتهاش والإزاز مفتوح عشان الندى إللي بيجي الفجرية حيرطب الفرش تاني
والريحة حتروح تماما بإذن الله زي ماحصل معايا بس حتاخد بتاع أربع تيام

**MoustafaElfaek** · 13-04-2014 04:05 PM

المشاركة الأصلية كتبت بواسطة شاهين - بنز

حصل معايا الموضوع ده وحليته
الحل إنك تسيب حتة مفتوحة في الأربع شبابيك من الصبح حتى المساء لكن متبيتهاش والإزاز مفتوح عشان الندى إللي بيجي الفجرية حيرطب الفرش تاني
والريحة حتروح تماما بإذن الله زي ماحصل معايا بس حتاخد بتاع أربع تيام

هحاول أعمل كدة, ربنا ييسر

**sv065** · 14-04-2014 06:33 PM

السلام عليكم

أخي الفاضل عانيت مما تعاني منه وعملت موضوع الشمس ده بس برضه الريحة مارحتش مية مية يعني تقدر تقول إنك محتاج تعمله 4 أو 5 مرات علشان تبقي النتيجة مرضية بس مشكلة إنك تسيب الإزاز مفتوح هي العائق

ومرة كنت في كارفور قسم كماليات السيارات لقيت علبة إسبراي صراحة مش فاكر الماركة بالظبط بس هي مستوردة وممكن تكون تقريبا ماركة sonax برائحة الليمون لتنظيف التكييف فقلت أجربها يمكن تجيب نتيجة وفعلا جابت نتيجة حلوة ده غير إنها قضت تماما علي ريحة الكمكمة اللي في التكييف كمان ده غير موضوع كمكمة الفرش والعلبة أصلا طريقتها انك تقفل العربية كلها وتفتح التكييف علي أعلي سرعة وتحط العبوة خلف الكرسي الامامي وتدوس عليها حتتفضي كلها في لحظات بس تخرج بسرعة وتقفل العربية كويس وتسيبها ربع ساعة التكييف شغال

تحياتي