الموضوع: طرق تظبيط الفيات 128 والتعديل فيها

طبعا مع تسقيط الموتور هنحتاج نجهز العربيه وده من ناحيه الثبات اصلا العربيه بموتور 1100 مبتبقاش ثابته قوى على السرعات العاليه بس برضه ارجع اقول ثبات ال 128 كويس مش بطال....... يبقى نشوف خطوات تثبيت العربيه على الارض :
1-كوتش عريض الكاوتش العريض مش الجنط الجنط ده مجرد شكل من الخارج المهم الكاوتش يبقى عريض طبعا ميتعداش ال 14" علشان مياثرش على العفشه احسن حاجه 13 عريض اعرض حاجه فى ال 13 على فكره ال 13 مش وحش ده جامد ومناسب طبعا نوعيه الكاوتش بتفرررررق كتييييير لان الكاوتش تصميمه بيفرق فى المطبات والثبات على الطريق كمان يبقى كوتش عريض لازم منه اساسى وهتحس بفرق طبعا
ودى عربيه فيها جنط 13 عريض:

2-توطى العربيه ومحدش يقولى مطبات مصر على فكره وطى العربيه هتحس براحه احسن طبعا مع مساعدين نضاف وتوطيه العربيه عن طريق قص لفه من السوست وبتتقص بدون التسخين عليها علشان خواصها متتأثرش ودى بتتعمل فى الحرفيين وسهله مش معضله وهثبت العربيه فى الارض يعنى هتزود الثبات بنسبه 50% حتى فى السرعات البطيئه مش هتحس بالملفات خالص وهتحس انك راكب عربيه من الجداد
ودى صورة للسوست الاماميه ومكان القطع لتوطيه العربيه واوعى تسخن السوست علشان كده انت هتبوظهم يعنى اقطع من غير متسخن على السوست:

ودى صور عربيات متسقطه:













3-البارات الى اتكلمنا عليهم سواء فى الشنطه او الحوض بتثبنت العربيه عند الملفات وفى ناس بتعمل بار تحت العربيه فى المنتصف بالظبط البارات دى بثبت شاسيه العربيه وتمنعه من الحركه فى الملفات وطبعا فى المطبات
4-تغيير الفرامل بفرامل اكبر يعنى انت سقطت موتور ريجاتا ركب بقى فرامل الريجاتا لانك هتحتاجها فى السرعات الكبيرة وحتى السرعات البطيئه هتلاقى العربيه بتفرمل اسرع واحسن لان فرامل الريجاتا اكبر وممكن تدور على حاجه تركب فى ال 128 وتكون اكبر وادائها احسن
5-متنساش مساعدين وسوست رياضى يعنى ثبات اعلى وقدرة على اخد الملفات بسرعه اكبر وبدون تاثير على ثبات العربيه

نتكلم بقى على المكونات الى بداخل السيارة:
طبعا سقطت موتور او مسقطتش تعالى نخلص من مشاكل ال 128 المقرفه هى مشاكل سهله بس مقرفه شويه بالاخص كهربه السيارة:
1-الابلتين والكوندنسر متستخسرش حاجه غاليه وتجيب ابو 12 جنيه هات الغالى علشان ميلدعش كل شويه وتقعد تصنفر والعربيه تقف وهيه ماشيه ويبقى منظرك وحش او ياخى غير الاسبراتير كله باى اسبراتير بتاع عربيه جديه هيفرق معاك فى التدوير
2-البوجيهات هات بوجيهات غاليه غاليه غاليه ياريت بوجيهات رياضى لانى دى بتاثر فى الموتور ومعن ان ادائها عالى يبقى الاحتراق فى الموتور بيتم بشكل كويس وتستفيد من اداء الموتور بالكامل
3-الاسلاك الى بتوصل بين البوجيهات والاسبراتير هاتها نضيفه علشان ميبقاش فى فقد فى الشراره
4-الكربراتير نضفه كل شويه واتاكد انه شغال تمام ومفهوش مشاكل
5-هات موبينه الى بتشتغل فى الثلج يعنى موبينه روسى علشان فى البرد العربيات مبدورش
6-استخدم زيت نضيف وغالى علشان بجد بجد بيحافظ على الموتور وبيدى اداء عالى جدا ومع الحرق الموتور مش هيتاثر يعنى احرق وميهمكش
بيتهيالى كده خلصنا من الحجات المقرفه الى بتبوظ كل شويه طبعا فى حجات كتير تانى بس نصيحه هات الغالى بيعيش هو مش غالى قوى بس بيبقى فيه فرق فى السعر
طبعا بالنسبه للمواتير فى ناس بتشترى كربراتير بابين والى بيشترى كربراتير لكل سلندر والى بيشترى كربراتير ليه فتحتين لسحب الهواء ودى كلها علشان يحسن دخول الهواء والبنزين علشان يحصل على اداء عالى وفى ناس بتغير المنفولد والمسورة بتاعت الشكمان كلها علشان يركب منفولد رياضى احنا ملناش دعوه باكلام ده المهم انت سقطت موتور بالفتيس والكربراتير بتاعه ويكون موتور حالته كويسه واعمل بقى الحجات الى قولتلك عليها.....
طبعا فى ناس بتغير بساتم وتكون بساتم رياضى ذات ضغط عالى او يغيرو عمود الكامات وعمود الكرنك والبلات او يوسعو فى السلندرات احنا ملناش دعوه بالناس دى......
كده اكون انتهيت من الكلام على العربيه من الداخل سواء تدعيم الشاسيه اوتسقيط الموتور....


هتكلم عن العربيه من الخارج وكيفيه تظبيطها سواء من اللون الخارجى او حتى العتب والاكصدامات والتنفيخ والفرش الداخلى للسياره والتابلوه وكل حاجه عن التظبيط الخارجى للسيارة:

اولا اللون:

اللون الخارجى للسيارة مهم جدا جدا لانه بيعبر عن السيارة وصاحبها وبيشد الانظار اليها ويخليها مميزة وطبعا الالوان حسب الذوق بس دلوقتى بقى فيه الوان مشهوره ومحبوبه للتظبيط طبعا كلها بتكون ميتالك بس بتكون عبارة عن لونين مضروبين فى بعض او اساس العربيه بيكون لون ابيض مثلا وبيضرب فوقيه برتقالى او اخضر فاتح او بتكون العربيه لونين متداخلين فى بعض سواء من فوق لتحت او من اول العربيه الى اخرها او العكس طبعا نصيحه لاى حد بيدخل عربيته فرن او ناوى يدخلها ياريت تشترى اجود الانواع من ادوات البياض وطبعا تختار صنيعى جامد علشان الشغل يطلع كويس وعلشان اللون ميتغيرش او يبوظ فى وقت قريب طبعا الخلط بواسطه الكمبيوتر قصدى خلط الالوان بواسطه الكمبيوتر بقت من الحلول الجامده قوى والى سهلت العمليه ودلوقتى هفرجكم على مجموعه صور لل 128 بالوان الميتالك:
(زى الرموش الى بتركب على رفارف

طبعا بعد دخول الفرن والخروج منه لازم تغيير الفوانيس الى وراء والى قدام بجداد ويكونو من الاصلى علشان ميبهتوش بسرعه وطبعا تغير الشيكه الامامى وفوانيس الاشاره وكل مايتعلق بالنور والكهرباء الخارجيه طبعا علشان العربيه تبان جامده متركبش الفيبر بتاع ال 128 سواء الى فى الاكصدام او الى على الرفرف او الى فى جناب العربيه لان شكلهم استيل قديم ولاحظ الصور.......

ودى صور لبعض الالوان الجامده على ال 128:





طبعا بعد لما شوفت اللون وكده هنتكلم على التنفيخ او البودى كيت body kit التنفيخ والعتب والاكصدامات وكده طبعا فى ناس فاكره التنفيخ ده صعب او مكلف بس لا التنفيخ ده عباره عن رفارف صغيره (زى الرموش الى بتركب على رفارف ال 128 وبتكون بلاستك او فيبر)
بس دى بتكون صاج وبتتركب على رفرف العربيه الاصلى عن طريق السمكرى بيلحمهم فى الرفرف وطبعا التنفيخ بيتعمل قبل الفرن ولو مفيش فرن اصلا يبقى تدهن الصاج بلون العربيه لان الصاج بيجى لونه اسود:
بالنسبه للعتب فدده بيكون فيبر وبيتركب تحت البابين من الجنبيين للعربيه وبالنسبه للاكصدامات دى بتتعمل عموله عند بتاع الفيبر وبتختار شكل او انت بتجبله شكل وهوبيعمله...
فى ناس بتغير الفوانيس الى وراء بفوانيس (انا مسميها فوانيس فرارى) ودى بتكون عباره عن فانوسين مدورين فى كل جنب بيكون لونهم احمر ودى بتتعمل عادى برضه عند السمكرى وبتدى شكل جامد
ولو مكنش كده يبقى تفيم الفوانيس اسود الفوانيس الى وراء طبعا......
طبعا المرايات تتغير بمرايات جانبيه يكون شكلها حلو اقله مرايات الشاهين وتكون بنفس لون العربيه فى ناس بتعمل فتحت سقف وطبعا ده شغل السمكرى وفى ناس بتنفخ الكبوت الامامى ودى برده تبع شغل التنفيخ وكده طبعا الجنوط وهوريكم صور كام جنط جامد....
اسبويلر بس انا مبفضلوش فى ال 128 طبعا نور زينون مش شرط من ابو 1000 جنيه لا فى 60 جنيه وجامد برده بيكون 400 وات طبعا كشاف جديد اصلى من قدام مع زجاج اصلى اتفرج بقى على احلى نور واحلى رؤيه طبعا التفييم انا مبفضلوش علشان المشاكل مع المرور وكده فى ناس بتفيم السقف جلد اسود وبيبقى شكل العربيه جامد الاستيكرات موضوع جامد برضه بتبقى على جناب العربيه والكبوت وفى منها الوان وابيض واسود وفى منها بيكون غالى وفى رخيص جدا طبعا مبتكلمش عى الاستيكرات التعبانه الى بتخلى شكل العربيه فرح لا طبعا انا بتكلم على الاستيكرات النضيفه بتاعت اندر جروند وكده.....بالنسبه لمفلر صوته عالى انا مبحبوش قوى لانه بيدى صوت مزعج جدا جدا ومبيديش راحه خالص وانا من رائى اى ديل عادى مبيعملش صوت يكون منظر احسن طبعا فى ناس مبتركبش الاكصدام الامامى فى ال 128 وبعتمدو على شكل سدر العربيه والفتحات الى فيه فبيديها شكل رياضى وده سواء الاكصدام من قدام او وراء......فى برضه ناس بتركب اكصدامات زى بتاع الجيب وبيكون عليها كشفات ضباب بتبقى حلوه برده وفى برده فتحات هواء بتتكرب فى الكبوت او الرفارف او فوق السيارة وبتتكرب برده على انها شغل تنفيخ وبودى كيت......
ودى صور الصاج بتاع التنفيخ وصور العربيه وهى متنفخه:





تكلم بقى عن العربيه من جوه والكماليات الى ممكن تبقى فيها:
1- زجاج كهربائى للاربع ابواب
2-سنتر لوك
3-انذار
4-طاره اسبور مع طقم دواسات للارضيه ودواسات لبدالات البنزين والفرامل والدبرياج يكونوا نفس اللون او متشابهين
5-فرش داخلى لونين ويكون شبيه للون الطاره واللون الخارجى للسيارة او على الاقل متناسب معاه ويكون الفرش شامل الكراسى بالابواب ويكون لونين ويفضل طبعا فرش جلد نوع فاخر او نضيف على الاقل
6-تابلوه نضيف او تغيير التابوه بتابلوه سيارة حديثه مثل الاونو او الاوبل كورسا ودول ينفعو ويركبو على طول وهيدو شكل حلو وجامد للعربيه
7-عداد ار بى ام ومعه مجموعه من عدادت الزيت والمياه والحراره
8-تسجيل سى دى وسماعات نضيفه وجى ام(طبعا الاختيارات كتيييييير والميزانيه مفتوحه) طبعا التسجيل بيعمل فرق كبير
9-طبعا دى فى دى بس انا بعتبره بزخ على الفاضى وملوش لازمه وكفايه منظره وانت مش عايش فى العربيه علشان تركب دى فى دى
10-كراسى طياره بالنسبه للكرسيين الى قدام
11-التكييف طبعا لو اتسقط موتور فيه تكييف

الموضوع منقول للافاده

ودى صور لعربيات متظبطه من جوه طبعا فيات 128:
























الموضوع منقول

ودى بقى شويه صور ل 128 جميله جدا وفيها تابلوه بتاع فيات اونو بس جامد وكمان الموتور وكل المكونات الى فى الحوض مدهونه بالوان جميله جدا:








ودى صور لواحد رش التابلوه بتاعه بس طبعا لو هترشه طبعا طلعه من مكانه واوعى ترشه وهو متركب علشان الرش عن طريق بخاخه الاسبراى ودى بتعمل 7 جنيه يعنى الاسبرى بتاع الرش بيعمل 7 جنيه ترش بيه التابلوه على نفس اللون الخارجى للسيارة او على الاقل نفس لون الفرش الداخلى للسيارة وادعيلى بعد كده بس اوعى تعمل حاجه غلط وتدعى عليا:crazy000::



طبعا انا بفضل تابلوه مختلف عن تابلوه ال 128 لانه مش حلو وشكله قديم قوى....ممكن يبقى تابلوه فيات اونو او تابلوه اوبل كورسا.......

صور كمان لل 128:

الاسعار والفلوس مشكله الجميع طبعا بس بالنسبه للاسعار مقارنه بالعربيات التانيه هنلاقى فى فرق كبير طبعا اسعار تظبيط الفيات 128 ارخص بكتير وده لان اى حاجه بتجيبها مهمه فى العربيه بتظهر عليها وبتحس باختلاف والكل بيلاحظ الفرق.........
بالنسبه مثلا لزجاج الكهرباء 2 امامى عامل 150 للاتنين حسب مانا شوفت........سنتر وانذار بالريموت عامل 150 جنيه فرش داخلى للكراسى الامامى والكنبه الخلفيه عامل من اول 30 لحد 3000 ويمكن اكتر بس الاحسن بيبقى فى حدود 300 وانت طالع وده بيبقى جاهز او تفصيل عند السروجى طبعا اسعار الفرن احنا عارفينها من 600 لحد2000 ويمكن اكتر طبعا الى يدخل عربيته فرن ميبخلش عليها ويشترى اجود مستلزمات الرش يعنى البويه بتاعت العربيه تكون نضيفه وكده علشان اللون ميروحش او يتقشر كده وطبعا مينساش يعمل اللون ميتالك....
بالنسبه للمواتير ودى بتيجى بالفتيس و الكربراتير او الانجيكشن ودى بتعمل (استيراد) 2000 لحد 4000 بالكتير قوى دى طبعا مواتير فيات لانك مش هتسقط غير فيات او لانشيا او داتشيا علشان الترخيص فى المرور لو فيه كوسه ممكن تسقط حاجه تانى وتتسبت على الرخصه قصدى اى ماركه تانى....
بس خليك فى الفيات.......
موبينه اسبراتير بوجيهات ودى اسعارها عاديه جدا الموبينه والاسبراتير بتجيبهم بتوع عربيه حديثه انجيكشن والبوجيهات هات اى نوع نضيف......
طبعا عندك الجنوط جديده بتبدا من 800 جنيه طبعا من غير الكاوتش......عندك عدادت الار بى ام والزيت والميه وكله هتلاقيها فى حدود 100 لحد400 جنيه...علشان يبقى شكل العربيه حلو هتشيل الاكصدام من قدام ومن وراء بيبقى شكلها حلو او اعمل اكصدامات فيبر.....
الفرك والتخميس والكلام ده ملوش دعوه بنوع العربيه..............الموتاور مهم طبعا بس حتى لو عربيه 800 سى سى هتعمل بيها الى انت عايزه طالما بتمشى وفيها بنزين وفرامل ودبرياج وهاند بريك........
اتفرجو على الكليب ده وانتو تفهمو قصدى:
http://www.youtube.com/watch?v=odeeYJy0j_c

شكرااااااااااا

لكن الموضوع مكرر للاسف

موضوع جميل وانا عن نفسي قريته قبل كده بس مكانش هنا في نايل موتورز

وياعالم انت صاحب الموضوع ولا لا

ولو مش انت صاحب الموضوع يستحسن انك تكتب منقول

لان الموضوع باني عليه تقيل وواضح فيه جهد صاحبه اللي بذله فيه

معلش ياجماعه انا ما كنتش اعرف ان الموضوع اتعمل هنا قبل كده ولا لا

وياريت الادراه تحذفه

وعلى فكره ياجماعه الموضوع منقول وانا كاتب كده فى المشاركات بلون مختلف

على فكرة الراجل كاتب منقول و انا قريته هنا في نايل موتورز و ادي اللينك
http://www.nilemotors.net/Nile/showthread.php?t=6652

بس الموضوع دة في حاجات اكتر