البوجيهات وتيل الفرامل .. عن 301 أتحدث..

السلام عليكم

بعد قراءة كل المواضيع تقريباً اتضح ان فيه مشاكل رئيسية ضايقت اعضاء كتير وخوفت ناس من الـ301 وعلي راسهم (واهمهم) البوجيهات وتيل الفرامل
عاوزين نحسم الموضوع ده

دلوقتي البوجيهات في الـ 301 نوعها ايه؟ علشان نعرف رينج الاستهلاك والتوكيل مينصبش علينا
والبوجيهات بتتغير في عربية تانية بعد قد ايه؟

تاني حاجه قرات قبل كده ان البوجيهات راكبة علي coil او ما يطلق عليها بوبينا فى السيارات القديمة مما يستوجب تغيير البوجيهات كل 20000 كيلو
هل الكلام ده صحيح طيب البوجيهات في الكوري مثلا راكبة علي ايه؟

اخيراً تيل الفرامل جودته ايه؟ او ايه النوع المستخدم اللي ممكن يصفر ويحتاج لتغيير بالسرعة دي؟

لو فرضنا ان البوجيهات والتيل جودتهم ضعيفة هل ممكن احنا نجيب بوجيهات جودة نضيفة وتيل ايضا من بره ونخلي التوكيل يركبهم بحيث يعيشوا ومنوجعش دماغنا كل شوية؟

ياريت التفاعل في الموضوع ده لانه مهم وناس كتير اشتكت منه فلازم نعرف اساس الموضوع علشان نعرف نتعامل وننتهي من المشاكل دي
مش عاوزين نوجع دماغنا بعد كده

متابع باهتمام

كلام تمام بس المفروض أن العربيات اللي لسه هتتسلم نكلم التوكيل يغير نوع التيل والبوجيهات
والعربيات اللي اتسلمت يتم تغيرهم ف الضمان

انا لحد دلوقتى معنديش اي مشاكل من التيل ، وعامل 8500 كيلو ، وهبقى ابص عليه اشوف خلص منه قد ايه عشان اتأكد والبوجيهات كذلك الحمد لله مفيش منها مشكلة

أيدت الزملاء من قبل فى رفع شكوى جماعية إلى توكيل بيجو بسبب أعمال الصيانة الدورية واستهلاك قطع الغيار قبل الوقت الافتراضى لها والمصنعية المبالغ
ولكن رأيت أنه من الأفضل أن نعرف وجهة نظر العاملين فى التوكيل أولاً قبل التصعيد
أنا لا أعرف أحد فى مراكز الصيانة إلى الآن ، حيث أننى لم أصل إلى 2500 كم بعد
ولا أحب اسلوب الـ answer machine المتبع حين الاتصال بـ 19207
اتصلت بالاستاذ / هيثم مدير فرع مبيعات شركة بيجو بالمعادى (الذى اشتريت منه السيارة)، وأخبرته بالمشاكل التى تقابل الزملاء ، فقال أن تغيير تيل الفرامل والطانبير حسب الاستخدام ، فطريقة القيادة تختلف من شخص إلى آخر ، وبالتالى لايمكن تحديد العمر الافتراصى لتيل الفرامل بالكيلو متر،والأمر كذلك بالنسبة لقطع الغيار الأخرى بالرغم من وجودها فى جدول الصيانة ان يتم تغييرها عند (كيلومترات معينة) إلا إن ذلك استرشادى ولايمكن تطبيقه على جميع السيارات، أما المصنعية المبالغ فيها يسأل عنها مراكز الصيانة.

[QUOTE=Amgad A.alim;3875518476وبالتالى لايمكن تحديد العمر الافتراصى لتيل الفرامل بالكيلو متر،والأمر كذلك بالنسبة لقطع الغيار الأخرى بالرغم من وجودها فى جدول الصيانة ان يتم تغييرها عند (كيلومترات معينة) إلا إن ذلك استرشادى ولايمكن تطبيقه على جميع السيارات، أما المصنعية المبالغ فيها يسأل عنها مراكز الصيانة.[/QUOTE]

يعنى ايه مش عارفين يحددوا العمر الافتؤاضى لقطعة غيار من صنعهم ، الا اذا كانت تصنع فى الصين بجودة رديئة ، بالتالى لايمكن تحديد عمر افتراضى، وعلى فكرة فلتر البنزين اللى اتغير لى فى صيانة ال10000 صناعة تونس .ويعنى ايه استرشادى :Copy of majd(4): هما فاكريننا اول مرة نركب عربيات ولا ايه مايبصوا على العربيات اليابانى وانتظام الصيانة فيها !! هى البيجو اختراع جديد ولا ايه

صديقي العضو

الحل ننفض للتوكيل ونشتري تيل فرامل احسن من الاصلي وبوجيهات تيتانيوم يجي يقول غير قوله لا يحبيبي

تقبل مروري zeco

عند الذهاب لإجراء الصيانة المرة القادمة إن شاء الله
أرى أنه يجب الإصرار على مقابلة مدير مركز الصيانة والتحدث معه عن المشاكل التى تواجهنا بالتفصيل

هيعمل ودن من طين وودن من عجين ، ومش هايحل اى حاجة

كلموني دلوقتي بخصوص الشكوي واحد قاعد يحكي ويقوله ايه تفاصيل الشكوي قولتله كذا وكذا يقولي البوجيهات والتيل قطع استهلاكية ويحاول بقنعني انهم كده قولتلوا لا ما يخلصوش بالسرعة دي وبعدين مش انا لوحدي اللي بشتكي زمايلي كلهم بيشتكوا قالي طيب هنرد عليك تاني

كلمونى بردو بس ما لحقتش ارد عليهم

نحن فى مصر
المكالمات التليفونية والشكاوى المرسلة بالبريد لن تجدى نفعاً
لابد من التحدث وجهاً لوجه

اقتباس:

---

المشاركة الأصلية كتبت بواسطة amgad a.alim

نحن فى مصر
المكالمات التليفونية والشكاوى المرسلة بالبريد لن تجدى نفعاً
لابد من التحدث وجهاً لوجه

---

فعلا والله كنت لسه هقول كده
واللي عنده عيب في العربية يروح يرميها هنك ويقولهم مش عايزها انا معايا ضمان يغني اي حاجة تبوظ تتصلح علي حسابهم يا اما كده يتجيبوا عربية سليمة

شكراً ياجماعة علي التجاوب وإن شاء الله نقدر نوصل لحل
كده الغالبية منا عندها مشكلة في تيل الفرامل والبوجيهات ومهما كان طريقة القيادة سيئة لايمكن بأي حال من الاحوال
تغييرهم بهذه السرعة وقبل حتي اول صيانة 2500 او حتي 10000 الا اذا كان فعلا جودتهم رديئة او الوكيل بيستعبط وده بياثر علي اعتمادية العربية قبل المستهلك ويكون غباء مستحكم منهم بصراحة
لانها حصان رابح ولما تكون حجات زي دي بتتغير بدري ويسترخصوا فيها يبقي هما خسرانين جدا جدا
امال بعد 40000 او 60000 هنغير ايه؟

تاني حاجه سعر الصيانة عالي جدا جدا جدا علي عربية (فئة اقتصادية)

انا شايف ان الوكيل محروم فلوس ولما شاف الضغط عليها بدا في الاستغلال
طيب هل متاح ان نجيب قطع اصلية( بوجيهات تتانيوم مثلا وتيل جودة كويسه) ونركبها في التوكيل وننتهي من الصداع ده ؟

لان بصراحة معنديش استعداد كل شوية ادفع مبلغ وقدره لاسيما مع تزايد مسؤوليات الواحد واعتقد الجميع يوافقني في هذا الراي
لو كان الامر هيستمر ومفيش فيه حل الواحد افضل ليه يعزف عن شرائها ويشوف عربية اخري ويرتاح

السلام عليكم, على فكرة أنا التيل بدأ يصفر عندى بعد 6500 كم تقريبا, روحت التوكيل cdcm إللى عندنا فى الأسكندرية, طريق مرغم, قولت لهم إن التيل محتاج تنظيف, قالولى حنغيره لك فى الضمان بس ثوانى يجيلنا موافقة من المركز الرئيسى, و فعلا بعد تقريبا 1/2 ساعة جالهم الرد بالموافقة و غيروه لى من غير فلوس خالص !!
شكرا للمهندس المحترم/ أحمد طوبار - توكيل cdcm الأسكندرية

اقتباس:

---

hazem_alaedin السلام عليكم, على فكرة أنا التيل بدأ يصفر عندى بعد 6500 كم تقريبا, روحت التوكيل cdcm إللى عندنا فى الأسكندرية, طريق مرغم, قولت لهم إن التيل محتاج تنظيف, قالولى حنغيره لك فى الضمان بس ثوانى يجيلنا موافقة من المركز الرئيسى, و فعلا بعد تقريبا 1/2 ساعة جالهم الرد بالموافقة و غيروه لى من غير فلوس خالص !!
شكرا للمهندس المحترم/ أحمد طوبار - توكيل cdcm الأسكندرية

---

ألف مبروك
هذه أخبار سارة والضغط على التوكيل بدأ يأتى بثماره
وأول الغيث قطرة

تقبل تحياتى