انا عاوز اشترى عربية فاكرت فى لادا ٢١٠٧ موديل ٢٠١٤ انا عرفت ان الروسى بطل ينزل الكلام دة صحيح وان العربية بقت مصرى وانز لو هجيبها هتكون جميع الكمليات ياريت حد يفدنى بمعلومات عن موديل ٢٠١٤
عرض للطباعة
انا عاوز اشترى عربية فاكرت فى لادا ٢١٠٧ موديل ٢٠١٤ انا عرفت ان الروسى بطل ينزل الكلام دة صحيح وان العربية بقت مصرى وانز لو هجيبها هتكون جميع الكمليات ياريت حد يفدنى بمعلومات عن موديل ٢٠١٤
الادا مافيهاش مميزات خالص حتي التكيف مع الزحمه بيعلي حراره العربية جامد وادائه هباب نصيحه شوفلك نوبيرا ولاحاجة من الجداد دوول وعيش حياتك لان انا حرام اشتري عربية تكنولوجيا سبعينات ب حاجة وستين الف وتعالي بعد كده بيعها بعد ماتركب النمر بساعة ان سمعت فيها سعر فوق الحاجة وثلاثين الف ابقي ساعتها غلطان سعرها بيقع جامد ف اعاده البيع ده غير خشونة التعامل مع الدركسون والدبرياج بالذات مواال تاني لواحده
بص يا باشا تعالي ندرس الموضوع تجاريا اولا ثم فنيا
تجاريا: العربية غاليه جدا علي امكانيتها 55 الي 60 الف ممكن تزود 20 وتجيب لوجان الجديده
كمان سعر اعاده البيع بتاعها ضعيف جدا لانها مش مطلوبه كسيارة عائلية
روسيا اوقفت انتاج السيارة من 2011 تقريبا ومصر مازالت بتجمعها في توكيل متخلف كدا اسمه الامل "روح اتفرج علي اي مكتب له عشان تتأكد انه متخلف"
وكمان المجمع في مصر كان متخزن في الجمارك من 2007 واغلبه بتاكله الباروما وهو لسه جديد
اما فنيا فتعالي اقولك:-
العربيه عباره عن علبه صفيح منيله بستين نيلا
1.الدركسيون: يعمل بنظام الدوده وتوفيرا للوقت حقولك عنه كلمتين
"الدركسيون الدودة ده هو الاخشن والاقل دقه في التوجيه عبر كل السيارات في العالم"
2.الصاج: يعد من تصميم المدرسة القديمه لمنظومات الامان
والفكره انه يديك صاج جامد وخلاص بدون توزيع لنقط الانهيار او قوايم لحمايه السقف
وهذا النظام خطر جدا
3.الجلوس والراحه يتضرب بيهم المثل في المعاناه
4.هل هذه السيارة معمرة كما يدعي البعض
في الحقيقة لا ... طب ازاي يا عمنا عايشه كل ده .... اقولك
اولا هيا مش معني انها بتمشي انها عايشه
سبب بقائها انها بتنتج حتي اليوم وقطع غيارها متاحه للي عاوز يغير او يسقط ماتور حتي
بص يا باشا سوق السيارة دي ساعتين وبعدين سوق فيرنا ساعتين وشوف انهي حتكون تعبان
وراجع موضوعي في الرابط التالي
http://www.nilemotors.net/Nile/397307-a.html
والخيار ليك نفسك ومالك وانت حر فيهم
حرام عليكوا يا جماعة ... كرهتوا الراجل فى العربيه قبل ما يشتريها
ليه بس كده
أنا عن نفسى لازم أنصحك لوجه الله و بينى و بينك لازم أقولك:
كلام الناس المحترمة دى هو عين العقل
اللادا محدش يشتريها زيرو, مستعمله و روسى كمان لو الفلوس معاه مقصرة شوية, إنما لو معاه ثمن العربيو زيرو يبقى أكبر غلطه يعملها إنه يشتريها
فكر فى أى عربية سعرها قريب
و تراعى فيها حاجتين بس هتلاقيها أحسن من اللادا
1- قطع الغيار متوفرة و رخيصه نسبياً
2- تقفيلها مش مصرى (حتى لو صينى)
كده إنت معاك عربية أحسن من مليون لادا
فية هجوم غريب على العربية انا متفق معاكم فعلا انو ميشترهاش زيرو ابدا اينا كانت الظروف بس باين كدا انكم نسيتو العربية دى زمان كانت عاملة ازاى و الرفاهية الى كانت فيها ايام الثمنينات و كمان قرنها كدا 128 شوف مين يكسب قرنها بعربيات جيلها شوف مين يكسب و مع كل الكلام دا انا مش بقول يشتريها بس فية هجوم عليها شديد دى عربية ب 60 الف عاوز منها اية بس انا لو مكانك اشوف فيرنا لانوس نوبيرا هتلاقى حالات نضيفة اوى بلسعر دا و ممكن اتوماتك كمان و تبقا فى منتها الراحة احسن من وجع الدماغ
لادا ايه يا باشا اللى حضرتك عايز تجيبها زيرو .. حضرتك لازم تراجع نفسك كويس .
لادا وزيرو حرام عليك صحتك
لو فلوسك قليله وهتشترى مستعمل انصحك ... ابعد عن ال لادا
( معايا لادا 2007م )
لو بتفكر تجيبها زيرو ... يبقي بلاش اتكلم
بس اللى نصحك بكده متبعوش تانى فى اى حاجه متعلقة بالعربيات
زود وهات الانفى جديده وهات الصينى مش المصري
و رقم 2 و مش هتجيب الانفى يبقي تجيب البي واى دى
ربنا هو الموفق
مكرر
ههههههههههه
الراجل يا عيني صاحب الموضوع اول مرة يكتب في المنتدي هنا
ولسه بيقول احم احم يا ساتر وبيسأل سؤال بريء
اتفاجيء بحرب الفرولة وطماطم بتحدف من كل حته وسيول وضلمه وزعابيب
انا اسف يا استاذنا صاحب الموضوع علي الهجوم الشرس ده
بس والله دي الحقيقة
عارف اعلان شيكولاتا كابوري لما بيقولك حينما تعشق الشيكولاته
اهو اللادا كدا بالظبط بس بيقولك حينما يعشق المرار الطافح ...ههههه
احنا مع حضرتك لحد متجيب افضل خيار ان شاء الله
واسف مرة تانيه
كلام الناس دى كلها محترم جدا وانا عن نغسى بقولك بلاش بس للامانه انا كان معايا لوجان زيرو 2012 جميع الكماليات وبعتها وجبت ﻻدا روسى كسر زيرو والحمد لله مش ندمان،فرق كبير ياباشا من انك تركب دبابه والناس تخاف منك وماتخافش من قطع غيار وﻻ سمكره ولا حتى ميكانيكى يقولك مابفهمش فيها وانك تركب حتة ورقه تخاف من عجله تخبط فيك وتكلفك شىء وشويات وﻻ مطب واحد حاطه ادام بيته وماشفتوش وانت ماشى يكسرلك المقص وتلاقيه بالف جنيه وﻻ سواق تكتك معندوش دم يكسرلك الفانوس وتروح تجيبه ب500 جنيهوﻻ حتى تروح التوكيل تغير بوجيهات وزيت وفلتر هوا وتدفع الف جنيه وغصب عنك ﻻزم تروح عشان الضمان،كل حاجه ياباشا ليها مميزات وعيوب،انت اللى تحدد وانت اللى تحسبها،شوف الطرق بتاعتك وحدد فلوسك وواستخدامك الراحه مهمه وﻻ ممكن تستغنى عن جزء فى مقابل حاجات تانيه،احسبها كويس من كل ناحيه واسال كويس واستخير ربك واتكل على الله،فيه ناس بتجيب سيراتو وتبقى طايره بيها السما واول ماتتخبط ويروح التوكيل يلاقى نفسه هيدفع فوق العشرين الف يقولك ياريتنى جبت 128 ماهو كله بيوصل ،روح ياباشا اى توكيل واسال اى واحد عربيته مخبوطه احساسك ايه وشوفه هيدفع كام
لو الفلوس مش مكفية معاك يا اما تشترى حاجة مستعمله بس تكون نضيفة و دور و حتلاقى يا اما استنى شوية بدل ما تدبس نفسك فى كارثة مش حتعرف تطلع منها
ارجوك .... اتوسل اليك ...والله انا عنيت اشد المعاناه من العربيه دى وكنت جايبها زيرو يا راجل يا محترم ده ضمانها سنه او 10 الاف كيلو متر اه والله تخيل يعنى لو جايب موبيل صينى هديك ضمان اكتر من كدا ... انفد بجلدك
متجبهاش زيرو
عايز رأيي اتكل علي الله و هاتها اي عربية زيرو في مصر كويسة ما عدا الصيني يبأه ندور علي قطع الغيار مناسبة الثمن وندور علي المصنعيات الرخيصة لوخايف اوي من سمعة الادا الوحشة زود وهات فيرنا لو معكش يبأه لادا