الموضوع: تقييم أوكتافيا a7 بعد حوالى 5800 كيلو و مقارنتها بالسيفيك 2007 و بى ام e90 2008

ما شاء الله ربنا يبارك لك فيها .. الفنتازيا فضلت في حاله غريبه معاها ..كانت مريحاني جدا لحد ما بعتها و ندمت بغرض التجديد ..
تحياتي

تقرير مفيد جدا
جزاك الله

الف الف مبروك. ربنا يباركلك فيها و يسترها معاك

انا ركبتها كذا مرة هى ما شاء الله بس بالنسبه للعفشه احساسها بالنسبه لى زى الايه فور

المشاركة الأصلية كتبت بواسطة CosmicOne

عربياتنا الفئه الاولى 2014 الى فيها الدركسيون بقا جلد

انا هكتب التقييم و لو فى اى اسئله حتى فى تفاصيل التفاصيل اسئلوا عادى , انا كده كده من النوع المحسوك اوى فبلاحظ دبه النمله فى العربيه للأسف :)

الموتور
لا يقارن طبعاً و لا بالسيفيك ولا بالبى ام خالص
ولا فى الأداء و لا فى استهلاك البنزوين

التربو مش مجرد 0 - 100 بس , التربو فى السواقه العاديه فوايدو انك بتشد على اى نقله لحد السابع عادى جداً
لو محمل ناس و تكييف و الشنطه مفيش أثر زى العربيات الى مش تربو , يعنى بتسوق عادى جداً مبتحسش بكل ده

طيب لو سايق ملمس على الدواسه و التربو شبه مبيشتغلش بتبقى موفرة بنزين جداً جداً
انا مشوارى يومياً مدينة نصر - القريه الذكيه عن طريق الدائرى

من غير شد و اى ان كانت السرعه ممكن اوصل و الكمبيوتر قارى 5 و كسور ليتر لكل 100 كيلو

طبعاً مع التربو و الضغط جامد على الدواسه بتشرب البنزين :)

التكييف
فوجئنا انو كويس جداً و لله الحمد حتى اجسن من بتاع الهوندا

الInfotainment system
من الكاسيت و الشاشه الى بين العدادات رائعه و فيها اغلب ما تحتاج اليه و زياده

الوسع و الشنطه انتو عارفين

العفشه
ناشفه و بتعمل ساعات اصوات مش عارف ليه بالذات ورا , يمكن بدأت دلوقتى تبقى احسن شويه مع الوقت بس مازالت نشفه
اصوات زى نبضات عاليه فى الحفر و ليها ايام تحس انها مخلعه شويه

الفرامل
قويه جداً لله الحمد علشان العربيه خفيفه كمان عن الفانتازيا فالفرامل كلبشه زى الفرنساوى كده من اول ما تلمس الدواسه

الثبات
فيه مشاكل و دى و حاجه تانيه هذكرها اكتر عيب مكناش متوقعينه فى العربيه انا و ابن خالتى
العربيه فعلياً بتلعب مع الرياح الجانبيه و بتلعب من الخلف بالذات مع الطريق :(
الدركسيون ناعم اوى و sensitive جداً و مفيهوش dead center خالص يعنى سنترتوا صعبه و حركتوا متواصله على طول محتاج inputs & correction من السواق بشكل ممل جداً

الغريبه ان العربيه احساس السرعه فيها منعدم مقارنة حتى بالبى ام يعنى انت فجاًه بتبقى 200كيلو عادى جداً بس العربيه بتتمرجح مع الهوا الجانبى و اطلع على محور N/A و حاول تفضل فى track بالعافيه

حتى الأن مش عارفين حل للموضوع ده و بسأل بره على موقع بريتش سكودا و بردوا محدش عارف حل بس العربيه فعلاً كبيره و عاليه و خفيفه

الفتيس
ناعم جداً فى نقلاته و سريع طياره فى النقل و المودز الى فيه رائعه
الخشونه الوحيده فيه لو طالع الاول او الرجوع للخلف و فيه عائق او مطلع بيخشن شويه لحد ما يطلع

العزل
ارض و موتور تحفه لله الحمد
المشكله التانيه بقا الغريبه عزل الصوت الخارجى
ضايع
لو واقف زيرو و مقفل كل حاجه تسمع بوضوح لو عدى جنبك ناس بتتكلم او موتوسيكل او عربيه نقل و تلاقى ايدك لا ارادى راحت لزراير الأزاز تتأكد من قفلها

ابن خالتى لاحظ ان الزجاج رفيع جداً جداً مقارنة بالبى ام و ده فعلاً حتى مقارنة بالألنترا الكورى و الأزاز الأمامى ضعيف تنين مقارنة لاسيفيك و البى ام و اخدنا انا و هو زلطه و عملت شروخ فعلا فى الأزاز
حاجه محصلتش معايا فى الهوندا مع ترزيع طوب و زلط على الدائرى حوالى 6 سنين.

الخلاصه العربيه حلوة جداً ما شاء الله لو بتمشى على 100 الى 120 فهيا برفكت مش مجرد حلوه بس
الأوبشنز الى فى اول فئه بصراحه متخليكش محتاج تتدفع فى الفئات الأعلى.

اوبااااا انا كده هبدأ اشك في الشاسيه ال MQB انا معايا الجولف7 وتعليقي هنا على الاصوات اللي ورا عندي برضه وانا بحسها زي صوت water bubbling كده وواحد اعرفو اشتكى منها في الاوكتافيا الجديده يا ترى ايه الحكاية؟؟؟
عامة الف مبروك يا كبير وربنا يهنيك بيها...
وتقرير ممتاز...

المشاركة الأصلية كتبت بواسطة CosmicOne

ممكن اضيف كام معلومه للملاك :)

اولا وانت واقف و مدور هتسمع صوت تكتكه غريبه من الموتور بس صوتها واطى
لا تقلق ده طبيعة صوت ال direct fuel injectors الي في الموتور ده و اسمع انها في الكوري زي الgdi اعلى بكتير جدا

من حلولها كفر موتور فولكس cc معرفش بيتباع في مصر ولا لا بيكتم صوت الانجيكتورز ببطانه عازله

ثانيا الدي اس جي بيوصل لاحسن نعوميه لما العربيه بتسخن مش اول ما تطلع فبراحه عليه اول المشوار

ثالثا مهم او للحفاظ على التربو عندك حرارة الزيت في الشاشه الوسطنيه
متحرقش خالص قبل ما الحراره دي تبقي ٨٠ درجه مهم اوي للحفاظ على الشاحن التوربيني و تزيتوا كويس

و ميعديش الحراره ١١٠ حسب سكودا و ١٣٠ اقصى حاجه حسب فولكس
لو وصلت للحراره دي متحرقش على الغيارات و امشي عادي بس

لما تقرب من نهاية مشوارك هدي السواقه و اقف شويه بعد ما تركن لحد ما حرارة الزيت توصل حوالى ٩٥ او اقل و بعدين اطفي المحرك
مش كويس اوي انك تطفي و الحراره ١٠٠ مثلا ولا حاجه

المعلومات دي مجمعه من مواقع للgolf r و gt و الحاجات دي من ناس غاوية سواقه و فاهمين في التربو و الحوارات دي :)

تخيل انا قلبت النت عشان اي معلومات عن ال oil temp وملقتش حاجه مفيده بجد تسلم على المعلومات القيمه وعلى الفكره الحراره.في العادي نادرا جدا لما بتعدي ال 100 او 105 بتحصل في حالات الضغط المتواصل على العربيه ووصلت معايا اعلى حاجه 117 بس ده عشان كنت بعصر العربيه عشان اجيب توب سبيد ووصلت 223 كم...( ;