اخيرا تم عمل سقف السيراتو
الحمد لله تم عمل سقف السيارة بعد مضى شهرين من عطلها لفت بيها عند كل البشر فى الهرم والجيزة ...اولا كان عندى سقف السيارة فجأة لايتحرك امام او خلفى قلت يمكن محتاج تزييت او شحم برضة مفيش فايدة قلت افك الزجاج العلوى بنفسى وفعلا فكيتة وكانت الصدمة يوجد الدراع الشمال مكسور ولا يتحرك اطلاقا والماتور شغال على الفاضى ولا يسحب.. المهم قلت ادور على الدراع المكسور لفيت كتير كتير كمان مفيش دراع بيتباع لوحدة لازم تشترى السقف كلة وبكام ياريس من 5 الى 6 الاف جنية حتى فى التوكيل فى ابو رواش قالولى هيتكلف فى حدود 6الاف جنية وهيشلو السقف كلة ويركب واحد جديد ..قلت كل دة علشان دراع واحد مكسور امال لو السقف كلة مكسور يعمل كام..المهم ربنا رزقنا بواحد بتاع ابواب وسنتر لوك وانذار ومفاتيح يعنى قول بيعمل اى حاجة شاف السقف وقال هعملة ازاى ياحاج قال هاتى العربية من الصبح علشان هتاخد وقت جامد فعلا كنت الساعة عاشرة عندة وفك السقف كلة من تحت ومن فوق يعنى فك فرش السقف الداخلى وطلع فتحة السقف كلة خارج العملية وعمل الدراع المكسور وقعد يلحم ويسنفر ويظبط يجى 6 ساعات لحد السقف متظبط وبقة 100% وعفوا للاطالة