بلاش كراك ولا باتشات و استعمل الاوبن سورس

السلام عليكم و رحمة الله و بركاته

حبيت اترك بصمة قبل ما اتغيب فعملت الموضوع دة

عارف ان الموضوع مش مكانه هنا لكن بدانا نشوف برامج في المنتدى الاجتماعي كلها مقرصنة
فحبيت انقل الموضوع دة

الموضوع يتلخص في اننا لازم نبطل استخدام البرامج المقرصنة و نتجه للاوبن سورس اي البرامج المجانية المفتوحة المصدر

انا ناقل الموضوع بكل امانة و البرامج كلها محطوطة في ملف pdf و اللينك بتاعه هــــــنــــــا دة لو عايز تنزله

و لو عايز تشوفه اون لاين بس هيبقى تقيل (الملف 78 صفخة) هــــــنــــــا

لو عايز تنزله بصيغة OTD هــــــنــــــا

المصدر منتديات عرب هاردوير (لمشاهدة الموضوع اضغط هنا)

احييك يا مودي و اتبني وجهه نظرك
كفايه بقي ويندوز و بلاوي الويندوز بالمره كمان
انا بحتقر اي مؤسسه خاصه و جميع المصالح الحكوميه اللي بتستعمل الويندوز
يعني مكنش فيه بني ادم بيفهم يقولهم علي اللينوكس مثلا؟؟
تلاقي الكمبيوتر بيهنج او واقع 24\7
و مصالح الناس تتعطل
و البركه في اسم النبي حارسه الويندوز
لاء و اللي يجنن
ينزل الفيستا بكل بلاويه و مش بس كده
يتطلب تشغيله شراء هاردوير غالي
يعني انت و فلوسك تحت امر الخواجه بل جيتس
http://www.metacafe.com/watch/684964...ux_commercial/
http://www.metacafe.com/watch/434675..._ubuntu_beryl/

http://www.metacafe.com/watch/863051...mile_to_linux/
http://www.metacafe.com/watch/304403...p_tricks_ever/
http://www.metacafe.com/watch/516667/ibm_ad/
اتمني ان اللينكات تعجبكم
,و يا ريت الناس تفكر تجرب اللينوكس

انا بستخدم اللينكس دلوقتي بعد ما شوفت قررف الفيستا

كل شوية
windos exploler has stopped working
windows side bar has stopped working
fire fox has stopped working

و الجهاز يهنج و اكتر من مرة الويندوز وقع رحت قلت اجرب لينكس لاقيته خفيف و جميل جدا

طب يا مستخدمى و مشجعى اللينكس
ما هو مدى توافقه مع معظم البرامج التى تعمل لدينا
----------
ما هو ما ينفعش لو مش متوافقة الزم مديرى مثلا كل ما يبعتلى ملف وورد او اكسل انه يغيرة علشان مش هايشتغل عندى
او انى اعمل حاجة حلوة اوى ببرنامج سمارت درو
---------------------------
كمان فى مشكلة بالنسبة لى بالنسبة للينكس او اى اوبن سورس مشابه
انه لينكس رد هات و لينكس ابص ايه
و كل شوية نسخة 1.2.0
و بعديها 1.2.5
طب اشتغل بأيه
------------
افيدونا افادكم الله
اصل الموضوع مبهم شوية

برامج الاوبن سورس مصممة في الاصل لللينوكس و تم تعديلها لتعمل مع باقي انظمة التشغيل

و ملفات اللورد و الاكسل بتشتغل عالاوبن اوفس عادي

بالفعل تحديد نسخة اللينوكس المناسبة لجهازك مشكلة لانه فيه سخ كتير جدا و انا بستخدم 1.2.0

و مفيهاش مشاكل بس المشكلة انه في برامج مبتشتغلش عليه دة اللي خلاني اتجه للاوبن سورس لانه مصمم في الاصل لللينوكس

اي استفسار انا في الخدمة

افضل واسهل نسخ لينكس للمبتدئين هى Ubuntu
http://www.ubuntu.com
وعلى فكرة متصدقش اللى بيقلك انها صعبه محتاجهع تعود
ودة موقع فيه بدائل لمعظم البرامج العامله على الوندوز وبديلها للينكس
http://www.linuxalt.com/
النسخه الحاليه هى 8.0.4
ولو نزولتها ونل بعديها نسخه السيستم بيعمل لنفسه تحديث لوحدة

http://www.nilemotors.net/Nile/image...ine=1200982490 Dr_Mido
شكرا عاللينكات بس ايه نظام التشغيل اللي انت بتستخدمه؟

انا شغال على Ubuntu

انا دلوقتي بنزل اوبونتو و هجربه

طبعا لمستخدمى اللينكس لأول مرة هتتعب كتير جدا عقبال ما تتأقلم مع النظام أنت وصبرك.
بغض النظر عن الويندوز واللينكس ، أنت فى النهاية كمستخدم محتاج نظام يكفى احتياجاتك.

لو نسخة الويندوز عندك كويسة و كل شغلك ميديا وتصفح الويب وجيمز يبقى خليك ويندوز أحسن ومفيش داعى تضيع وقت فى تعلم نظام جديد كل وظيفته محاكاة شغلك على الويندوز لكن بطريقة مختلفة ، يعنى فى النهاية ستحصل على نفس الوظائف التى يقوم بها ويندوز بدون أى فارق يذكر لكن بطريقة مختلفة.

إنما مؤسسات حكومية شغالة بويندوز دى حاجة مسخرة الحقيقة.

اللينكس نظام ممتاز للناس اللى جهازها تقيل وإمكانياته قليلة ، لأنه بيستهلك موارد قليلة وسريع الاستجابة جدا ً ونادرا ً لما بيعطل ، مشكلته الوحيدة إنه صعب التكيف معاه فى الأول بس خاصة لو كنت مخضرم ويندوز.

انا استخدمت البونتو فترة لا بأس بها ، وكنت متحمس وصبور جدا ً بس فى الآخر اتخنقت ، طبعا عجبنى جدا ً فى الأول ، بس فى الآخر لاقيت إنه نفس الوظائف اللى كان بيقوم بيها الويندوز هى اللى انا بعملها بالبونتو بس بطريقة مختلفة ، وطبعا عشان اعرف الطريقة المختلفة دى لازم أسأل ، وكل مشكلة اروح اعمل موضوع فى الفورم المختص وأستنى الإجابة ، طبعا غير الوقت والمجهود الضائع فى القراءة عن كيفية استخدام النظام ، فبدل ما كان الواحد بيصطب كارت الشاشة بالطريقة الفلانية عالويندوز لأ فى الأبونتو لازم تحور كدة عشان توصل لنفس الهدف ، المهم فى الآخر خالص لما لاقيته مش بيشغل جيمز معينة اتخنقت وجبت آخرى خاصة إن ال .NET مكنتش شغالة هى كمان وكان فيه طرق معقدة للتحايل على النظام عشان يشغل ملفات ال exe طب ما تريح دماغك وتخليك فى الويندوز أحسن.


أنا عامة مش مستخدم فيستا لأنى مش بطيقه من ساعة ما نزل وعندى ويندوز اكس بى سيرفيس باك 3 آخر واحدة ومبسوط منها جدا وكل حاجة شغالة ميديا/صور/أفلام/برامج/ .. الخ من لغات برمجة والكومبايلرز ومن غير مشاكل ولا تعليق.

طبعا كل دة موجود فى لينكس بس بطرق معقدة انا استرخمتها جدا ً ، يعنى انا مثلا عشان اشتغل بالسى شارب عاللينكس فى الأول اتقالى إن مينفعش تكتب سى شارب كود عاللينكس بعدين اتقالى لأ دة فيه مشروع مش عارف ايه كدة عشان يحاكى بيئة الدوت نت ، وبعدين دخلت عملت سيرش لقيت حوارات كدة واتخنقت وأنا فى الويندوز أصلا عندى الفيجوال ستوديو أيزو فايل مفيش نص ساعة ويكون متصطب وجاهز للتطبيق.

لينكس نظام قوى جدا ً وأكيد أقوى من ويندوز وكلامى مش معناه إن ويندوز أفضل ، بالعكس لينكس افضل بكتير ، المسألة كلها أنت عاوز ايه وهتاخد ايه من النظام وشكرا ً.

آه بالنسبة للبرامج ...

أنا أى برنامج أحتاجه بنزله من www.torrentz.com أو بدور فى جوجل اسم البرنامج (مسافة) rapidshare.com ، بجيب البرنامج جاهز بالكراك مش بحتاج أدور على كراك ، مش شايف أى مشكلة فى الكراكات والباتشات دة الموضوع مبياخدش أقل من دقيقة فى تصطيب الكراك أو الباتش.

لا طبعا الكراك فيه مشكلة يعتبر سرقة للشركة لانك بدل ما تدفع مبلغ في البرنامج بتاخده ببلاش
على فكرة الكراكات دي منعت ان بعض الالعاب متنزلش عالكمبيوتر لانها سببت لهم خساير مادية مقارنة مع مبيعاتهم للبلاي ستيشن و الاكسبوكس

الا تعتبر هذه سرقة

بص انا مقتنع بيه لسببين اولا انا كهوايه ماسك كذا سيرفر وانظمتها كلها ليتكس
على فكرة سطر الاوامر انت لو عرفته هيبقى اسرع من الماوس
واهم سبب انه اامن من الوندوز من هنا لكمان 50 سنه
ملوس اساسا لا برامج تسريع ولا برامج انتى فايرس
ولا فاير وول دة بيبقى تطبيق اضافى لو تحب تشغله
نسب تامين عاليه جدا
محتاج خبرة عاليه جد برضه علشان تقدر تخترقه
مبيقعش كتير زى الوندوز
بتبقى عارف النظام بالكامل مكتوب ازاى وبيعمل ايه وبيبعت من جهازك ايه لان اتحدى ان كان اى حد عارف الوندوز بيبعت ايه من جهازة للشركه
تحديث دورى ومستمر ومش محتاج انك تنزل السيستم تانى
لا اى تحديث بتظهرلك رساله بيحمل التحديث ويععمل ريستارت ومبروك عليك الاصدار الاحدث
هتخلص من مشكله الباتشات و الكركات


عيوبه
صعب شويه التعامل معاة اول مرة
مبيعتمدش على الماوس برضه فى جزء بيتقضيه انت اوامر مكتوبه
مش بيدعم كل الهارد وير للاسف
فى برامج معينه ملهاش بديل فعال
ودى مقولتى لمفضله
وعموما هو ليه ميزة مهمه جدا من هنا لبكرة هو انك ممكن تحطه على اسطوانه وتعمل بوت منها هتلاقى السيستم شغال معاك عادى جاد اكنك مصطبه
تانى حاجه ممكن يتصطب على نسخه وندوز موجودة ويتشال عاادى زيه زى اى برناج
مقولتى المفضله:thinking::thinking::thinking:
Linux For Server | Mac For Graphic | Windows For ٍٍٍٍٍSolitaire

بدون تعلييييق




http://www.postimage.org/aVKtuf0.jpg

اقتباس:

---

بدون تعلييييق




http://www.postimage.org/aVKtuf0.jpg

---

معاك حق بدون تعليق صورة موضحة كل حاجة

اقتباس:

---

المشاركة الأصلية كتبت بواسطة MTAK

طب يا مستخدمى و مشجعى اللينكس
ما هو مدى توافقه مع معظم البرامج التى تعمل لدينا
----------
ما هو ما ينفعش لو مش متوافقة الزم مديرى مثلا كل ما يبعتلى ملف وورد او اكسل انه يغيرة علشان مش هايشتغل عندى
او انى اعمل حاجة حلوة اوى ببرنامج سمارت درو
---------------------------
كمان فى مشكلة بالنسبة لى بالنسبة للينكس او اى اوبن سورس مشابه
انه لينكس رد هات و لينكس ابص ايه
و كل شوية نسخة 1.2.0
و بعديها 1.2.5
طب اشتغل بأيه
------------
افيدونا افادكم الله
اصل الموضوع مبهم شوية

---

مادام عندك النيه يبقي لازم تقرا و تدور علي النت, و في مئات السيتات شارحه الموضوع خطوه خطوه و ممكن تبدء تجرب بحاجه لايف (لا تحتاج تستيب و بعد ازاله السي دي كل شيء يرجع كما كان الا الملفات اللي عملتها او مسحتها) و من النوع ده ارشحلك ال knoppix
[quote=IslamGen2;440288]طبعا لمستخدمى اللينكس لأول مرة هتتعب كتير جدا عقبال ما تتأقلم مع النظام أنت وصبرك.
بغض النظر عن الويندوز واللينكس ، أنت فى النهاية كمستخدم محتاج نظام يكفى احتياجاتك.

ة ، يعن لو نسخة الويندوز عندك كويسة و كل شغلك ميديا وتصفح الويب وجيمز يبقى خليك ويندوز أحسن ومفيش داعى تضيع وقت فى تعلم نظام جديد كل وظيفته محاكاة شغلك على الويندوز لكن بطريقة مختلفى فى النهاية ستحصل على نفس الوظائف التى يقوم بها ويندوز بدون أى فارق يذكر لكن بطريقة مختلفة.

إنما مؤسسات حكومية شغالة بويندوز دى حاجة مسخرة الحقيقة.

اللينكس نظام ممتاز للناس اللى جهازها تقيل وإمكانياته قليلة ، لأنه بيستهلك موارد قليلة وسريع الاستجابة جدا ً ونادرا ً لما بيعطل ، مشكلته الوحيدة إنه صعب التكيف معاه فى الأول بس خاصة لو كنت مخضرم ويندوز.

انا استخدمت البونتو فترة لا بأس بها ، وكنت متحمس وصبور جدا ً بس فى الآخر اتخنقت ، طبعا عجبنى جدا ً فى الأول ، بس فى الآخر لاقيت إنه نفس الوظائف اللى كان بيقوم بيها الويندوز هى اللى انا بعملها بالبونتو بس بطريقة مختلفة ، وطبعا عشان اعرف الطريقة المختلفة دى لازم أسأل ، وكل مشكلة اروح اعمل موضوع فى الفورم المختص وأستنى الإجابة ، طبعا غير الوقت والمجهود الضائع فى القراءة عن كيفية استخدام النظام ، فبدل ما كان الواحد بيصطب كارت الشاشة بالطريقة الفلانية عالويندوز لأ فى الأبونتو لازم تحور كدة عشان توصل لنفس الهدف ، المهم فى الآخر خالص لما لاقيته مش بيشغل جيمز معينة اتخنقت وجبت آخرى خاصة إن ال .NET مكنتش شغالة هى كمان وكان فيه طرق معقدة للتحايل على النظام عشان يشغل ملفات ال exe طب ما تريح دماغك وتخليك فى الويندوز أحسن.


أنا عامة مش مستخدم فيستا لأنى مش بطيقه من ساعة ما نزل وعندى ويندوز اكس بى سيرفيس باك 3 آخر واحدة ومبسوط منها جدا وكل حاجة شغالة ميديا/صور/أفلام/برامج/ .. الخ من لغات برمجة والكومبايلرز ومن غير مشاكل ولا تعليق.

طبعا كل دة موجود فى لينكس بس بطرق معقدة انا استرخمتها جدا ً ، يعنى انا مثلا عشان اشتغل بالسى شارب عاللينكس فى الأول اتقالى إن مينفعش تكتب سى شارب كود عاللينكس بعدين اتقالى لأ دة فيه مشروع مش عارف ايه كدة عشان يحاكى بيئة الدوت نت ، وبعدين دخلت عملت سيرش لقيت حوارات كدة واتخنقت وأنا فى الويندوز أصلا عندى الفيجوال ستوديو أيزو فايل مفيش نص ساعة ويكون متصطب وجاهز للتطبيق.

لينكس نظام قوى جدا ً وأكيد أقوى من ويندوز وكلامى مش معناه إن ويندوز أفضل ، بالعكس لينكس افضل بكتير ، المسألة كلها أنت عاوز ايه وهتاخد ايه من النظام وشكرا ً.[/quote]

اسلام
واضح ان بعد الخبطه بتاعتك بقيت مفتري:confused2:
انهو نسخه ويندوز اللي بتتكلم عليها دي و تكون كويسه؟
كلهم بينزلو زي الفل و بعد كده بيمارسو الهوايه المحببه بتاعت بيل جيتس في اقتناء اكبر عدد ممكن من ال spyware adware viruses malware ده غير الاصرار العجيب علي الريستارت لو عيل صغير عطس جنب الجهاز
و التهنيجات و الكراشات المزمنه و كل اللي يقولهولك البرنامج الفلاني عمل غلطه و لازم ريستارت و يقوم كافي علي الخبر ماجور
انما حاجه زي كده تحصل في بيئه اللينوكس مستحيل نظرا لطبيعه عمله و فصله التام للكرنل عن باقي البرامج بالعربي كده مينفعش جهازك يهنج حتي و انت فاتح 150 برنامج(موجود فيديو علي اليو تيوب)
غير امكاناته الخرافيه فيما يتعلق بالجرافكس و اسلوب اداره الديسكتوب بص انا الكمبيوتر عندي بقالو 6 سنين من غير ابجريد و اللينوكس شغلي ال3d ديسكتوب كامله (حاجه كده اروع من الديسكتوب بتاع الفيستا لما يكون عندك كارت شاشه 256 و رامات 2 جيجا!!)
فيمنفعش نقول ان اللينوكس بيحاكي الويندوز بطريقه مختلفه لأن اللينوكس تفوق و سحق الويندوز (و دلوقتي في اصدارات تعتمد كليا تقريبا علي الgraphical user interface )
و تنوع الاصدارات من اللينوكس ده ميزه لأنك ممكن تختار من بين مئات النكهات بدون اختلافات تذكر في طرق التشغيل
ده غير انه مش بيحتاج ريسارت مهما ان عملت و ممكن يفضل شغال سنه او اتنين بطريقه متصله دون اي حاجه لريستارت( ايه اكبر مده قدر الويندوز يستحملها تشغيل متصل قبل ما يطلب رصاصه الرحمه بتاعته"الريستارت" انا عندي قعدت مره 6 ايام بس)
و بعدين لو ملقيتش حاجه بديله عن برنامج معين في الويندوز و مزنوق فيه قوي ممكن تستخدم برنامج الwine و ده بيحاكي نظام تشغيل الويندوز من غير ما تشيل هم التستيب و العيوب بتاعت الويندوز
و لو علي الجيمز فاللينوكس بيشغل world of war craft wow بدون اي مشكله(ابحث في اليو تيوب) و دي من اللعب اللي اشاع عنها ان اللينكس عاجز عن تشغيلها
انا عارف الاحباط اللي بيواجه مستخدمي اللينوكس الجداد و معاهم حق لأن افتقاد سياسه كليك كليك دبل كليك و فنش دي بتحير في الاول
لكن بعد ما تقرا شويه عن كيفيه التعامل معاه و بالممارسه بتلاقي نفسك بتستفيد يوم ورا يوم و بتاخد خبرات رهيبه في الكمبيوتر لأن كل حاجه بتعملها في اللينوكس بتاخدك خطوه للامام في عالم البرمجيات المتقدم
مش تلاقي يوزر ويندوز فاكر نفسه تقيل في الكمبيوتر و كل اللي يعرفه هو كيفيه الضغط علي نيكست نيكست انستال فنش و تيجي تسأله عن حاجه بجد تلاقيه متنح
و هي دي مميزات الويندوز راحه و سهوله نسبيه يقابلها كراشات و عدم ثبات نظام التشغيل مع تعرض دائم للفيروسات و ده بيجبرك انك تحط برامج انتي فايروس تاخد من اداء جهازك و تذل انفاسك لاء و ايه كل شويه محتاج رامات او ابديت للجهاز علشان يتوافق مع اصدار جديد ممل من الويندوز
و بعدين انهو هاردوير مش سبورتد في اللينوكس؟!!
ده النظام الوحيد تقريبا اللي موجود فيه كافه الهاردوير القديم كله و الجديد بيتم تنزيل برامج ليه اولا بأول يعني مش هتغلب
و واضح من استخدامك ان بيئه البرمجه مهمه بالنسبالك و دي من اروع ما يمكن في اللينوكس, كل حاجه موجوده و مش محتاج توجع قلبك داونلودز و كراكات
اساسا في سايتات كتير قوي و مشهوره جدا بتستخدم لينوكس كسيرفر نظرا لرداءه و عدم اعتماديه الويندوز سيرفر
ده غير اجهزه كتير بتستخدمه كنظام تشغيل
بص اللينك حوالينا في اماكن كتير بس احنا مش عارفين
و الادهي من كده ان بيل جيتس اشتري suse novell و ده في محاوله لتحسين الويندوز , يعني البيه اخد حاجه كانت مجاني و اوبن سورس و بكره ينزلها و يدفعك عليها فلوس

اللى مش ناوى يتعلم سطر الاوامر فى اللينوكس هيتعب كتير، انت فى الويندوز بتلاقى حاجات تعملها من خلال ال GUI متعرفش توصلها من خلال ال command prompt. اللينوكس عكسها تماما، هتلاقى حاجات كتير لازم تعملها من ال shell،

اصل الويندوز (kernel) هو ال (GUI) لكن اللينوكس الاصل هو سطر الاوامر. شغلانة ال Desktop و الايكونات و الكلام ده كله برنامج شغال على سطر الاوامر يا تصطبه يا بلاش، لكنه مش الاساس.

انت فى اللينوكس لازم تجيب البرنامج اللى معمول مخصوص للاصدارة بتاعنك، و لو ملاقيتش يبقى مضطر تنزل ال (source code) و تبنيه انت، القصة دية بالنسبة لحد جديد ممكن تعقده فى عيشته و تخليه يهاجر المريخ.

من الاخر مش هيحس بقيمة اللينوكس الا اللى حابب البرمجة او شغال فى المجال ده، انا شخصيا بعشق سطر الاوامر، ممكن بثلاث سطور اعمل اللى الويندوز هيعملهولى فى سنه. لكن برنامج ال Desktop زى KDE او GNOME رغم كل التطور اللى وصلوله لكن برضه بحس انه غبى شوية، و لازم فى الاخر تلجأ لسطر الاوامر.

بالنسبة لموضوع الكراكات انا ضدها تماما لأن ده سرقة.

مساهمة مني في تعريفكم باللينوكس أنا هاعرفكم على كتاب رائع بالعربي عن اللينوكس
دوس هنا

يا رب يعجبكم

على فكره أنا شغال لينوكس من سنة 2004 وزي ما إنتم شايفين أنا لسه عايش اهه :) والحمد لله باقدر أعمل كل حاجه تلزم المستخدم العادي من تشغيل أفلام وصوتيات وتصفح وشات وخلافه.

د. أمير

من ردود حضرتك انا شايف ان كاره بيل جيتس شخصيا والاخوة الاشقاء في مايكروسوفت وتكاد تساهم في شركة ريد هات او اوبونتو (بهزر)

الموضوع مش تحيز لشركة على شركة أو منتج ضد منتج

لو مكانش ويندوز نظام تشغيل محترم وثابت مكانش يبقى موجود على اكتر من 80% من الاجهزة (الشخصية) في العالم

وخلي بالك من حتة الشخصية دي

المستخدم يهمه ايه في الاخر
نظام يلبي احتياجاته
سماء كانت شغل او بيت
وده اللي ويندوز بيديه


بيل جيتس أو خلينا نقول مايكروسوفت ناس بتعرف تفكر ةتستثمر افكارها وتتطور افكار غيرها
ليه ماك مش شايع
لأن الشركة محتكراه
مش اي حد يعرف يطور برامج ليه (دي كانت استراتيجيتهم في البداية ) وكان نظام التشغيل بتاعهم مايشتغلش غير على الهاردوير بتاعهم ( مؤخرا داوا يغيروا النظرة دي)


اي بي ام عملوا نظام اسمه OS/2 لو حد يوعى عليه

كان من افشل المشاريع في تاريخ الـ IT

الاوبن سورس هو صوت العصر
كل الشركات من فترة بتدعمه بشكل او بآخر


وبرضه لسه فيه شركت كتير مش معترفة بالموضوع

هل فيهم حد غلط
لأ
دي وجهات نظر واستراتيجيات شغل

اباتش اللي عاملة Apache web server المجاني اللي مشغل 80% من مواقع الانترنت عاملاه اوبن سورس
اي بي ام خدته وعمل منه نسخه مخصصة ليها
بتبيعها وبتدي دعم ليها
سن Sun بتعمل نفس الكلام في حاجات تانية ومعظم الشركات ليها مشاريع مشابهة



طيب لو نقلنا لمكان تاني
الكومبيوتر في الأعمال اللي مش شخصي يعني


ليه الشركات مش بتحول لـ (لينكس)
مش هو ببلاش

لأ طبعا مش ببلاش

ممكن تاخد نظام التشغيل ببلاش

لكن الدعم الفني هتاخده تقريبا بسعر مقارب لويندوز ( الدعم الفني مش اني الاقي مشكلة ادور على حل ليها على الانترنت وممكن يمشى او لأ . الدعم الفني اني لما تظهر لي مشكلة الاقي خبير يعرف يحلها لي في اقرب وقت)

التمن اللي بتدفعه في نظام التشغيل ده (Capex)

Capital Expenses يعني
المحاسبين يفهموا اكتر مني في الموضوع ده

اللي اقصده انه عندك في رأس مالك/رأس مال شركتك

طيب امال ايه بقة اللي بتفعه في الدعم الفني
اسمه (Opex)
Operational Expenses
يعني مصاريف تشغيل
ودي واحدة في الاتنين
ان مكانش الاوبن سورس اغلى

ده اللي مخلي معظم ان مكانش كل الشركات بتعتمد على ويندوز كنظام تشغيل المستخدمين عندها

وأقدر اقولك اني معرفش غير شركة واحدة بس في مصر عاملة لينكس نظام التشغيل الرسمي للمستخدمين

وبرضه اقدر اقولك ان المستخدمين دول من افضل مهندسين مصر يعني مش مستخدمين عاديين


نيجي بقة للحتة اللي هوافقك فيها بس مش قوي برضه

ٍServer system
خوادم الاعمال يعني

السيرفرات اللي شايلة اي شغل
اقدر ابصم لك هنا ان ويندوز مش كويس (وان كان ويندوز 2008 هيكون حاجة تانية خالص كما قرأت)

مايكروسوفت بتنزل تحديث / ابديت كل كام يوم
مافيش شغل محترم يستحمل الهرجلة دي
وانزل التحديث يضرب لي حتة تانية (اجيب قميص طلع جاكتة على رأي وجيه عزيز)

الشغل اللي بجد عايز UNIX بنكهاته وانواعه المختلفة

هنا بتبرز قوة اللينكس كنظام تشغيل للاعمال (الصغيرة) وممكن نقول برضه المتوسطة

س برضه مش اجمد حاجة

هيجي فين جنب الوحوش اللي بفلوس (فلوس كتييييييييييييييييييييييي ييييييييييييير قوي )
HP-UX
IBM AIX
SUN SOLARIS
نظام اللينكس مبني على نفس اسس نظم التشغيل دي مع فوارق لصالح نظم التشغيل انها بتشتغل على هاردوير معين فتبقى Optimized لأنها تستخدم كل فتتفوته في المعالج والميموري ومساحات الخزين الخ الخ الخ


انا شايف ان لينكس وصل لمرحلة التشبع
بمعنى ان الفترة اللي كان المستخدمين بالالف مش هقول ملايين بيهاجروا من ويندوز لـ لينكس انتهت

احنا في مرحلة ان كل نظام ليه مستخدمين اللي راضيين بميزاته وعيوبه وان كان فيه ناس بتحول بس مش اعداد خرافية

ده راجع لأن مفيش افكار ثورية جديدة في نظم التشغيل

الموضة اليومين دول الامان تلاقي كله شغال عليه
اليومين اللي فاتوا التكامل مع الاانترنت كله يعمل نظام تشغيل قريب من الانترنت وبرامجه بتحدث نفسها ونظام التشغيل نفسه بيساعد على كدة


اخيرا فيه لاعب جديد نازل السوق
لاعب مفترى ومش سهل وافكاره دايما ثوريه

جووجل

اي نعم
شغالين ليل ونهار في تطوير نظام تشغيل جديد

اللي قرا الكتاب بتاع جووجل كروم (عايزة خلفية مطور برامج علان تستمتع بيه) هيعرف قد ايه الناس دي مجانين / عباقرة وافكارهم مهوله وثورية فعلا