مشروع شركة تصدير

**dedi** · 22-04-2014 01:44 PM

المشاركة الأصلية كتبت بواسطة ahmedtalat

عظيم جدا - بس يا ترى مفيش حد هنا فى المنتدى عنده شركة تصدير او حتى بيشتغل فى شركة تصدير؟؟

يا باشا انت مستنى حد ينصح او يفيد دة بقى شئ نادر الايام دى كل واحد مصلحتة و موش عاوز يفيد حد وبيخاف احسن تقاسمة فى رزقة او نصيحتة لك سوف تخسرة عملاء او فلوس مافيش حد بينصح للة او بيستنى مكافئة من ربنا لانة نصح باخلاص انس يا باشا
جرب مع نفسك بعد دراسة الموضوع كويس و ابدا بحاجة قليلة
بس سؤال برئ لو ربنا و فقك و لعبة البلية معك هل سوف تنصح و تحكى تجربتك للاستفادة ها ها ها ها

**MaZaGAngeE** · 27-04-2014 04:13 PM

انا اتعملت مع شركات تصدير خامات تعدينية ....
عشان تعمل مكتب استيراد و تصدير ده مش صعب و كانك بتاسس شركة عادية بس هتزيد عليها :
1- تسجيل في هيئة المستوردين لو عايز تستورد
2- تسجيل في هيئة المصدرين لو عايز تصدر
و الاحسن انك تسجل الاتنين محدش عارف الرزق جاي ازاي ....
و بعد كده بتروح تاخد دورة 5 ايام في مركز الصادرات اللي في شيراتون عشان تطلع الرخصة

الاوراق سهلة و تكاليف استخراج الرخصة و الاوراق كلها مش كتير بس هتاخدلك بتاع شهر على ما تخلص كل الاجراءات و التراخيص و الموافقات بس الكويس انها في الغالب من مكان واحد هوه هيئة الاستثمار اللي في ارض المعارض ما عدا سجل المستوردين و المصدرين ده في شارع 26 يوليو تقريبا او في وسط البلد ...

بعد كده هتشوف الزبون اللي هيشتري منك ............ ده بقى اهم حاجة و عشان توصله ....
1- موقع انترنت
2- تشترك في مواقع التجرة الالكترونية
3- تدور على شركات الاستيراد في البلد اللي انت عايز تصدر ليه

بعد ما توصل للزبون ............. هتقابلك مرحلة الشحن البري لحد المينا و الشحن البحري لحد بلده ده بيكون على حسب الاتفاق ..
يعني انت ممكن تبيع المنتج على ارض المصنع او تبيعه واصل المينا في مصر او واصل المينا عنده ..

طبعا شركة الشحن هتطلب منك فاتورة و شوية اوراق كتير انت كنت عاملهم في التراخيص و تفويض ليهم ... و كمان هيطلبوا منك شهادة امان للمنتج و دي ان بتاخدها من المصنع اللي انت شاري منه المنتج ولو معندوش بتجيبها من النت

ده كده ملخص سريع للموضوع كله

**Secret-Man** · 27-04-2014 04:27 PM

المووضوع بسيط باذن الله اول شيىء توكل على الله واستخير ربنا مره واتنين وتلاته قبل متقدم على شيىء

خد بالاسباب وافهم السوء كويس وسيرش على الانترنت كويس وجمع داتا لتجار فى مجال التصدير واعرف حجم التصدير هيكون اد ايه - شوف ازاى تقدر تحصل على تجار من دول اخرى الى هتستورد منك

الحاجه التالته تفهم الورقيات وقوانين التصدير فى بلدنا العزيزه يعنى مثلا ازاى تفتح ملف مصدرين فى الهيثه

ايه الدعم الى تقدر تاخده من الصادرات - لازم يكون حجم صاداراتك اد ايه - هل الصادرات اغذيه فهتحتاج تلاجه وتبريد للتصدير ولا هتشحن ااازى وهل الموضوع مكلف ولا لا لازم تحسبها كويس

**Anaslbda** · 27-04-2014 05:45 PM

.......

**ahmedtalat** · 01-05-2014 05:50 PM

يا ترى فى هيئات فى مصر ممكن تدعم موضوع التصدير بأ(المعرفه know how)
و تعرفنى على المستوردين فى البلاد التانيه؟؟

**أشرف فتحى** · 01-05-2014 06:23 PM

الموضوع كبير ومتشعب جدا.....

هقولك على نصيحه او اتنين يمكن تستفيد منهم حاجه....

سهل جدا انك تفتح شركه تصدير...

بطاقه ضريبيه وسجل تجارى وسجل مصدرين من الهيئه العامه للرقابه على الصادرات والواردات فى معروف فى وسط البلد.وتسجيل فى الجمارك لرقم التعامل مع الجمارك بصور من مستنداتك ..ومقر للإداره وكمبيوتر ونت و مخزن....

كل اللى فات ده اى حد ممكن يعمله بشرط انه يكون مصرى الجنسيه..

بقى عندك شركه تصدير وسجل مصدرين ورقم تعامل مع الجمارك وتقدر تصدر اى منتج من منتجات جمهوريه مصر العربيه ومن اى ميناء تعجبك بخلاف المنتجات المحظور تصديرها زى اسمده النترات مثلا لأنها اصلا بتباع للحكومه اجبارى لعدم كفايه المنتج منها للسوق المحلى اساسا..

قعدنا فى المكتب وبنتارجت على زبون بقى...

فى طريقتين....

الأولى انك بتدور على اى حد عايز اى حاجه أو اى حد عاوز يصدر اى حاجه ومعندوش سجل مصدرين وده شغل الكومسيونجى...يعنى عموله ومصلحه والسلام...هتقوللى هو فى كده...هقولك للأسف فى كده وكتيييير جدا كمان ....وانا شايف ان ده استهلاك طاقه بدون عائد ....!!

الطريقه التانيه...

عندك منتج وبتارجت على عميل يشتريه...

مثلا عندك مزرعه وعاوز تصدر خضار وفاكهه أو مصنع بلاستيك وعاوز تصدر مواسير بلاستيك..!

لازم تكون فاهم قوى فى المنتج ده..

لازم يكون عندك ميزه تنافسيه لأنك مش لوحدك ..سعر ...جوده...تسهيلات سداد....وفره انتاج...الخ

وخللى بالك المنافسه مش محليه فقط.....الصين بتنافسك والهند بتنافسك وتركيا بتنافسك....

فكر بره الصندوق وشوف تقدر تتميز بإيه عشان تقدر تخش مجال التصدير....!!

ابسط حاجه.....واحد فكر فكره حلوه وبقى يصدر لوف حمام....ايوه ليفه الحمام بتاعتنا دى...بيصدرها لكندا والمانيا واستراليا....!!

لو زهقت..مش هتكمل...

ولو استسلمت للأراء السلبيه والهيصه ..مش هتكمل..

ولو اصلا ملكش فيها...متدخلش فى حاجه ملكش فيها واشتغل مع حد فى المجال لغايه ما تفهم وتقدر تعتمد على نفسك...

المعلومات مش سر حربى ولا حد هيبخل بيها ولا حاجه بس لو دورت عالنت حتى من غير تعب هتلاقى دراسات جدوى لمشروعات صغيره..ومنتديات خاصه بالاعمال

ربنا يوفقك وتلاقى اللى بتدور عليه..