سؤال فى الغسالات الأوتوماتيك

**محمد ابراهيم 1** · 08-10-2008 03:15 PM

لو محتاج مساعد بدنيه أنا ممكن آجى أساعدك

**islambana** · 08-10-2008 05:48 PM

المشاركة الأصلية كتبت بواسطة sab3aawy

الصوت يصدر بشدة اثناء العصر ، لكنه موجود فى الغسيل العادى، وغير مرتبط بصوت طرمبة الصرف لأنى عارف صوتها ومميزه مما يحصر الشكوك فى الحلة او متورها

انا اعرف افك الحلة من مكانها واطلعها لكن عمرى ما فككتها من بعضها قبل كدة ، فياريت اخواننا اسلام البنا و magomago يفيدونى بخبرتهم فى هذا الصدد، هل تطيع البلية من الحلة محتاج ادوات خاصة وللا الأدوات العادية تسد

بص ياباش مهندس أحنا عندنا في الغساله بتاعتنا بعد مافكينا الحله أستخدمنا أجنه وشاكوش علشان نطلع الظرف اللي راكب فيه البلي من الحله وغيرنا الظرف كله وركبناه برضه ولو عايز تغير البلي او تشحمه هتستخدم مفك عادي علشان تفتح الظرف بس خلي بالك الغساله بتاعتنا موديل قديم ما اعرفش النظام عندك هيبقي شكله أيه وخلي بالك لو الحله الومونيوم او اي حاجه تاني غير الصاج خلي حديعملهالك علشان لو أتشرخت لازم تتغير وعلي فكره الادوات اللي هتستخدمها موجوده أكيد عندك

**magomago** · 08-10-2008 06:51 PM

من وصفك للحالة فالصوت كدة من الرولمان بتاع الحلة
- بالنسبة للطلمبة انا فكتها مرتين ( لحمتها مرة وغيرتها مرة )
- اما الرولمان ماكنتش للاسف موجود وتم تغيرة بواسطة عامل الصيانة بتاع التوكيل
وأخد 150 جنية مع إن الرولمان ثمنة لا يتعدى 15 جنية
- فممكن حضرتك تفك الغطاء الخلفى وتبص على الرولمان اذا كان مثبت بمسمار زنق فممكن تفكة وتجيب نفس المقاس وتغيرة
أما اذا كان محتاج زرجينة فالاحسن تجيب عامل الصيانه بس تكون موجود عشان مايعملش من الحبة قبة
وقولنا اية الاخبار

**magomago** · 11-10-2008 08:58 PM

اية الاخبار يا باشمهندس ؟؟
خلصت عالغسالة ولا لسة ؟

**ahmed1981** · 12-10-2008 01:02 AM

المشاركة الأصلية كتبت بواسطة sab3aawy

فانا محتاج خبراتكم فى هذا المجال ، هل بلية الحلة من السهل التعامل معاها وللا من الأفضل اطلب الصيانة، ولو هطلب الصيانة دول اكلمهم فين وازاى خاصة ان الغسالة كدة يعتبر ضمانها خلص

أنا غيرت بلية الحلة للغسالة الإيديال الزانوسي ال 20 برنامج مرة منذ حوالي أربع سنوات
والغسالة عمرها الآن حوالي 13 سنة
المهم إن الحلة الداخلية إستلس والخارجية صاج
والحديث من هذه الغسالات الحلة الخارجية فيبرجلاس (لو عندك فيبر جلاس إحذر من الكسر)

المهم تقوم بفك السير ثم تفك الصامولة الخارجية لعمود الدوران
وتفك مسامير تثبيت الكرسي الخارجي من حواف الحلة الثابتة
والبلية الخارجية خرجت بسهولة
ولكن البلية الداخلية إحتاجت خبط ودق كثير وتقريباً كان معايا زرجينة بلي ومش فاكر فادت أو نفع إستخدامها ولا لأ
المهم البلية الداخلية طلعت بصعوبة

وبعد ذلك إشتريت جوز بلي SKF فرنساوي بحوالي 60 جنيه
وإشتريت أويل سيل بحوالي (مش فاكر تقريباً بس حاجة بسيطة) من آخر شارع الجمهورية قبل كلوت بيه
طبعاً الأويل سيل بيتحطله لزق في الحلة الثابتة تقريبا إن لم تخني الذاكرة

وركبت الغسالة وكانت زي الفل

**مدحت منيب** · 12-10-2008 11:05 AM

و انا كمان عملت زى احمد 81 و حلّيت ال2 رمان بلى و نزلت اشترتهم م التوفيقيه جداد و شحمتهم و ركبتهم و بقالهم 3 سنين

شغالين ,,اهم حاجه اضبط بعد كده افقية الغساله بميزان ميه .. انا ما لقتش فى الحمام حته مستويه ( للميل اللى بيتعمل عشان البلاعه )

و اضطررت لنقل الغساله للمطبخ و بذلت شوية مجهود فى تعديل ارتفاع ارجل الغساله بمساعدة ميزان ميه حتى حصلت على

الفقاعه فى نص الميزان بالمللى . هذا يطيل عمر الغساله و السير و الرمان بلى .

اما صيانة هذه الشركه فقد طردتهم قبلا ، لانى كنت لسه موهوم بفكرة الضمان . و اخدوها و رجعوها و عملوا لى فاتوره ب 575

تشمل انهم غيروا كامل الموتور و البلى .. الخ
و بعد 3 اسابيع طلع صوت الحشرجه بتاع رمان البلى الفارط .. و لما جم تانى ( ناس غير الاولانيين طبعا ) قالوا عاوزين ياخدوها تانى

فكرشتهم .. قالوا لى عاوزين 12 معايته قلت لهم ولا مليم و كرشتهم . اعملها بنفسك يا باشمهندس خالد .. كأنك بتغير رمان بلى عجل ،و اسهل

انا لا اعترف اطلاقا ان المحروسه فيها شىء اسمه ( الضمان ) لاسباب عمليه يطول شرحها

ان استعنت بصبى ميكانيكى معاك يكون اسهل و احسن.. و ربنا يوفقك