سؤال فى الغسالات الأوتوماتيك

**sab3aawy** · 07-10-2008 10:10 AM

اخواننا الأعزاء ، عندى سؤال فنى بس مش فى العرببيات علشان كدة محطيتوش فى الورشة

الموضوع يتعلق بغسالتى من طراز الايديال زانوسى الموجودة فى نص بيوت مصر ، اشتريت الموديل 20 برنامج من حوالى 5 سنوات وبدأت تشغيلها من 4 سنوات تقريبا لما اتجوزت، المهم انها حاليا لما بتعصر بتطلع صوت حشرجة غريبة جدا زى حشرجة بلى العجل او بلى الفتيس بتعا العربية، ولذلك انا شاكك انها تكون بلية الحلة او بلية فى الموتور

الفكرة انى كنت زمان بفك واركب الغسالة القديمة اللى كانت فى بيتنا الكبير(ايديال زانوسى اوتوماتيك برضه ، اول موديل نزل منها) وكنت بصلح فيها كل حاجة بس عمرى ما احتجت امد يدى ناحية الحلة او البلية بتعاتها ، فانا محتاج خبراتكم فى هذا المجال ، هل بلية الحلة من السهل التعامل معاها وللا من الأفضل اطلب الصيانة، ولو هطلب الصيانة دول اكلمهم فين وازاى خاصة ان الغسالة كدة يعتبر ضمانها خلص

**محمد عز** · 07-10-2008 10:44 AM

طالما بره الضمان يبقى فك براحتك
لو معرفتش كلم الصيانه اكيد ليهم رقم مجانى

كان فيه موضوع مشابه كده لغسالة خالتى الاتوماتيك بس مش عارف نوعها وفعلا احتاجت تغير رمان البلي (لكن الحقيقة مش فاكر اى تفاصيل)

**fady** · 07-10-2008 10:52 AM

المشاركة الأصلية كتبت بواسطة sab3aawy

ولو هطلب الصيانة دول اكلمهم فين وازاى خاصة ان الغسالة كدة يعتبر ضمانها خلص

ايديال دلوقتي تتبع اوليمبيك جروب 19999

**mmolazem** · 07-10-2008 11:00 AM

( لو كان الصوت يحدث اثناء عمل طلمبة الصرف )

فقد حدث عندى امر مماثل وكان بسبب سقوط قطع بلاستيكيه صلبه صغيره ( من درج المسحوق ) الى داخل الغساله .
ولا تتمكن طلمبة الصرف من اخراج هذه القطع مع المياه المتصرفه و بالتالى تظل تصطدم بريش مروحة الصرف.

وكان الحل هو فك خرطوم الصرف من ناحية الطلمبه واخراج القطع المحتجزه داخل الطلمبه وزالت المشكله والحمد لله.

- ارجو ان تكون المشكله عند حضرتك ( مشابهه لذلك ) لان عمر تشغيل البلى اعتقد بيكون اطول من مدة اربع سنوات تشغيل.

.

**Dr.A.Nabil** · 07-10-2008 05:25 PM

اه واه من الصيانه

انا عندنا تلاجه ايديال

والباب بتاعها ماكنش بيقفل
فاتصلنا بالصيانه وجالنا المهندس وقالنا بسيطه خالص دي الجلده عايزه تتغير
غير الجلده
بصينا على الفاتوره:
تغيير جلده 75 ج
فحص منزلي 35
تعديل ترموستات مش عهارف كام
ضرايب مش عارف كام

هوووب
180 ج عشان الجلده

الراجل لهفهم في بطنه ومشي وغار في الف سلامه
رايح اشرب مياه عشان ابلع اللي شربته
لقيت الباب زي ما هو

اتصلت بيهم تاني
بعد 3 ايام من الخناقات والمفاوضات عشان واحد يتكرم وييجي وينورنا تاني
ولخيرا جه واحد تاني غير الاولاني
وقالي: مش عارف يا باشا الجلده الجديده سليمه والباب مافيهوش حاجه

ومشي من غير ما ياخد ولا مليم ويشكر

المهم جيبت واد صنايعي فني بريد من الشارع اللي جانبينا وقالي يا بيه ده الباب معووج وعايز المسمار اللي رابط الباب يتقرط عليه كويس عشان يتعدل وهووووب عملها في 3 دقايق واخد 10 ج ومشي والباب زي الفل دلوقتي !!!

**islambana** · 07-10-2008 05:32 PM

المشاركة الأصلية كتبت بواسطة sab3aawy

، فانا محتاج خبراتكم فى هذا المجال ، هل بلية الحلة من السهل التعامل معاها وللا من الأفضل اطلب الصيانة، ولو هطلب الصيانة دول اكلمهم فين وازاى خاصة ان الغسالة كدة يعتبر ضمانها خلص

بليه الحله سهل تفكها وتركب غيرها او تشحمها بس المشكله ياباشمهندس انك تفك الحله وتركبها تاني محتاج اتنين يساعدوك

**magomago** · 07-10-2008 08:16 PM

لازم حضرتك تحدد بالظبط :
هل الصوت يصدر اثناء العصر فقط اى اثناء دوران الحلة بالسرعة القصوى لان لو الصوت من بلى الحلة فلازم يصدر اثناء الغسيل ايضا
ام اثناء سحب المياه اثناء العصر ودة ممكن تعرفة من سماع صوت المياة وخروجها من خرطوم الصرف والصوت فى هذة الحالة بيكون من طلمبة طرد المياه
اعرف الصوت منين بالظبط وقولى وانا اقولك تعمل اية

**mr_kenawy** · 08-10-2008 12:43 PM

احمد ربنا ان الضمان خلص لانك انت كدة حر فى الاصلاح برة الضمان , انا ما شفتش فى حياتى اسوأ من ضمان اوليمبيك جروب , غسالة الاطباق عندى ايديال ايليت 455 طلمبة المياة فيها باظت بعد شهرين من الشراء , و لما اتصلت ب 19999 قعدوا يماطلوا فيا و يقولولى ارجع للتوكيل اللى فى اسيوط (محل اقامتى) , و اسيوط قعدوا يماطلوا فيا برده لمدة اسبوعين تقريبا لحد ما رحت قابلت المدير و فهمته انى هطلع من عنده على جهاز حماية المستهلك و هعمل محضر اثبات حالة و هرفع دعوى مدنية بالتعويض قدره 10000 جنيه , و النتيجة ان الغسالة تانى يوم كانت متصلحة , ياريت اللى يعرف اى منتديات خاصة بحماية المستهلك يقولنا عليها علشان احذر كل الراغبين فى الشراء انهم يشتروا منتجات اوليمبيك جروب , خصوصا اهل الصعيد.

**sab3aawy** · 08-10-2008 01:17 PM

الصوت يصدر بشدة اثناء العصر ، لكنه موجود فى الغسيل العادى، وغير مرتبط بصوت طرمبة الصرف لأنى عارف صوتها ومميزه مما يحصر الشكوك فى الحلة او متورها

انا اعرف افك الحلة من مكانها واطلعها لكن عمرى ما فككتها من بعضها قبل كدة ، فياريت اخواننا اسلام البنا و magomago يفيدونى بخبرتهم فى هذا الصدد، هل تطيع البلية من الحلة محتاج ادوات خاصة وللا الأدوات العادية تسد

**emadfk** · 08-10-2008 03:09 PM

شوف حضرتك انا كان عندى نفس العيب ده وطلع فعلا رومان البلى عايز يتغير وطلبت الصيانة وغيروه

لكن الحقيقة هم ناس كويسة جدا ولايمكن تفدر تعملها لوحدك علشان فك الرومان بلى محتاج عدة مخصوصة وهى معاهم

ارجو انى اكون فد افدتك

الموضوع: سؤال فى الغسالات الأوتوماتيك

LinkBack

أدوات الموضوع

عرض

سؤال فى الغسالات الأوتوماتيك - انشر الموضوع فى :

-

-

-

-

-

-

-

المواضيع المتشابهه

حد فك او بيفهم فى الغسالات الاتوماتيك

سؤال عن السانديرو الأوتوماتيك

سؤال عن الفتيس الأوتوماتيك

سؤال عن الكليو الأوتوماتيك

سؤال فى العربيات الأوتوماتيك

الكلمات الدلالية لهذا الموضوع

المفضلات

المفضلات

ضوابط المشاركة