الموضوع: حالة المرور في أول أيام العودة للمدارس

وانا قاعد في الشغل جاتلي إخبارية ان مترو الأنفاق كله كان عطلان لفترة من الوقت طويلة وده سبب زحمة فيصل ووسط البلد والمعادي وما الى ذلك ...


ويضاف اليه خروج . . . . . . . . والمواكب اللى كانت معمولة له في إزدحام باقي القاهرة اللى هية مدينة نصر ومصر الجديدة وطبعا صلاح سالم وبالتبعية جسر السويس والسندباد بقى وكله


بس الحاجة الغريبة اللى مش قادر افهمها ليه الدائري كان زحمة المفروض ان مالوش دعوة بالكلام ده خالص وطول عمره بعيد عن البلد واللى بيحصل فيها

ياللا ماهي ظاتت على الآخر

فعلا يا جماعه الزحمه انهارده كانت غريبه شارع التحرير فى الدقى مكنش فيه مكان انك تمشى فيه اصلا وكان فيه كمية ظباط غريبه و بتوع الميكروباصات ربناياخدهم بإذن الله يخلصنا منهم كانوا مبرجلين الدنيا اخر برجله و اخر موقف حصلى معاهم انهارده واحده ست و بنتها بتعدى شارع التحرير ده فأنا هديت و اديت انتظار علشان الست و بنتها يعدوا يقوم الباشا سواق الميكروباص اللى كان ماشى ورايا ما يعترفش بإى حاجه من دول و يجى من ورايا و يعدى من جنبى جرى و كان هيشيل الست و بنتها لولا ستر ربنا

الحمد الله ان شغلي قريب من بيتي
بيتي في احمد عرابي المهندسين و شغلي في ميشيل باخوم جنب نادي الصيد نزلت الساعة 8:00 وصلت هناك الساعة 8:20 و دة يعتبر متاخر شوية , رحت لقيت الشغل فاضي افتكرت ان النهاردة اجازة والله و انا جيت غلط:cute:بس للاسف الحلم كان اجمل من ان هوه يتحقق
الحاجتين الوحيدتين اللي حستهم النهاردة
1-و انا داخل علي جامعة الدول من احمد عرابي الحتة دية(ميان سفنكس)كانت بتبقي سالكة جدا و بجيب فيها التالت مستريح علطول بس النهاردة كانت واقفة جدا و جة طبعا بسبب كمية العربيات اللي عاوزة تاخد اول يو تيرن في جامعة الدول و تطلع 15 مايو و تنزل الزمالك(الزمالك كلها مدارس طبعا زي ما كلنا عارفين و انا شخصيا كانت مدرستي هناك و عارف الطريق دة كويس)كانت ايام والله ايام الطفولة ولعب الكرة بالدوم و.....و بلاش افتح احسن انا بحب الفترة دية من عمري قوي ,طبعا انا اول ماشفت المنظر اتخضيت و ابتدي اول كلاكس يا معلم من اللي ورايا رحت في هدوء قافل الازاز و مشغل التكيف و مشغل اغنية هادية بصوت متوسط و انعزلت عن العالم ,انا كنت علي شعرة اساسا و نازل مكتئب لاني سمعت خبر وحش امبارح و دايقني جامد

2- ميدان علاء الدين بركن فية كل يوم الحتة اللي جنب سور نادي الصيد و عنب كل يوم الاقي ركنات بالهبل , النهاردة ملقتش يمكن غير مكان بس واحد فاضي!!! و دية مش عارفلها سبب الصراحة

بس و دة كان انطباعي عن المرور النهاردة

المفروض مع كل هذا التطور ان يقوم كل فرد بعمله من المنزل هذا طبعا للأعمال التى تصلح فقط من المنزل و اكيد اللى ليها صلة بالكمبيوتر . و اعتقد ان ده هايكون الحل فى المستقبل .