أستفسار عن الغيارات

**alaasaid** · 07-10-2008 11:50 AM

السلام عليكم و رحمة الله و بركاتة ,

أرجو النصيحة من أخوانى فى المنتدى

بالنسبة للغيارات انا بغير حسب ما اتعلمت من المنتدى يعنى

الاول أخرة 20
التانى أخرة 40
التالت أخرة 60
الرابع أخرة 80 - 90

المشكلة بقى لما أكون ماشى و عايز أجيب غيار أقل يعنى مثلا ماشى على 100 و فرملت لحد السرعة وصلت 60 المفروض انزل بالغيار من الخامس للرابع لما برفع رجلى من على الدبرياج العربية بتقفش لثوانى كانى دايس فرملة و الحكاية بتكون أقوى لما اجيب الغيار التانى على سرعة أعلى من 20 بحاجة بسيطة

أعتقد ان العيب منى لانى لسة متعلم سواقة جديد بس انا قلت أطمئن من أصحاب الخبرة فى المنتدى

السلام عليكم

**Nour_Peugeot** · 07-10-2008 12:53 PM

لكلام ده لما حضرتك بتبقي مدي سرعة علي الغيار

فبالتالي العربية بتفضل تهدي سرعتها لغيت لما الموتور يرتاح او بمعني اصح يرجع للسرعة الطبيعية للغيار

و لو انت جديد متعملت كده تاني لما تتعمق في السواقة هيبقي عادي

بس كده انت بتعمل علي الغيار شوية بس متخفش مش هيائر يعني

**Nader** · 07-10-2008 12:58 PM

المشاركة الأصلية كتبت بواسطة alaasaid

السلام عليكم و رحمة الله و بركاتة ,

أرجو النصيحة من أخوانى فى المنتدى

بالنسبة للغيارات انا بغير حسب ما اتعلمت من المنتدى يعنى

الاول أخرة 20
التانى أخرة 40
التالت أخرة 60
الرابع أخرة 80 - 90

المشكلة بقى لما أكون ماشى و عايز أجيب غيار أقل يعنى مثلا ماشى على 100 و فرملت لحد السرعة وصلت 60 المفروض انزل بالغيار من الخامس للرابع لما برفع رجلى من على الدبرياج العربية بتقفش لثوانى كانى دايس فرملة و الحكاية بتكون أقوى لما اجيب الغيار التانى على سرعة أعلى من 20 بحاجة بسيطة

أعتقد ان العيب منى لانى لسة متعلم سواقة جديد بس انا قلت أطمئن من أصحاب الخبرة فى المنتدى

السلام عليكم

كون ان العربية تقفش وانت ماشي بيها ومش دايس دبرياج

فدة شئ طبيعي لان انت كدة بتكون ماشي على سرعة تعتبر قليلة

على الغيار اللي انت ماشي علية، يعني ماشي 100 وجايب الخامس

الحكاية دي اسمها فرملة الموتور انجين براكينج.

**Strong** · 07-10-2008 06:44 PM

لا ده مش عيب في العربية .....

ده عادي فعلشان كده لما تكون ماشي 30 مثلا على الغيار التالت وتكون عايز تنزل نقلة بعد ما تدي الغيار ارفع الدبرياج على مهلك في الحتة اللي بيفصل فيها لغاية لما تعدي الحتة دي وبعدين سيب رجلك ..... العربية مش هتقفش منك أبداااااااااا حتى لو مشغل المكيف ومش هتحس بالفرملة دي.

**silver_som3a** · 07-10-2008 07:07 PM

يا جدعان ديه حاجه تانيه هو قصده انه مثلا بيجيب تالت لحد خمسين ستين مثلا

و هو بيهدي من سرعه عاليه فا سرعته تبقي 40 يجيب تالت العربيه تقفش

بص و انت نازل بالسرعه غير و انت طاله يعني تهدي لحد 40 تديها الغيار الرابع مش التالت مع ان 40 ديه لسه في رينج التالت بس زي مبقولك و انت بتنزل بالسرعه طريقه النقل مختلفه عشان متقفش معاك جرب و حتشوف
و عموما يا ريت متحرقش عالغيار و انقل بدري شويه عشان الفتيس يفضل ناعم معاك علي طول حتي لو مش حتسحب جامد نو بروبلم احنا مش في سباق
يعني جرب التالت عند 30 و رابع عند 50 و خامس عند 70 75 و قول ايه رأيك...

**MEDO80** · 07-10-2008 07:15 PM

حدود سرعات النقل دية تفرق من عربية لعربية حسب النوع و سعة الموتور يعني ال 1600 غير 1300 و الهيونداي و الكوري غير الاوروبي و العربية القديمة غير الجديدة عموما في دليل استخدام لكل عربية بيحدد السرعات دية
مثال الهيونداي الفيرنا 2007 1600
دليل المستخدم بيقول للحفاظ علي اطول عمر ممكن للمحركات
الاول 20 كلم
التاني40 كلم
الثالث 55كلم
الرابع 75كلم
الخامس ربنا معاك
طبعا الفيرنا ممكن تنقل مثلا ال التاني علي 40 كلم عادي و الثالث مثلا علي 60 كلم عادي جدا جدا من غير ما تحس انك قارص علي المحرك قوي عكس عربيات تانية من نفس الفئة بس حيكون من عمر المحرك
و بلاش النقل بدري لازم تشبع النقلة قبل ما تدي الغيار الي بعدها

**D . a .\ AYMAN** · 07-10-2008 08:27 PM

أول أحب أطمنك ان اللى بيحصل ده طبيعي جدا

سببه ايه بقى ؟ ... ان انت بتدي نقلة أقل من السرعة اللى ماشية عليها العربية فعليا عشان كده مجرد ما تعشيق التروس بيتم بسرعة الفتيس بيكلبش العربية كأنك دوست فرامل للحظة قبل ماسرعة العربية تبقى زي سرعة النقلة اللى انت معشقها

مثال : لما تكون ماشي مثلا على سرعة 30 كيلو طبيعي بتبقى محتار في النقلة اللى انت المفروض تعشقها بين التاني أو التالت ... لو اديت التاني اللى هوة سرعته بتبقى 20 في معظم العربيات تبص تلاقي العربية فرملت فجأة أول ماتشيل رجلك من على الدبرياج لغاية ماسرعتها تبقى 20 اللى هية سرعة النقلة اللى انت جايبها (التاني) وده اللى بيحصل معاك هنا

.... طب لو اديت التالت هاتلاقي العربية تقيلة شوية لو حبيت تطلع بيها بسرعة لغاية ماتوصل لسرعة التالت (40 فما فوق في معظم العربيات) وبعد كده تبتدي تشد معاك

طب الحل ايه ؟ .... عندك حلين

الأول : انك تجيب التاني بس في الحالة دي تشيل رجلك من على الدبرياج بالراحة وفي نفس الوقت تدوس دواسة البنزين للدرجة اللى تخللي العربية ماشية بنفس السرعة اللى انت عليها فعليا (خللى بالك المعادلة ده حبة حبة هاتيجي بالإحساس كل ماتبقى قديم في السواقة كل ماتحس بيها أكتر وهاتلاقي رجلك اتظبتت فيها أكتر دبرياج وبتزين مع بعض) ...... الحل ده هوة الصح لما تكون ناوي تشد بسرعة بالعربية أو لما تكون مشغل التكييف طبعا أو محمل على العربية حمولة تقيلة أو ناس كتير أو طالع مطلع وهكذا

التاني : انك تجيب التالت بس في الحالة دي لازم تطلع بالراحة يعني مش هاينفع تدوس بنزين جامد لأن العربية أصلا مش هاتطلع معاك جامد ... والحل ده هوة الصح لما تكون العربية نازلة منزل بالذات أو مش محمل وانت مش مشغل التكييف

وربنا يوفقك

**MMamdouh** · 08-10-2008 12:32 AM

the answer to this problem is: rev matching

يعنى تعديل سرعة لفات الموتور بما يتناسب مع سرعة العربية و النقلة المطلوبة

مثال لكدة لما كان فيه خلاف على ان الاول مبيجيش فى اللانوس الا و هى واقفة او ماشية ببطء شديد و انا وصلت انى حطيت اولانى و انا ماشى بسرعة 30... طبعا لو شلت رجلى من على الدبرياج و لفات الموتور 1000 لفة فقط و العربية ماشية 30 حتكلبش فى الارض تماما مهما حاولت تحسس على الدبرياج

الحل؟

انك تكبس كبسة بنزين و انت دايس دبرياج بحيث ترفع لفات الموتور بما يتناسب مع النقلة و السرعة... يعنى فى حالتى السابقة لازم كبسة البنزين ترفع الRPM لحد 2500 او 3000 مثلا و عندها تسيب دبرياج لتفادى المشكلة دى

القصة مش سهلة و محتاجة خبرة لمعرفة اللفات المناسبة لكل ترس بالنسبة للسرعة اللى عليها العربية و قد يحتاج الموضوع شوية وقت لحد ما تظبطة... لكن اول ما تبقى ظابط الحتة دى حلتاقى نفسك بتنقل من اى نقلة لاى نقلة بدون فرملة او قفز للعربية (فى حالة ما كانت لفات المتور اكتر من اللازم)

MMamdouh