صوت طقة واحدة مع المطبات او الحفر فانتازيا
السلام عليكم يا رجالة
من فترة كدة لاحظت ان عربيتى فيها صوت طقة واحدة مع المطبات (طقة واحدة بس)
المهم لفيت على الصنايعية والتوكيلات والحبشتكانات
التوكيل قالى على الحل بس حل منيل طبعاً
انه يغير طقم السوست والمساعدين اللى قدام
طبعاً تكلفة مرضيتش حتى انى اسأل على تمنهم
المهم
قعدت الف واسأل لحد الحمد لله لاقيت الحل
بصوا يا رجالة
عشان اللى عندة المشكلة دى يحلها
هاتروح لواحد عفشجى يكون نضيف فى شغلة
وتقولة اعزلى السوست
بيفك المساعد والسوسته برة العربية
ويجيب خرطوم اسود سميك
ويدخل السوستة فيه
ويركب كل حاجة تانى فى مكانها
طب ايه لازمة الموضوع ده
بصوا يا شباب
السوست بتركب بين البطاحة وكورسى المساعد
تمام
المفروض فيه جلدة بتتحط بينهم عشان احتكاك الحديد
وبما ان العربيات دى مش معموله للمرمطة بتاعت بلادنا
فا مش بيحطوا الجلدة دى
بس بيعزلوا السوست بطبقة دهان عازلة
ومهما كان نوع الدهان ده حديد بيحك فى حديد
بيتاكل طبعاً وتبدأ تسمع الصوت ده لما العربيه تنزل فى حفرة
انا جربت الموضوع ده واتحلت المشكلة تماماً ونهائياً
والناس ماتخافش من الموضوع ان فيه خطورة
انا كنت سألت الاستاذ خالد على الموضوع ده واكدلى ان مافيهوش اى خطورة
انا كتبت الحل عشان اوفر على الناس الحل لأن انا تعبت كتير على ما وصلت للحل ده
والحمد لله العربيه معايا تمام جداً مافيش اى صوت من اى نوع والحمد لله
واى استفسار انا فى الخدمة
