الشكل مهم فى الزواج لدرجة ايه؟

**hani945** · 19-04-2014 09:18 PM

[justify]بص ياباشا ، أنا حقولك على موقف حقيقى حصل فى المواصلات ، ويدل على شئ خطير للغاية ، وللأسف الناس بتتريق وفاكرينه حاجة عادية وبصراحة هو مؤشر يدل على أن الرجل المصرى فى أغلب الأحيان مظلوم من المرأة المصرية ، وانتوا احكموا
انا كنت رايح مشوار وركبت عربية ميكروباص فيها ناس عادية جداً اغلبهم رجال أعمارهم فى الأربعينيات والخمسينات وبجوارهم سيدات ربات منزل أو موظفات تقريبا ، المهم ياباشا كان فيه مكان واحد فاضى والسواق مش راضى يمشى إلا لما ييجى زبون وإلا إحنا نحاسب بدلاً منه ، المهم استنينا شوية وبعدين جت آنسة كده سنها فى آواخر العشرينات تقريبا مودرن شوية ، نظام كده شعرها مكشوف وبنطلون وتيشرت علشان كنا فى الصيف ومكانتش حلوة ، بالعكس وجهها كان عادى جداً يمكن كمان أقل من الجميلة بشوية ، بس مهتمة بنفسها شوية صغيرين ، فى ثانية واحدة ياباشا وعينك ما تشوف إلا النور العربية كلها اتقلبت نظرات حرمان زى ما بقولك كده بالظبط كنا فى الصيف بقى والناس فى العربية معاملة فى منتهى الاحترام واللطافة والذوق ونظام بقى كلمة حضرتِك منين ؟؟!! وهى قالت إنها من لبنان ، ثانية واحدة والمناديل الورق طلعت وناس بتعزم بالمناديل ونظرات حسرة وندم على عمرهم اللى راح وناس حاسة إنها انضحك عليها فى الجوازة ،،، والستات ربات البيوت فى العربية عمالين كل شوية يظهروا علامات التأفف والقرف من الآنسة ومن المعاملة اللطيفة من الرجالة فى العربية للآنسة دى ، والست اللى ورايا فى العربية عمالة تقول فى سرها ( حاجة تقرف حاجة قلة آدب !!!!) بلف دماغى بشوف إيه الحكاية لقيت البنت قاعدة محترمة جدا ومكسوفة من نفسها!!! ،بقيت بسأل نفسى هو مين اللى يتقرف من مين ؟؟؟ مع إن المشكلة مش فيها ، المشكلة يا صديقى العزيز من تقصير السيدات وربات البيوت المصريات فى حق أزواجهن واللى منكدين عليهم ومش عاوزين يعترفن بالتقصير ده ويوفرن لهم الراحة والهدوء ودايما ماشيين بنظام العين الحمرا أى حاجة مش عاجباها على طول تشغل اسطوانة النكد ، والراجل يدخل البيت يشم بصل وثوم ومفيش اهتمام بالشكل أو بالبيت ، وده اللى بيخلى الراجل حاسس إنه انضحك عليه أو إنه اتظلم فى الجوازة ، وحاسس دايما بالحرمان ويبقى نفسه يشوف جوازة تانية .
الخلاصة ياباشا من الموقف ده إيه :
الجواز بقى عامل زى العقاب ، الراجل اللى عاوز ينكد على نفسه يروح يتجوز هيتخرب بيته مصاريف وفى الآخر هياخد على دماغه فى أول خلاف ، والبلد بقى فيها ظلم كتير قوى بالذات فى الجواز الست لما تلاقى حاجة مزعلاها ، على طول تشغل اسطوانة النكد على جوزها مش عارف ليه ، مع إنها فى البيت طول النهار وهو مرمى فى الشارع علشان يصرف عليها ويوفر عليها البهدلة .
متزعلش منى بس بصراحة الواحد بيحب يفضفض شوية

نصيحتى لك : ابحث عن الزوجة المخلصة اللى تريحك وتخدمك وتسهر على راحتك وتصون عرضك وتعرف تربى أولادك ، اصل ده جواز مش عربية لما تزهق منها هتبيعها وتشترى غيرها ، وهى دى اللى هتقف جنبك فى فترة مرضك أو فى مشكلة ممكن تقابلك فى المستقبل ، اركن بقى معايير الجمال والشهادات والوظيفة والفلوس والعائلة على جنب.

ابحث عن التدين والإخلاص .
[/justify]

**hitman235** · 19-04-2014 09:19 PM

المشاركة الأصلية كتبت بواسطة m i d o

انت الي غلطان ...
ازاي تشوف صورة واحدة وتوافق علي الخطوبة عشان شفت الصورة بس وازاي تقابل واحدة لمرة واحدة بس وبعدين تخطبها ..
انت كدة الي بتزنق نفسك مش كل واحدة حد هيجبهالك تقول ومالة اروح اشوف او اجرب لا طبعا كدة غلط وكتر انك تخطب وتفركش دي هتاثر عليك بعدين لو لاقيت واحدة عجبتك ممكن هية بقي الي ترفضك بسبب الموضوع دة ..
انت ملاكش غير حل واحد مالوش تاني . اولا تسيبك من موضوع الصور دة مش الناس الي هتختارلك مراتك ثانيا وبصراحة من الاخر انت مش ضامن كل واحدة تعرفها ان كانت كويسة ولا لا ممكن تبقي فيها عيوب كتير وبتداريها وتكتشفها بعد الخطوبة و بما انك مبتحبش حد ولا في بنت في دماغك وعاوز تتجوز وتخلص قبل متجيب 30 سنة عشان كلام الناس وبتاع يبقي تشوفلك واحدة قريبتك تكون محترمة وعارف اصلها وفصلها وتكون امورة مش شرط ملكة جمال بس كفاية ترضيك وتبقي حلوة في عينك ودة حلك الوحيد غير كدة هتفضل تدور وتلف وفي الاخر مش هتتجوز
وبرضو عشان متظلمش البنت الي معاك حاليا انت تنزل وتشوفها علي الطبيعة والله عجبتك توكل علي الله معجبتكش عادي انت متعود تفركش مش هتبقي حاجة جديدة عليك ومعلش لو كلامي قاسي شوية بس دة عشان مصلحتك

انت عندك حق انا نفسيا اتأثرت جدا بكتر البجث و اكتئبت و فكرت فى الانتحار بشكل جاد فى فتره من الفترات
انا لا كان عندى تجارب قبل كده ولا كنت بلف و ادور و امشى مع بنات فى الكليه او قبل كده اول بنت كلمتها اكتر من جملتين على بعض كانت البنت الى خطبتها
والله موضوع القرايب ده لو ينفع كنت مشيت فيه بس كلهم اطوال ما شاء الله
شكل صرف النظر عن الزواج بشكل عام هم اكتر حل واقعى بالنسبه لحالتى بس الله اعلم هعرف اتعايش مع الوضع ده ولا لأ

**hani945** · 19-04-2014 09:31 PM

المشاركة الأصلية كتبت بواسطة m i d o

بص انا هتكلم معاك بصراحة ..
انا عن نفسي زمان كنت بقول ميهمنيش الشكل و المهم الاخلاق و التدين وهكذا واستمريت علي الوضع دة سنين لحد ما كبرت وعقلي نضج وبقيت بفكر كويس ومعا اللف دايما الواحد بيقابل بنات جمال جدا وبيقول في بالة اما لو دي كانت خطيبتي ولا بتاع وفي الاخر اكتشفت حاجة ..
التدين و الاخلاق مهمين جداا بس برضو الشكل مهم يعني مينفعش اتجوز واحدة واعيش حياتي معاها مش مرتاح وكل واحدة معدية ابص عليها واقول يارتني وبعدين احنا الرجالة بطبعنا عنينا زايغة شوية ما بالك بقي لو اتجوزت واحدة انت مش متقبلها مش شرط تبقي ملكة جمال بس علي الاقل تكون متوسطة ومعقولة عشان تملي عينك بعد الجواز ومتبصش برة

أؤيد رأى حضرتك لازم الست تهتم بزوجها ومتفضلشى مشغلاله اسطوانة النكد علشان تقصف عمره

**hitman235** · 19-04-2014 09:33 PM

المشاركة الأصلية كتبت بواسطة hani945

أؤيد رأى حضرتك لازم الست تهتم بزوجها ومتفضلشى مشغلاله اسطوانة النكد علشان تقصف عمره

فيه بنات بتشغل الاسطوانة دى من فتره الخطوبة اساسا

**pro_samir** · 19-04-2014 09:38 PM

المشاركة الأصلية كتبت بواسطة y a r i s

لا لا. الي بيقولك اهم حاجة. الاخلاق وكده سيبك منوا
لان الجيل الي طالع بتاع اليومين دول كلو اخلاق زبالة وتربية ازبل .... الا من رحم ربي ... بس كمان من ناحية تانية هل الشكل كل حاجة. انتا لو هتسئلني اناااا السؤال ده. هقولك لا يا عزيزي.... طبعاً الشكل مهم جداااً بس مش كل حاجة بس انتا ليك في الي شايفوا قدامك يعني هو انتا دخلت قلبها او جو نيتها او تربيتها او طبعها وشفت جواه فيه ايه !!

بس من ناحية تانية. يا عزيزي من حكمت ربناااا علينا. ان مفيش بنت خلقهاااا. شكلها وحش ابداً .... وحتى لو كانت ووحشة. هتلاقي فيها حاجة حلوة ... لازمن. ولابداً إلا مهتلاقي فيها شيء لله حلو. ... يعني ممكن تلاقي بت متخرشمه بس جسمها حلو. ووممكن تلاقي بنت وشها ملالاك بس جسمها ضارب ووممكن تلاقي بنت وشها وجسمها حلوين بس صوتها اعوذ بالله لا يطاق ومسرسع كده وتخبطك مليون كلمة في الدقيقة تبقى عاوز تصرخ بعلوا صوتك في وشها وتقلاها كفاااااااااية ابوس ايديك ابوس رجلك يا شيخه ارحميني انتي مبتعرفيش تسكتي شوية !!!

بص ياعزيزي السوق ضارب ... وتحس ان البنات الي موجودين في السوق حالياً مش الموسم بتاعهم او طالعين قبل ؤوانهم. وطعمهم ماسخ ... لكن تفائل بالخير .... وديماً حط همومك على رب العالمين. ... ونصيبك هتشوفوا. (( فالطيبين للطيبات والخبيثين للخبيثات )) وخلي بالك في بنات مبتحلووووش غير بعد الجواز. بتلاقيها تلمع كده وتزداد لمعاناً. وبريقاً . كده وتبقى مشعه .... وعلمياً البنات. بتزداد ؤنوثة. وحلاوة كل ما تكبر في السن. بتبقى عاملة زي اليوستفندي لمن يستوي كده ويتقطف ... واي بنت في الدنيا اي بنت. تعاله شوفها بعد ما تخرج من عند الكوافير لايمكن تعرفها .... بتبقى شخص تاني ... يعني حتى مع الايام. بتلاقي التخينة بتخس. والرفيعه بتتخن وكلو بيتغير لذلك لو سئلتني طيب هيا الحلاوة فين هقولك (( الحلاوة حلاوة الروووح ))) ان البت اول ما تشوفها تشدك ليها وتقول هياااااااااا دي الي انا عاوزها مع انها مش جميلة قوووي بس فيها شيء لله بتحس براحه غريبة بتحس بيها لمن تشوفهاااا وبترتاح حتى في وجودك مع اهلها .... وتحياتي وبالتوفيق .

انت استاذ يا عمدة

الموضوع مش شكل خالص قد ما هو قبول

الجمال دي حاجه نسبية بين حد والتاني ، المهم انت شايف ايه مش الناس شايفة ايه

كتير جدا ممكن تلاقي حد يقولك علي واحدة جميلة وانت متشوفهاش كده

والعكس ممكن انت تبقي شايف واحده جميلة و مشدود ليها ولملامحها وتفاصيلها والناس بتقولك علي ايه يعني دي عاديه و أقل من العاديه !!

هو ده القبول

وكما قال اسمه ايه: خدو عيني شوفو بيها !

**M I D O** · 19-04-2014 09:54 PM