الموضوع: هل يحق للمطاعم منع الناس انها تخش الحمام ... بدون ما يشتروا حاجة !!

.هل يحق للمطاعم منع الناس انها تخش الحمام ...
بدون ما يشتروا حاجة !!



كما ورد بالعنوان كده ... هل يحق للمطعم انوا يعلق ورقه على باب المحل او المطعم ويكتب فيها



{ عفواااااً}
ممنوع دخول الحمام لغير زبائن المطعم منعاً للاحراج .


طيب أنا أعملها فين دلوقتي !!! أنا عارف انها مش مسؤوليتك. اعملها فين. بس يا أخي دي حالة طوارئ ئمرجنسي يعني أعملهلكم على باب المحل بره ... وبعدين تيجي تخش وتقول : يالله هين قرشك يا وله .. ولا تهين نفسك ... خليني انفعهم باي حاجة. وتكون مزنووووووق وعلى أخرك وتلاقي الكاشير عليه طابور مع انوا مطعم المفروض راقي مكدونلاز ولا كنتاكي ولا بيتزا هت ولا حتى بورجر كينج او غيروا وغيروا ... فتوقف وتوقف عند الكاشير علشان تطلب بس الي يغيظك. بقه الوجبات رسمتها باسعرها متعلقه فوق الكاشير يجي الي قدامك اول ما يوصل عند الكاشير تلاقيه يبتدي لسه هيفكر ياخود ايه ... طب ما انتا كنت واقف من الصبح مفكرتيش هتاخود ليه قبل ما يجي دورك ولا حبكت تنقي قدام الكاشير يعني .... وكل ده وانتا ماسك نفسك وعلى اخرك



والكاشير ام البرود الي في الدنيا كلها ويرد الكلمة على الزبون بعشرة يعني. لو قلتلوا عاوز بيضة. على طول يرد عليك. عاوزها بيضة ولا حمرة ، طب عاوزها بلدي ولا افرنجي مسلوقة ولا محمرة عاوزها كاملة ولا مقشرة ياعمممممم اخلص (( ان الله يأمركم ان تذبحوا بقرة )) متقعدش بقه تسئل عن التفصيل وادق ادق التفاصيل .

والمشكلة كل الوجبات الي قدامك. يا وبر او دبر او مش عارف ايه. رويل وتقول مش مشكلة اي سندويتش. كده صغير. ... اهو الواحد يخش الحمام يعملها بكرامتوا ... وتقعد تستنى كل ده عند الكاشير. ولمن توصلوا تقولوا اديني اي سندويتش لو سمحت طبعاً انتا وصلتلوا خلاص. بس خلاص فعلاً انتا على اخرك ووصلت. لمرحلة ضربات الجزاء الترجيحية .... (( مزنووووووووووق )) وهو. بابتسامتوا الصفره الي تغيظك دي ويقلك لا يفندم مينفعش لازم تختاااار تقوم مشاورلوا على اي صورة فوق منوا وتقولوا. هات من دي. يالله


يجي بقه. على اسئلته الجميلة واللزيزة. عاوزها يا فندم كومبو ولا سندويتش
فانتا تقولوا لا سندويتش
يجي يقولك. ميديم ولا لارج
تقلوا لا سمول. اخلص
يقلك : طب عاوزها ويزززز. تشييييزز. ولا ويذاوت. اتشيززز (( يعني بالجبنة ولا من غير جبنة ))
وتبقى ساعتها عاوز ترد عليه وتقولوا : ياعم ابوووس. اتشيززززك أخلص

طبعاً كل ده وانا ضامم رجليا زي العسكري في طابور الصباح ... واتفاجئ ان الحساب ٢٥ جنية واجري جري بعديها على الحمام. وخلاص واخيراً وصلت لمنطقة الجزاء ... وهوباااا جي اخش ابص الاقي بت صغيرة واقفة مع اختها بيغسلوا ايديهم جوا على الحوض مع ان في حوض برة ... بس انا خلاص بقه على أخري واقول معليش خلاص هيطلعوا اهممم ... واتفاجئ يجيلي واحد بكيرش باين عليهم بابهم ويقلها ها يا دينااا خلصتي ... غسلتي ايديكي يالله اطلعي بقة روحي عند ماما وبيستعبط قال ايه عاوز يخش ويقفل عليه الباب (( ماهي ناقصة )) كل ده ويمكن اكتر بيحصلي ولكن انا لو سنحت ليا الفرصة من البداية اني افلفص كده ولا كده واخش الحمام من غير ماحد ياخود بالوا. بعملها وخاصةً اني دايماً بحب التنويع. مرة مكدونلاز ومرة كنتاكي. مرة هارديز مره فرحات. كده يعني التنويع حلو مفيش كلام

بس بما اني من سكان ٦ اكتوبر
وطريقي محور وكده مع زنقت ووقفت وزحمة المحور فاصبح مفيش قدامي غير المطاعم الي في ميدان لبنان والي تقريباً انا بقيت محطوط عندهم في البلاك ليست ههههه

لكن مع ذلك انا لو حبيت افك مية اعمل ايه... وحكومتنا الرشيدة عملت حساب كل حاجة على المحور وعملين يوسعوا ويبنوا ويكبروا مفكروش في حتت حمام كده عام حتى لو بتذاكر. يعني هل هتبقى ظريفة لمن اركن على جنب. واقف جمب العربية والي رايح والي يجي يتفرج !!

@@@@@@@@@@@@

طيب حتى حمامات المساجد ... مشكلتها بس تخلص الصلاة من هنا يقفلوا الجامع بالضبة والمفتاح من هنا والي صمم المسجد صمم اان علشان تخش الحمام. لازم تخش المسجد الاول وتخش الحمام من جوا ... ده غير نظام. لو داخل لازم تقلع الجزمة بره ممنوع دخول الحمام وانتا لابس الحذاء ... طيب يا اخي. حتى صحياً ازاي اقلع شبشبي او جزمتي واخش البس شبشب او قبقااب ياعالم مين كان لابسوا قبلي وعمل بيه ايه جوا والجراثيم والبكترياااا. عليه اكوام اكوام .... ثم. افرض مثلاً انا لابس الشراب على وضوء وحبيت اجدد وضوئي مجرد تجديد وعاوز امسح على الشراب طب مانتا كده هتخلي شرابي يشرب مية من الارض لحد ما يقول يا بس ... (( على فكرة مفيش مكان في العالم فيه نظام اقلع الجزمة بره الحمام. غير مصر ))

@@@@@@@@

ماعلينا. لكن في المقابل ... وهنا بقه اساس الموضوع
هل يحق للمطعم. انوا يمنع اي حد يخش الحمام عندوا. إلا لمن يطلب طلب او الحمام فقط للزبائن !

يمكن انا بعذرهم. لان احنا عندنا ناس محتررررررررررمة كتيرررر
تبص تلاقيهم دخلوا الحمام وبدل ما يحمدوا ربنا انهم لاقوا مكان يرتاحوا فيه. وعلى الاقل يراعوا الادب العامة او النظافة العامة ... لأ ... تلاقيه يخش ويسيب السفون من غير ما يشدوا ... طب انتا يا بني ادم يا ابن البني ادمين. سايب. الي انتا عملتوا ده لميييييين ... وياترى مستني مين يجي يشد السفون وراك مستني ماماااا تيجي يا حبيبي تشد السفون وراك ولا مستني صاحب المحل. يجي يشدهولك ويديك مناديل ويقلك شوفيتم !! وطبعاً واحد من كتر ماهو مستعجل ونسي. يشد السفون اكيد كمان مستعجل ربنا يعينوا. لدرجة انو نسي يرفع القعدة ده طبعاً. اذا مرششش رشة جريئة وغرق الحمام كلووو !!



فمن ناحية أنا مش قادر ألومهم ... ومن ناحية تانية أنا مش قادر أعذرهم



لذلك بسئل هل يحق للمطعم منع المارة او الناس من دخول حماماتهم
أم لا يحق لهم ويجب مقاطعتهم. فوراً لان دي خدمة اجتماعية وأنسانية وواجب وطني ولازم كلنا نتعاون ؟ لأن الي داخل يعملها ده إنسان مطرررر ومش داخل يهزر ولا كان قاعد فاضي مثلاً وقال يالله خليني بما اني فاضي أخش اسيبلهم تذكااار هههههه

@@@@@@@@
وتحياتي