الموضوع: رحلة الى الاسكندرية ....بالسيراتو

اصدقائى الاعزاء

اول مرة اسفر بالسيراتو من ساعة ماشتريتها وكانت فرصة الاجازة اللى فاتت

انى اطلع يومين لعروس البحر الابيض الاسكندرية :k52: والفرصة الاهم لتجربة قيادة السيارة

على الطرق السريعة

مونت من شيل اللى فى المنيل على اول كوبرى الجيزة وصفرت عداد الترب والساعة كانت 8 صباحا واتكلت على الله واخدت طريق الهرم والعربية محملة 4 افراد بالغين وطفلين وشنطة سفر متوسطة

والطريق حتى البوبات كان زحمة بس مش متوقف ومن بعد البوبات سرت بسرعة 120 كم لخوفى من وجود ردار وكانت اتابع حركة الميكروباص على الطريق اذا هدو هديت واذا زودو السرعة عملت زيهم ...علشان بيبقو عارفين اماكن الردار

المهم ابتديت اجرب التسارع بالعربية وكان سلس جدا وكانت العربية بتكتسب السرعة بهدوء تام حتى وصلت الى 180 كم والعربية تمام لا اهتزازات ولا قلق النوافذ مغلقة والتكيف شغال والسى دى به جورج وصوف بيغنى اغانى عبد الحليم ...

وفضلت مابين سرعة 120 والـ 180 كم (وكان الار بى ام فى سرعة ال180 4100 ل/د ) طبقا لحركة الميكروباصات اللى حوليا وكنت عاوز ازود السرعة عن كده لاختبار العربية مش اكتر بس المدام قلقت لانها كل شوية عينها على مؤشر السرعة وكانت كأنها مؤشر تنبيه السرعة (تن تن تن ...) بلاش ..!! خلينا نوصل بالسلامة

ولقيت كل الطريق هدى وكله ماشى 100 واقل كمان فعملت زيهم وبعد 5 ولا 6 كم لقينا كمين للردار وكنت متوقع انى ممسوك لا محالة ده انا كنت ماشى 180 بس الحمد لله عاديت :D وكان فيه ناس كتير بيسحبو منهم الرخص

فكرة متابعة الميكروباص اتت ثمارها

المهم وصلنا بسلامة الله للاسكندرية وكنت عند نفق الشطبى فى تمام العشرة الا عشرة

يعنى ساعتين الا عشرة دقائق فى قيادة مريحة وتسارع ممتاز وسرعة محدش بيحس بيها الا لما يبص على مؤشر السرعة

ونفس الموضوع فى طريق العودة اتبعت نفس النهج فى متابعة الميكروباص حتى الوصول بسلامة الله للقاهرة

وبمتوسط استهلاك 250 كم للصفيحة

كانت تجربة السيارة ممتعة فى الطرق السريعة وثباتها واتزانها هايل ماشاء الله قلت اشرككم معى فى هذه التجربة استكملا لتقيم السيارة فى السفر