الموضوع: تغيير زيت موتور الياريس

المشاركة الأصلية كتبت بواسطة mbaddar2

معلش اصل اخوك لسه مش خبرة فى العربيات زيكم

ببساطة رحت اشترى مياة رادياتير لقيت مياة تركيز 10% و مياة تركيز 33% و العامل قاللى ال 33% افضل للموتور , و انا عارف انى فيه مياة حمرا و خضرا , ده كان لون المياة احمر من برة الجركن بس لون المياة نفسها اخضر :u_thin1[1]:

على اى حال ايه الفرق, و انا حطيت حبة من المية اللى معايا ازود الناقص , اكمل بيها و لا اجيب جركن تانى افضل
و بجد الف شكر مرة تانبة يا استاذ محمد

بص .. هو الفرق بين الاتنين فى نسبة كيميكالز معينة... هو فيه ناس بتحط الخضرا عادى بس متهيألى الضرر بيبقى على المدى الطويل...وقبل كده مهندس توكيل تويوتا حذرنى من المية الخضرا وقاللى ممكن تبوظ رادياتير الياريس
الميه الحمرا موجودة فى بنزينات التعاون ومصر للبترول ورخيصة

تمام يا استاذ محمد ,و ان شاء الله الناس تستفاد بالمعلومات , سؤال صغير اخير(اخر سؤال ) , حضرتك متعود تغير بنزين فى التوكيل و لا برة , و هل فى فرق كبير فى الخدمة و السعر؟

المشاركة الأصلية كتبت بواسطة mbaddar2

تمام يا استاذ محمد ,و ان شاء الله الناس تستفاد بالمعلومات , سؤال صغير اخير(اخر سؤال ) , حضرتك متعود تغير بنزين فى التوكيل و لا برة , و هل فى فرق كبير فى الخدمة و السعر؟

أغير بنزين ؟
أكيد تقصد زيت

لما كنت باحط شل هيليكس ألترا كنت باحطه فى بنزينة شل ... ومرة خدته معايا التوكيل فى صيانة دورية وخلليتهم

حطوه وخدوا مصنعية وتمن فلتر بس .... لما غيرت لفالفولين باحطه فى مركز خدمة توب جير

سعر الزيت نفسه ثابت والمصنعية كلام فاضى بس فى التوكيل المصنعية أزيد 10 جنيه تقريبا

ميزة التوكيل انك تضمن الفلتر

الف شكر للمرة العاشرة يا استاذ محمد

سؤال اخير تانى عشان انا باهتم بالتفاضيل

1-الصح حل المصفحة عشان حل الطبة و تغيير الفلتر و لا الناس فى التوكيل بتغير الزيت و الفلتر من غير حل المصفحة

و شكرا للمرة المية

المشاركة الأصلية كتبت بواسطة mbaddar2

الف شكر للمرة العاشرة يا استاذ محمد

سؤال اخير تانى عشان انا باهتم بالتفاضيل

1-الصح حل المصفحة عشان حل الطبة و تغيير الفلتر و لا الناس فى التوكيل بتغير الزيت و الفلتر من غير حل المصفحة

و شكرا للمرة المية

ياباشا ولاشكر ولا حاجة كلنا بنتعلم من بعض

بالنسبة للمصفحة أنا عمر ماحد فكهالى فى غيار الزيت سواء فى التوكيل أو بره التوكيل..هيا فيها فتحة للطبة وفيه مفتاح بلقمة مخصوصة بيوصل للفلتر ويفكه
أما لو الصنايعى مش متمكن الا بفك المصفحة فدى مش مشكلة بتتفك وتتركب عادى بس بتاخد لها وقت شوية..ولو كده يبقى بعد مايركب المصفحة تانى يربط لك العفشة بالمرة... وفيه حل تالت فيه ناس بتعمله بس مانصحكش بيه لو الصنايعى مش متمكن وانت مش عايز تفك المصفحة ممكن يشفط الزيت القديم..بس ده متعب ومش مضمون.

الله ينور يا استاذ محمد و اخدت بنصيحتك و جبت المياة الحمرا (اللتر ب 22 جنيه من موبيل)
سؤالين تانيين برضه
1) انا قربة رداياتير اليارس دخت مش لاقى علامة min max زى اى عربية , بس دايمت لما ازود مياة الاقى بعد مشوار الزيادة طلعت من الفايظ(تقريبا) و رجعت لمستوى اول زور القربة بتاعة مياة الرادياتير , هل ده العادى بتاع الياريس , عشان باحب دايما ابقى مطمن عالمياة فى يومين الحر دول
2)انا شغلت التكييف عالاخر لمدة 3 ساعات و لما وصلت و ركنت لقيت مياة كتير بتنقط من اخرام المصفحة قدام و ورا هل ده طبيعى فى الياريس برضع , لانه فى الفيرنا القديمة بتاعتى كانت بتنقط مش كتير كده و من قدام بس

و شكرا للمرة ال 1000

المشاركة الأصلية كتبت بواسطة mbaddar2

الله ينور يا استاذ محمد و اخدت بنصيحتك و جبت المياة الحمرا (اللتر ب 22 جنيه من موبيل)
سؤالين تانيين برضه
1) انا قربة رداياتير اليارس دخت مش لاقى علامة min max زى اى عربية , بس دايمت لما ازود مياة الاقى بعد مشوار الزيادة طلعت من الفايظ(تقريبا) و رجعت لمستوى اول زور القربة بتاعة مياة الرادياتير , هل ده العادى بتاع الياريس , عشان باحب دايما ابقى مطمن عالمياة فى يومين الحر دول
2)انا شغلت التكييف عالاخر لمدة 3 ساعات و لما وصلت و ركنت لقيت مياة كتير بتنقط من اخرام المصفحة قدام و ورا هل ده طبيعى فى الياريس برضع , لانه فى الفيرنا القديمة بتاعتى كانت بتنقط مش كتير كده و من قدام بس

و شكرا للمرة ال 1000

1- انت دايما ماتعديش زور القربة... ده الطبيعى..أكتر من كده مالوش لزمة..وطبعا انت فاهم انك ماتزودش والعربية سخنة
2- طبيعى تنقط من قدام ..لكن ورا دى غريبة شوية...بس بمكن عشان طول الوقت وبتقول انك مشغل ع الأخر ...ودى غريبة برضه انك تشغل التكييف على 4 فى الوقت ده... أنا فى عز شهر 7 و 8 باشغل التكييف على 3 نص ساعة وبعدين أرجع على 2 وبتبقى تلاجة
لو اتكررت والتكييف عندك ضعيف قوى على 2 خللى حد بتاع تكييف عربيات يبص على شحن الفريون