ههههههههههههههههههههههههه فصلتينى ضحك بجد
انا دخلت لقيت لايك فقلت كويس والله ان في بنات بتفهم في الكلام ده ، لسة بقول هييييييييييه لقيتك بتقولى عربى ده :d
عامة الواحد ما عرفش الحاجات دى وخصوصا اسماءها الدارجة بالساهل وجت غصب عن الواحد نتيجة لف كتير وبهدلة مع العربيات ، الحمد لله
بس شكلك مهتمة بالموضوع ، عشان كدة ده مرجع سريع في الصورة اللى جاية للعفشة الامامية كلها ممكن تعتبريه معلومات اثرائية :d
http://i58.tinypic.com/106gewm.jpg
رقم 1 في الوسط من فوق : اسمها الاسكاترا او علبة الدركسيون وده الشيء اللى بينقل حركة الدركسيون الدائرية من فوق لحركة خطية يمين وشمال تحرك العجل تحت
المسافة من 2-3 ده عمود خارج من الاسكاترا او تيش اسكاترا او دراع اسكاترا ده اللى بينقل حركة الاسكاترا ويحرك العجل فعلا
رقم 3 ده نقطة تثبيت تيش الاسكاترا في الشمعدان ( اللى هو رقم 6 ) ولما يتحرك الشمعدان العجلة كلها بتتحرك
رقم 4 تحت ، ده المقص وجنبه في وسط العربية من تحت القنطرة رقم15 ودى بتثبت العفشة في شاسيه العربية وكمان بيبقى في قاعدة سفلية للموتور بتثبت الموتور فيها بالاضافة لان الاسكاترا نفسها او علبة الدركسيون بتتثبت فيها
رقم 5 في طرف المقص دى بيضة المقص وبتركب حشر في الشمعدان وبيقفل عليها مسمار ودى بتسمح لحركة المقص مع المطبات هى والجلبة اللى بتبقى بين المقص والقنطرة
وهى كأنها مفصل بحيث يبقى في مرونة في حركة المقص مع المطبات والارض المكسرة
رقم 6 ده الشمعدان اللى اتكلمنا عليه وواضح انه هو بيلم كل حاجة في بعض يعنى واخد دراع من الاسكاترا عشان يحرك العجل يمين وشمال ومربوط في المقص من تحت ومنه لشاسيه العربية وكذلك من فوق عن طريق المساعد (رقم 12 على اليمين) ومنه للبطاحة رقم 11 لحد نقط التثبيت في شاسيه العربية من فوق
رقم 7 هنا بلية العجل في الشمعدان وبيركب فيها الكوبلن اللى جاي من الفتيس (مش موجود في الصورة ) ده يخلى العربية تمشى والعجل يلف
لو بصينا ع الناحية التانية (الشمعدان من برة ) نلاقى طمبورة الفرامل رقم 8 بتلف مع البلية اللى راكب فيها الكوبلن يعنى بتلف طول ما العربية ماشية لحد ما الكاليبر بتاع الفرامل رقم 10 يضغط ع التيل رقم 9 والتيل يحتك بالطمبورة جامد لحد ما تقف وتوقف العربية معاها
المساعد 12 والسوستة رقم 13 و البطاحة والشمعدان بالبلية والطنابير والكاليبرات كل ده على بعضه الصنايعية بيسموه ركبة كاملة او جنب كامل
بالمرة رقم 16 دراع ميزان او تيش ميزان ورقم 17 ميزان ودول لهم دور مهم في ظبط اتزان العربية في الملفات
اعتقد كدة الدنيا بقت عربي شوية ولا ايه :d :d
وطبعا صاحب الموضوع هييجى يضربنا بالنار دلوقتى :d