بروتون ساجا توكيلها مقرف

**esraa29** · 21-04-2014 04:01 AM

العربيه يا جماعه روحت عشان اعمل صيانه ال5000 بس عشان فات اكتر من 3 شهور من بعد صيانه ال1000 قالي العربية طلعت من الضمان !!!! والمفروض انا عارفه ان صيانه ال5000 ب400 جنيه
طبعا قالولي العربية محتاج يتكشف عليها كلها عشان ندخلها الضمان تاني والكشف ده بيتكلف 950 جنيه وهانعمل للعربيه صيانه السنه لان بقالها سنه معايا ودي هاتتكلف 625 جنيه ...
والكلام ده حصل في التوكيل بتاع ابورواش
ده غير اني مامنه عليها في اليانز ودي شركه تامين تبعهم وانا بشتري العربيه اقنعوني اني اعمل تامين عليها في شركه التامين التابعه ليهم اللي هي اليانز والمرايه كانت اتكسرت في حدثه بسيطه وكنت عايزة اغيرها تبع التامين ...التوكيل قالي تسيبي العربيه لما مندوب شركه التامين يعدي علينا (الي اجل غير مسمي يعني ) ويكشف عليها ويعمل مقايسه وبعدين يقرر اذا تتغير او لا

يعني المفروض الواحد يذاكر الservice book اللي بييجي مع العربيه عشان مايتخمش
سؤال بقي للناس الخبره ؟؟؟
مش المفروض لو انا لسه مغيره زيت موتور للعربيه ومحركتهاش
يتحسب عمر الزيت بالمده ولا بالاستهلاك؟
لان التوكبل بيقول بالمده ولذلك اعتبر عربيتي اللي عملت 5000 كيلومتر في سنه بره الضمان

**tutankhamoun** · 21-04-2014 04:13 AM

زيت العربية بيتحسب بالمدة و الأستهلاك أيهما أقرب .
لأن الزيت لما بيطول في العربية بتتغير خواصه الكيميائية و بالتالي مش بيؤدي نفس الغرض و هو جديد .
شركات الزيوت بتقول 6 شهور و فيه ناس بتقول سنة .

بالنسبة لمشكلتك مع شركة التأمين .
دي ملهاش علاقة بالتوكيل .... التوكيل عنده شركات تأمين كتيرة و مندوب المبيعات هو اللي بيقنعك بوحدة منهم علشان يطلعله نسبة و لكن المفروض أن التوكيل يتصل بالنيابة عنك بشركة التأمين في الحالات اللي زي دي .
و لكن أنتي ممكن تتصلي بشركة التأمين نفسها و تقوليلهم على التلفيات و هايبعتولك مندوب لمعاينة السيارة و الموافقة على تغيير المرايا .
بالنسبة لموضوع الضمان
هو طبعا التوكيل بيحسب الضمان من أول صيانة الألف و يجب مداومة الصيانة هناك أو عند أحد المراكز المعتمدة علشان الضمان يشتغل .
أما تفويت صيانة من الصيانات ....... معرفش بيتعمل فيه أيه .

ممكن تجربي عصام وصفا في مصر الجديدة ....... أو فرع العجوزة و شوفي يمكن يقولوا كلام مختلف .
بس لازم تداومي على الصيانة عندهم .

**tutankhamoun** · 21-04-2014 04:13 AM

معلش سؤال ....... هو صيانة الألف كانت عندهم ؟؟؟

**tutankhamoun** · 21-04-2014 04:15 AM

لو صيانة الألف كانت عندهم و بيقولك العربية خرجت برة الضمان علشان صيانة 5000 تمت بعدها ب 3 شهور
يبقى أستعباط رسمي .
هو أنا مُطالب أقعد ألف بالعربية في الشوارع علشان أعمل كيلومتر و أروح أعمل صيانات ؟؟؟؟؟؟؟؟؟؟
ماذا لو أستهلاكي للسيارة قليل ؟؟؟

**mk3** · 21-04-2014 04:23 AM

للاسف العربية دى منتهيه فى مصر بسبب التوكيل

**kokowasfy** · 21-04-2014 10:48 AM

عربية ممتازة و توكيل تعبان

**walidzakzok** · 21-04-2014 11:25 AM

الساجا فشلت بسبب توكيلها

**Ahmed Eraqy** · 21-04-2014 12:01 PM

المشاركة الأصلية كتبت بواسطة tutankhamoun

لو صيانة الألف كانت عندهم و بيقولك العربية خرجت برة الضمان علشان صيانة 5000 تمت بعدها ب 3 شهور
يبقى أستعباط رسمي .
هو أنا مُطالب أقعد ألف بالعربية في الشوارع علشان أعمل كيلومتر و أروح أعمل صيانات ؟؟؟؟؟؟؟؟؟؟
ماذا لو أستهلاكي للسيارة قليل ؟؟؟

اللى فهمته ان العربية قعدت اكتر من 3 شهور بعد صيانة الالف لحد ما عملت ال 5000 كيلو .... بالرغم ان عندهم حق بس مكبرين الموضوع باستهبال ....... و المفروض انها كانت عملت صيانة ال 5000 بعد 3 شهور من صيانة الالف بصرف النظر عن عداد العربية .... انا عملتها و العربية عاملة 4000 كيلو