شوية اسئلة فى السيراتو الجديدة

**الجنرال** · 21-04-2014 08:18 AM

السلام عليكم ورحمة الله وبركاته

شباب كيا ... رجعتلكوا تاني بعد تجربة سريعة فى الاوروبي ... الحمد لله ربنا كرمني واشتريت سيراتو الشكل الجديد امبارح .. هيا الفئة التانية وكيل موديل 2013 .. للاسف لونها اسود لكن الحمد لله ... عندي شوية اسئلة فيها بقه ومحتاج مساعدتكو ...

1- العربية لسه جديدة ومترخصتش .. على شاشة المعلومات ظاهر كلمة Fuse ON على طول ومش بتروح نهائي .. المشكلة انا مش فاهم العربية عايزة ايه يعني وايه الحل بتاعها

2- ايه اللى المفروض اعمله لحد ما اروح صيانة الالف .. هل معديش سرعات معينة .. مشغلش التكييف ... ولا العربية بتيجي متلينة خلاص وممكن اجري بيها ويشغل التكييف

3- مفيش مكان للاريال فى العربية .. مش عارف ده عادي ولا ايه؟

4- هل ممكن اركب مفتاح ريموت فى التوكيل؟؟ ولو ركبته بره هيخرج العربية من الضمان؟؟ وكذلك البارك سينسور

وشكرا

**الجنرال** · 21-04-2014 08:36 AM

الحمد لله حليت مشكلة Fuse On

عملت سيرش بسيط جدا بشلن من عند عم جوجل ولقيت مواضيع كتيرة (اغلبها على المنتدى هنا) وعرفت حلها .. فتحت علبة الفيوزات وعملتها على On

بجد المنتدى ده احسن حاجة حصلت للبشرية فى تاريخ العربيات ... شكرا نايل موتورز

**said.d.y** · 21-04-2014 08:44 AM

المشاركة الأصلية كتبت بواسطة الجنرال

السلام عليكم ورحمة الله وبركاته

شباب كيا ... رجعتلكوا تاني بعد تجربة سريعة فى الاوروبي

... الحمد لله ربنا كرمني واشتريت سيراتو الشكل الجديد امبارح .. هيا الفئة التانية وكيل موديل 2013 .. للاسف لونها اسود لكن الحمد لله ... عندي شوية اسئلة فيها بقه ومحتاج مساعدتكو ...

اولاً الف مبروك على العربية ، ثانياً لية الاسف على اللون الاسود ؟ طبعاً الالوان مسالة ازواق بس الاسود فى السيراتو موش سىء لدرجة الاسف ، انا شخصياً فضلتة على الفضى والنبيتى ، لون شيك ومتكرهش نفسك فية.....
1- العربية لسه جديدة ومترخصتش .. على شاشة المعلومات ظاهر كلمة Fuse ON على طول ومش بتروح نهائي .. المشكلة انا مش فاهم العربية عايزة ايه يعني وايه الحل بتاعها

دى عادى علشان بيكونوا فاصلين الفيوزات والعربية مخزنة، حضرتك افتح درج الفيوزات ال شمال الدريكسون ناحية باب السائق، هتلاقى مفتاح ON/OFF حركة على ON.
2- ايه اللى المفروض اعمله لحد ما اروح صيانة الالف .. هل معديش سرعات معينة .. مشغلش التكييف ... ولا العربية بتيجي متلينة خلاص وممكن اجري بيها ويشغل التكييف
يفضل السرعة ما تزدش عن 100كم مع مراعاة ان لفات الموتور متزدتش عن 3000لفة، يعنى ما تقرصش على العربية، موضوع التكييف اختلفت فية الاراء، وراىء الشخصى لو تقدر تستغنى عنة او تققل على قد ماتقدر استخدامة ال1000كم يكون افضل.
3- مفيش مكان للاريال فى العربية .. مش عارف ده عادي ولا ايه؟
اريال السيارة مدمج مع الزجاج الخلفى.
4- هل ممكن اركب مفتاح ريموت فى التوكيل؟؟ ولو ركبته بره هيخرج العربية من الضمان؟؟ وكذلك البارك سينسور
اسأل التوكيل الاول، لان طبعاً ممكن يخرجوها برة الضمان، بالنسبة للسينسور سالت التوكيل مرة من شهرين ، وقال انة موش متوفر
وشكرا

**الجنرال** · 21-04-2014 02:50 PM

tiggosaid
متشكر جدا لردك .. انا بس مشكلتي مع اللون الاسود هو التراب (خصوصا اني بقضي ربع عمري على الدائري) بالاضافة الى الخرابيش والنقر .. بتخليها حمار وحشي اسود في ابيض

baherhassan30
متشكر جدا لردك .. انا هروح التوكيل على 1000 وربنا يسهل بقه

حاجة اخيره بقه معلش ..

دلوقتى العربية علشان كانت مركونة .. فالموتور مردوم تراب .. وبصراحة شكله وحش مع عربية جديدة ومضيع فرحة الواحد بيها .. فايه الحل؟؟

مش عايز اروح مغسلة تغسله بالميه .. حاولت معاه بمنفاخ الهوا بتاع شبابيك البيت لكن للاسف برضه مجابش نتيجة

حل عنده حل ؟؟

**OmarEzzat93** · 21-04-2014 02:55 PM

انا عربيتى جبتها اسود سيراتو 2014 رغم انى كان قدامى الالوان كلها بس انا بحب الاسود و زى ما الاستاز tigoo قلك مش تضغط على العربيه اول 1000 كيلو اول لحد ما تعمل صيانة الالف

**baherhassan30** · 22-04-2014 07:49 AM

المشاركة الأصلية كتبت بواسطة الجنرال

tiggosaid
متشكر جدا لردك .. انا بس مشكلتي مع اللون الاسود هو التراب (خصوصا اني بقضي ربع عمري على الدائري) بالاضافة الى الخرابيش والنقر .. بتخليها حمار وحشي اسود في ابيض

baherhassan30
متشكر جدا لردك .. انا هروح التوكيل على 1000 وربنا يسهل بقه

حاجة اخيره بقه معلش ..

دلوقتى العربية علشان كانت مركونة .. فالموتور مردوم تراب .. وبصراحة شكله وحش مع عربية جديدة ومضيع فرحة الواحد بيها .. فايه الحل؟؟

مش عايز اروح مغسلة تغسله بالميه .. حاولت معاه بمنفاخ الهوا بتاع شبابيك البيت لكن للاسف برضه مجابش نتيجة

حل عنده حل ؟؟

اوعى المية يا كينج .. الماتور العدو الخطير بالنسباله المية
انفخة في اي مغسلة او بنزينة كويسة بهواء فققققققققققققققققط
وبعد كده بفوطة على شوية مية ونظفه .. انما غير كده لا
او
وانت بتعمل صيانة الالف كيلو .. قولهم عليه في التوكيل وهما هينظفوه

**Hosam_Optrawy** · 22-04-2014 03:00 PM

الف مبروك

التوكيل بيركب ريموت وإنذار بس معنديش فكره بيركب سنسور ولا لأ

**Mohab555** · 25-04-2014 10:17 AM

الف الف الف مبرررروك يا باشا ربنا يديك خيرها و يكفيك شرها و حمد الله على السلامه بنا تانى نورت بيتك يا كبير
شوف ياسيدى بالنسبه لقصه الريموت اعتقد بيركب فى التوكيل بحوالى 900 جنية ... و الباركنج سنسور ركبه برده عادى مفيش منه قلق لانه مفيش قطع فى فيش او سلوك او حاجة بس ركبه عند حد بيفهم و خلاص ... بالنسبه للاريال هو مدمج فى الازاز الخلفى و ملوش مكان اطمن .. حركه سحريه من كيا على الماشى كده .. ..

بلاش تجرى اول 1000 ك اخرك 120 وبعدها انطلق
اهم حاجة بلاش تضحك علينا عاوزين كام صوره حلوة للعروسه جوة و بره و تقريرك الجميل بقه