رجاء عايز مساعده فى موضوع الجنوط

**fahd101** · 21-04-2014 02:31 PM

السلام عليكم ورحمة الله وبركاته
كل سنه وانتم طيبين بمناسبة شم النسيم

لو سمحتم كنت عايز اجيب جنوط مقاس 14 لعربيتى الفيرنا 2008 علشان اعليها شوية علشان المطبات وهى نازل معاها جنوط 13 المصرى واطيه ومش حلوة وبتغربل مع السرعه
فياريت لو حضراتكم تعرفوا ايه احسن خامة جنوط ( حديد - ونيكل - زهر )
معلش لو السؤال غريب بس انا محتاج اعرف ايه اجسن خامة والسعر فى حدود كام ومنين ممكن اشتريهم اصلى ميضحكش عليا فيهم وهل الكورى بتوع التوكيل ممكن يتباعوا بره .؟؟ علشان قالوا لى فى التوكيل ب 650 الجنط ....!!!!!!!!!! ليه مش عارف

واسف على الاطاله وشكرا لكل اللى هيرد

**Abuessa** · 21-04-2014 05:19 PM

و عليكم السلام و رحمة الله و بركاته
الفيرنلا يركب عليها الجنوط ال14 بتاعة اللانوس و النوبيرا و أفضل حاجة تجيب طقم استيراد اسبور هيعمل من 600-850 للاربع فرد و دى بتبقى جنوط خفيفة و خامتها كويسة

**Mico_Mico** · 21-04-2014 06:42 PM

دى مشاركة عضو محترم فى موضوع كنت انا طرحته حول جنوط الفيرنا المعووجة اللى بتنزل فى الموديلات الجديدة - طبعا عربية حضرتك ال 2008 ملهاش علاقة بالموضوع ده - بس انا قولت تشوف المشاركة دى بتاريخ 9 الشهر اللى احنا فيه:
انا هتكلم عن تجربتى انا وممكن تختلف عن باقى التجارب ولكن انا بتكلم عن تجربة شخصية ..
فى الاول لما جبت العربية كنت احس رعشة عند 100 كدا . قلت عادى ورصص وبرضة نفس الموضوع .. قعدت فترة مبصش على الموضوع لان كل مشاويرى داخل المدينة وطرق زحمة .. لحد ما جيت فى مرة اسافر واذا بالعربية كلها مش الدريكسيون بس بتترج حتى الكراسى عند سرعة 130 .. رحت التوكيل ومن الاخر معرفوش يقولوا حاجة واحد يقولى انت اكلت بلاعة والتانى يقولى انت اخدت حفرة جامدة .. ما عدا واحد ابن حلال ربنا يكرمة اخدنى على جمب وقالى . يا استاذ عندنا فى التوكيل عارفيين مشكلة الرعشة دى وهى بتبقى جنوط معووجة مش منك ولكن لانها صناعة مصرية رديئة ومش هتظبط معاك نهائى وهتحس بالرعشة على طول ..
اخدت بعضى ورحت واخد جنوط سبور 14 من واحد صديقى اجربهم قبل ما اشترى قلت يمكن يكون بيضحك عليا ... جرب يا عم وررصص الجنوط على حسابى طبعا واطلع لقيت العربية كويسة 120 و130 وعند 140 حسيت بالرعشة تانى وقوية برضة مش قليلة رغم انى كنت حاطط رنجات بتاعت صديقى ... ورغم كدا لقيت العربية ناشفة على الطريق والمدقات والنقر وكدا مش عجبانى ومش زى الاول .. رغم الكاوتش كان بريدجستون جديد ..
رحت مكدبتش خبر وقلت بلاش جنوط سبور وكل شوية اخرط رنجات والعفشة نشفت كمان .. لاة خلينى فى الحديد الجنط وربنا يسهل ...
رحت التوكيل قلتلة عايز جنط حديد كورى مقاس 13 .. قالى موجود رحت بصيت علية وعلى الارقام التسلسلية نفس الارقام بتاعت الجنط هى نفسها اللى مكتوب على الكرتونة وطبعا الجنط علية علامة هيونداى محفورة تقريبا جمب البلف او ابعد شوية كدا ... كام يا عم قالى 500 جنية الجنط ... طبعا كتيير اوى اوى اوى .. لما لقانى متردد قالى حضرتك جرب الجنوط الحديد دى وعلى ضمانتى الشخصية وهتلاقى العيب اختفى بتاع الرعشة ... كلامة وثقتة طمنونى .. رحت جايب 4 جنوط ورحت رصصت وطلعت اجرب .. اول حاجة كنت جربتها العفشة .. لاقيتها ناعمة زى الاول بالضبط ومفيش دب فى العفشة ...
طلعت على الطريق اجرب .. بس الله ماشاء الله ولا حول ولا قوة الا بالله ..
اختلاف شاسع ولا تقولى رنجات ولا حوار ركب الجنط ورصص وشكرا العربية الحمد لله اتظبطت وبقت تمام الحمد لله ..
وبجيب بيها السرعة اللى عايزها .. الحمد لله .. بس خد بالك انا كنت مغير الكاوتش ونوعة تويو يابانى مش المصرى اللى كان نازل معاها ..
بيعت الجنوط المصرى الاربعة ب 200 جنية .. يعنى 10 % من تمنة كورى ..
وللعلم المصرى معلوش علامة هيونداى محفورة .. انما الاصلى علية العلامة محفورة

**medo_omara2009** · 23-04-2014 12:01 AM

السلام عليكم ياباشا انا ركبت جنوط 14 وحتلاقي في التابلوه بتاع العربيه او علي الباب حتلاقي مقاس الكاوتش للعربيه سواء 13 او 14 فحاول تجيب المقاس بتاع الكاوتش زي اللي مكتوب عندك انا ركبت جنوط 14 ومقاس الكاوتش المظبوط وركب الرنجات وتوكل علي الله العربيه 10/10 وافتح يا باشا وعدي ال140
كمان ولا تقلق وتوكل علي الله

**fahd101** · 23-04-2014 01:54 AM

شكرا على اهتمامكوا وردكوا بس انا ليا سؤال استاذ ميدو
ايه هى الرنجات دى وعايز اعرف خامة الجنط ايه حديد ولا زهر ولا الومنيوم
وهل بتسبت العربيه فى الفرامل وتعليها .... ؟؟