-
هوندا سيتي vs مازدا 3
صباح الخير على رجالة الهونداويه :)
قبل أي حاجه عايز أقول إني مبهور بكل حاجه موجوده في المنتدى وخصوصا القسم ده ، مستوى النقاش عالي جدا ومفهوش أي فتي والمعلومات مدعمه بتجارب وخبره وقراية كتير ! بجد تسلموا على المستوى الإستثنائي ده !!
ده شجعني إني آخد رأيكوا ، طبعا أكيد فيه مليون سؤال مقارنة إتسأل قبل كده :) ، بس متهيألي ما حصلش قريب مقارنه بين المازدا 3 والهوندا سيتي ! على حد علمي طبعا.
طيب أنا دلوقتي وصلت إني بقارن بين الإتنين دول .. وبالتحديد موديلات 2008 2009 لأن متوسط المبلغ اللي معايا 80 85 ألف ، في الأول عايز أقول إني كان معايا إلنترا 2003 وإضطريت أبيعها ، عربية إعتمادية جدا وقطع غيارها إلى حد ما متوافره ومعقوله.
بس أنا فعلا عايز أركب ياباني ، الكوري مهما كان مستوى الرفاهيه فيه محدود ومكونات العربيات الكوري من حيث الجودة والأداء و العمر الإفتراضي مختلف تماما عن الياباني زي ما كلكوا عارفين.
طيب أنا مش هرغي كتير ، حبيت بس أقول المقدمه دي عشان تبقوا معايا في الصورة :) ، مبدئيا بعد مقارنات كتير استريحت للإتنين دول ، والملاحظات اللي طلعت بيها كالآتي :-
1- اغلب المقارنات بتحصل بين السيفيك والمازدا ، هل ده يخرج السيتي بره المنافسة ؟ بمعنى إن المازدا 3 ما ينفعش تتقارن بينها وبين السيتي لأنها أعلى؟
2- المبلغ اللي معايا ( 80 - 85 ألف ) متهيألي أقدر اجيب بيه موديل 2008 في العربيتين؟ ولا ممكن الاقي 2009 حاجه كويسه؟
3- مش مرتاح تماما للسيتي 2008 ، التغييرات اللي حصلت في ال 2009 زي ما حضراتكوا عارفين مش قليله ، العربيه مختلفة شكلا وموضوعا ، عشان كده بميل أكتر للمازدا 2008 ؟!
4- إنتشار السيتي مقلق اوي ، المازدا زي ما الناس كلها شايفه منتشره اكتر بكتير من السيتي ، هل دي نقطه مهمه ولا كده كده قطع الغيار موجوده وأماكن الصيانه معروفه والإسعار إلى حد ما ثابته؟
5- بالحديث عن قطع الغيار ، بشكل عام تماما ( وأنا عارف إن الأمور ما بتتحسمش بالشكل ده ) لكن توافر قطع الغيار وأسعارها محسومه لصالح مين الهوندا سيتي ولا المازدا 3؟
6- التقفيل الداخلي ، أنا ركبت الإتنين بس مش كتير ، لكن الكلام كله بيصب ناحية السيتي ، تقفيلها افضل وعزل الصوت كمان ، ده غير إن خامات السيتي تكسب لأنها أفضل في الجوده كمان؟
7- الفروق بين المواتير أفتكر إنها مش مهوله ، خصوصا إننا بنتكلم عن عربيتين ياباني ، لكن الهوندا ماتورها طبعا عزمه وقوته أعلى من المازدا 3 ( 118 مقارنة ب 105 للمازدا - نفس العزم تقريبا).
8- صندوق التروس محير كمان ، يعني الهوندا صندوق تروسها اوتوماتيك ومن الأفضل في العالم ، لكن المازدا ستيبترونيك ! المقارنة إلى حد ما صعبه؟
أنا آسف حقيقي ع الإطاله ، بس فعلا الموضوع محير ومحتاج مساعدة حضراتكوا ، خصوصا الأستاذ سامح إللي بدون أي مجامله خلاني أثق في ردوده لأنها ديما من نوعية المختصر المفيد :).
شكرا :)
-
السلام عليكم
الهوندا السيتى 2008 كانت بتنزل مانوال 1300 سى سى ومش هتلاقى منها اوتو كتير 1500 سى سى
علشان كده اقترح عليك 2006 او 2007 كانت بتنزل 1500 سى سى فول اوبشن بما فيها السافتى
المازدا سيارة ممتازة ولكن قطع غيارها أغلى من الهوندا
الهوندا السيتى موجودة بقوة فى السوق ومطلوبة زيها زى المازدا
الأختيار بيرجع للراحة النفسية فقط - مع العلم ان لو هتصين فى التوكيل هوندا أفضل فى الناحية دى
والفيصل فى الموضوع انك تلاقى حاجة حالتها حلوة يعنى افرض لقيت مازدا حالة اى كلام وهوندا حالة استثناءية يبقى اكيد هوندا والعكس - يعنى توكل على الله وانزل اتفرج وادخل على كونتاكت وشوف ايه المعروض واتفرج واللى ترتاح له هاته
ملحوظة فيه واحد على كوناكت كار بيبيع السيتى 2007 ممتازة وصياناتها فى التوكيل وواسمه الدكتور رامى
اتصل عليه - هو عاوز 73 - 75 حاجه زى كده
-
استاذ وليد , مش عارفين نقولك اية الصراحة على المقدمة الجميلة , ربنا يخليك ياباشا دة بس من زوقك الجميل
اولا : طبعا هية المازدا 3 والهوندا سيتى من فئتين مختلفتين لكن هقولك الفرق مابينهم
1- الشكل : طبعا دية ازواق , وعموما الاتنين شكلهم كويس جداااااا
2- الثبات : طبعا المازدا 3 تتفوق فى الثبات
3- الاداء والمحرك : الهوندا سيتى اسرع واستجابة اعلى
4- العفشة : طبعا عفشة الهوندا افضل من عفشة المازدا لان عفشة المازدا ناشفة
5- سعر قطع الغيار : المازدا 3 غالية وحاجاتها غالية جدا, والهوندا سيتى بردة غالية بس مش زى المازدا
6- توافر قطع الغيار : الاتنين متوافرين عادى جدااا ,بس المازدا 3 متوافرة اكتر فى التعديلات بأعتبارها سيارة شبابية بعكس السيتى فهية تميل اللى العائلية
7- الانتشار : الاتنين على فكرة زى بعض فى الانتشار , بالعكس يمكن تلاقى السيتى بقت منتشرة اكتر خصوصا الشكل الجديد من السيتى
8- الخامات والتقفيل : هما الاتنين بلاستيك وانا فى نظرى زى بعض , بس يمكن الهوندا افضل فى العزل
9- الرحابة : السيتى اوسع من المازدا , وخصوصا فى السقف
10 -الاوبشن , الاتنين بردة يعتبروا زى بعض فى الاوبشن لانهم فيهم نفس مواصفات الامان
دية مقارنة مابين السياراتين سريعة
-
السلام عليكم و رحمة الله
انا عضو جديد نسبيا فى المنتدى و سبب دخولى عليه انى بحاول اشترى عربية بقالى 4 شهور
اولا انا بشكركوا على المنتدى الرائع ده و اللى بجد فكرته عبقرية
انا اصلا كنت من ملاك هوندا سيفيك 1997 lxi الاتوماتيك و هى دى العربية الوحيدة اللى سوقتها من 2001 لحد انهاردة
بيعتها لظروف كده ان انا من بورسعيد و العربية كانت منطقة حرة بورسعيد و انا شغلى حاليا فى القاهرة
طبعا عرفت اد ايه من كلام الناس و العامل النفسى ان ركوب الهوندا نقمة و نعمة فى نفس الوقت
اللى معاه اوكتافيا من زمايلى بييجى يفكر معايا اشترى عربية ايه و اول ما بيسئلنى كنت راكب ايه قبل كده و اقوله سيفيك 97 وشه يقلب و يكشر و يقوللى اخخ للأسف مش هاتعرف تركب حاجة ترضيك بعد كده
و فعلا انا نفسيا جربت حاجات كتير بعدها و مش مرتاح لحاجات كتير و خصوصا ان الفلوس اللى معايا بالعافية ممكن يبقوا 70 الف او 75 الف اقصى رقم
انا امبارح روحت شوفت هوندا سيتى 2006 1500 سى سى الفتيس التيبترونيك الاتوماتيك و المانيوال 7 سرعات و المفروض اها اعلى فئة . هى رشة من برة فى التوكيل و دواخل فبريكا و عدادها 150 الف كيلو . انا سوقتها بصراحة و حاسيت لما سوقتها ان العداد ملعوب فيه . مش ممكن يكون 150 الف دى اكيد عاملة 10 الاف بالكتير :)
العربية ناعمة جدا و ممتعة و صاحبها مهتم بيها و حتى بيحط زيت مستورد كده معرفش اسمه بيقوللى بيقعد 15 الف كيلو
هو بيقول اخره فيها 75 الف جنيه و انا حاسس ان السعر ده كتير قوى على سيتى رشة من بره و عدادها 150 الف فانتوا ايه رأيكوا؟
و بصفة عامة ايه رأيكوا فى السيتى الموديل ده لأن فى ناس كتير خوفونى منها و انها ضعيفة و مش عملية و قطع غيار غالية و نادرة و بالتحديد اكتر حاجة خايف منها الثبات على الطريق انا مهندس و بسافر بأسرتى كل اسبوع من القاهرة لبورسعيد - انا صحيح مش بجرى قوى و اخرى 120 او 130 لما اكون شادد قوى بس برده يهمنى ان العربية تكون ثابتة . بس خلى بالكوا برده انا مش متربى على الباسات ولا الاوكتافيا انا اساسا سواقتى السيفيك ال 97 .
برده عاوز اسأل عن الفتيس بتاعها الناس بتقول تحفة بس ممكن يبوظ بسرعة ايه رأيكوا؟
و يهمنى قوىىىىىىىىىىىىى اعرف سعرها الحقيقى ايه فوق السبعين فعلا ولا اقل من كده؟ و هل تقيلة قوى فى بيعها ولا كبيرها خسارة الف ولا الفين؟؟
انا اسف انى طولت عليكوا بس معلش انا اصلى بدور بقالى كتير و اخيرا لقيت العربية اللى عاجبانى بس الناس قلقتنى منها و ملقيتش خالص رابطة لملاك سيتى هنا و ملاقيتش مواضيع حديثة عن السيتى ال 2006 عشان اعرف منها اسعار او حاجة زى كده .
اخر سؤال . اجيبها ولا اجيب نيسان 2007 ؟
شكرا
Content Relevant URLs by
vBSEO 3.6.0 PL2