ارجو الإفادة عن مشكلة في التكييف
العربية تويوتا ياريس وسامحوني لو طولت عليكم شويه
مع بداية الحر شغلت التكييف لقيته بيطلع هواء دافيء .. روحت لفني تكييفات لقي الفريون تقريباً فاضي .. شحن فريون وإختبر الوصلات كلها 3 مرات لقاها مش بتسرب من أي حته .. سألني من إمتى يا باشا مشغلتش التكييف ؟! قولتله من الصيف اللي فات عدا مرتين تلاته في الشتاء لمدة 10 دقايق زي ما الناس نصحتني .. قالي الخوف يكون العيب في الكومبريسور لأنك مشغلتوش من فترة فضغط الفريون بوظ البلف وحاجات كده فنيه مش فاكرها بالضبط .. المهم شغلنا لقينا الكومبريسور يشتغل ثانيتين ويفصل ثانتين ويرجع يشتغل وهكذا .. غيرنا الكومبريسور ونضفنا السربنتينه وغيرنالها فلتر وشحنا فريون تاني وشغلنا الهواء مش ساقع برضو والكومبريسور مش شغال كويس ... قالي الحساس بايظ .. غيرنا الحساس وكله ياباني اصلي ..
بعد تغيير الكومبريسور وتغيير الحساس وتنظيف السربنتينه وتغيير فلترها .. الحمد لله التكييف إشتغل وبقي زي الفل وإن كان مش بنفس الكفاءة الأولانيه لأني مش حاسس إن الهواء ساقع زي الأول لكن كويس ومعقول .. جربته اكتر من مرة في كذا يوم وفي مشاوير طويلة وقصيرة شغال تمام التمام الحمد لله ... النهارده روحت مشوار صغير لمدة حوالي 5 كيلو وشغلت التكييف وكان شغال كويس .. أثناء وانا بركن حسيت الهواء بدأ يبقى دافي مرضيتش أفصل التكييف وركنت وإستنيت شوية مفيش فايده .. واللي قلقني أكتر إن فيه صوت طالع من الموتور أو الكومبريسور أو سير المجموعة ؟؟!! المهم فيه صوت دربكه (طالع من الحتت دي ) بس مش عارف من فين بالضبط .. لما أفصل التكييف يبطل ولما أشغله يشتغل (إحتمال السير ميكونش مشدود مضبزط مش عارف) .. فصلت التكييف وبطلت العربية وانا كلي حزن والم طبعاً ..
من شوية مقدرتش أمسك نفسي ونزلت علشان أطمن .. دورت وإستنيت كام دقيقة وشغلت التكييف على 1 الحمد لله إشتغل معقول ومفيش صوت الدربكة شغلت على 2 الحمد لله معقول .. قولت أطلع آخد لفه بالعربية وأشوف .. أول ما بدأت أطلع صوت الدربكة بدأ يطلع قولت ماشي خليه .. لفيت بالعربية صوت الدربكة موجود برضو والعربية بترج مني أحيانا زي ما تكون عايزة تبطل لكن التكييف شغال وأول ما رجعت وركنت إستنيت شوية .. دقيقتين كده وبدأ الهواء يبقى دافي تاني .. وصوت الدربكة شغال .. فصلت وغطيت العربية .. وطلعت أستشيركم
أنا أعتبر مبتدأ في مشوار العربيات يا دوب من سنتين وقربت أكره العربيات وسواقتها من كتر القرف والمصاريف بتاعتها .. دلوني إيه الحل في المشكلة دي .. ولو حد يعرف فني تكييف محترم في القاهرة يا ريت يدلني عليه وجزاككم الله خيراً ..