سقطت والحمد لله في الامتحان النظري
احكي الحكاية من الأول .. بعد ما اتعلمت السواقة وبقيت تمام والحمد لله قلت يلا بقى الواحد يطلع رخصة سواقة ، أصحابي قالولي يا عم شوف واسطة وناس تانية قالت يا عم كل حاجة تتحل بالفلوس شوف واحد يخلصها ب500 ولا حتى ألف ، أنا عملت فيها خضرة الشريفة وقلت لأ من غير واسطة ولا فلوس أنا هتشاهد وأروح أطلع الرخصة بمجهودي ، المهم يا حضرات عشان ما اطولش عليكم بعد ما طلع عيني في حفظ الإشـارات والعلامات وفي التدريب العملي على حرف إس رحت ويا ريتني ما رحت ، أولاً كنت هناك الساعة 8 قبل الموظفين وقدمت ورقي تمام ، اختبرت بقى النظري امتى بعد تلات ساعات انتظار أخيرا دخلت سيادة الأمين قالي اتفضل على الكومبيوتر هيجيلك 12 سؤال مدة كل سؤال 30 ثانية بدأت الأسئلة هو سؤال يتيم في الإشـارات والباقي في الميكانيكا والمشي بالعربية والشبورة إلخ .. أسئلة شبيهة بالأسئلة اللي على موقع سائق المستقبل المهم في الآخر ألاقي الدرجة 75 في المية وكانت الصدمة ( حضرتك تيجي تمتحن تاني كمان تلات شهور ) .. طبعا خدوا عندكم بقى كلام أصدقاء اسوء ما قلنالك كله بالفلوس أو الواسطة .. أنا قلت أحكي لحضراتكم يمكن اللي يشوف بلاوي الناس تهون عليه بلوته ..
