الموضوع: عربيتك وقيادتك ومشاكلها اشترك معانا وعرف الناس على الجين 2

اشكرك ياستاذ توت جدااااا
واتمنى المشاركه من بقية الاعضاء في هذا الموضوع
وانا هعمل الصيانه واتابعكم يوم الاحد ان شاء الله

1- تاريخ شراء السياره: 18/09/2008
2-السياره عامله كام كلم حتى الان: 1370 كم
3-طريقة قيادتك يعني على السرعات البطيئه قرص ولا قياده هاديه وعادة الار بي ام بيوصل معاك كام في الغيارات: مش بغير قبل 3000 ويوم مابقرص مش بعدى ال 4500 آر بى إم
4- اخر سرعه وصلت بيها كام وكام مره: 110 حوالى مرتين تلاتة معلش بقى انا لسه جديد وبخاف حبتين كمان مفيش طريق يساعد ، الاتوسترد اللى معظم مشيى عليه طريق غبى جدا ً ، انا فكرت أطلع طريق العين السخنة أجرب بس كسلت.
5-السرعات العاليه المعتاده عندك كام: 70-90 كم/س
6-المطبات بتقف عليها ولا بتاكلها على سرعات: بقف طبعا ً
7-طرق مشيك سفر ولا داخل القاهره: سفر.
8-اخيرا حالة السياره ومشاكلها تفصيليا وصوره لها لو امكن طبعا: دة موضوع فيه صور عربيتى ، ودة موضوع فيه المشاكل اللى واجهتها.

بالنسبة للتكيف يا جماعة لما بدوس واللمبة تنور فى البكرتين الأولانيين بيحصل ايه مش فاهم؟.

وبالنسبة لوصلة ال Aux أنا فاكر توت كان عامل موضوع أو مشاركة مش فاكر بالظبط بيشرح فيها طريقة تركيب الوصلة بس مش لاقى الموضوع دة خالص.

اللمبه في البكره اللي فوق دي لمبة الكمبروسور بتاع التكييف يعني لو منوره يبقى التكييف شغال ولو مش منوره يبقى مش شغال يعني يبقى مروحه مش اكتر
واللمبه اللي في البكره اللي تحت دي بتقفل دخول الهوا اللي خارج وداخل للسياره وطبعا دي انا عن نفسي بشغلها اول مابشغل التكييف لانها بتحافظ على البروده وهتلاقي صوت المروحه بتاع التكييف طبعا علية شويه لو دوست على الزرار السفلي ده البكره التانيه يعني عشان بيقفل شفط الهوا من الخارج

ياريت يا جماعه تجارب أكتر وكل واحد يقول كل المشاكل اللي بتواجهه
عشان أنا تقريباً كل مأسأل حد عن العربية دى يقوللي يإما
- جامده موووت وملهاش حل أو - عربيه زي الزفت وندمان إنى إشتريتها

فــ ياريت تجارب أكتر عشان بقيت بسمع عن حاجات غريبة من بعض الناس

ومشاكل في الكنترول يونيت وسمعت عن إير باج إتفتحت لوحدها

وهل لو دي حالات قليله إزاي التوكيل بيتعامل معاها

علشان في ناس كتير نفسها تشتري التحفه Geen 2 :k1: بس خايفه من المشاكل دي ... وأنا واحد منهم

السلام عليكم ورحمة الله وبركاته

انا عربيتى موديل 2008 أوتوماتيك

اللون : sky grey

تاريخ الشراء : 1/9/2008

العداد : 5200

طريقة القياده : هاديه معظم الوقت مش بعمل شد وقرص كتير

المطبات : هنا بقا المشكله, انا مشكلتى انى بفضل كابس عالعربيه لحد قبل المطب بحاجه بسيطه ودى طبعا بتخلينى أدوس جامد عالفرامل وكمان باخد المطبات بعنف شويه

بس انا بجبر نفسى انى أهدى شويه عند المطبات

طريقى 80% منه سريع , من أول شيراتون مرورا بطريق السويس للشروق

استهلاك البنزين مش قادر أحكم بالظبط لأنى بفول عالأخر حتى بعد التكه بتاع فصل المسدس بس هجرب مكملش مع اول تكه وأحسب على كده , بس حسبت قبل كده كان مابين 220 ل 250 كم فى الصفيحه

بس العداد عامل معايا متوسط 7.8 لتر لكل 100 كلم

أكبر سرعه جبتها كانت 160 وأظن لسه ممكن تجيب كمان عشان الدواسه عندى سميكه

المشاكل اللى عندى الطقطقه اللى فى المساعدين ورا وقلتلهم فى صيانة الألف قالو ظبطناها بس ما خرجت سمعتها , مش عارف دى حلها ايه

زرار المرايا تقيل شويه فى الإتجاه الشمال بس فى الصيانه استهبلو وقالو هيا كده

العربيه إجمالا جميله جدا بس مخبيش عليكو بعد ما اتعودت على التسارع بتاعها بقيت بحس انو ضعيف , طبعا انا عارف الأسباب بس ده ناتج من التعود

تكييف فعلا ممتاز جدا وانا بشغله على أول تكه فيه بسقع ومش بيأثر على العربيه خالص


اسف للإطاله