الموضوع: طريق العين السخنه ،،بيقولو بقي عليه تثبيت ،، حد سمع الكلام ده

لذالك نطالب بتكثيف الاكمنة على الطرقات وتكثيف الحملات المرورية المتحركة لضبط الشارع المصري**

‪#‎Bey2ollak‬ ‪#‎CairoTraffic‬ ‪#‎Sukhna‬

تثبيت وقتل على طريق السخنة!

قصة قتل المهندس "محمود النجار" منقولة من صديقه "عبد الرحمن ثروت":
"هذه شهادتي في استشهاد المهندس محمود النجار (نحتسبه شهيد بإذن الله) يوم 22/4/2014.
كنا رايحين ميتنج في العين السخنة, خرجنا من الشركة 1:30 ظهرا من الحي السابع مدينة نصر، وصلنا لبوابة الكارتة وبعد نص ساعة تقريبا وسمعنا صوت صفارة فالعجل وكان الله يرحمه لسه مركب عجل جديد لسة مشتريه عشان السفر.
وقفنا على جنب عسان نشوف في حاجة فالعجل نزل يبص وانا بنزل قالي خليك مفيش حاجة قفلت الباب ولقيته جاي يجري وبيركب بسرعة وبيصرخ!
عربية قفلت علينا فيرنا بيضا واتنين ملثمين معاهم بندقية وكانوا دخلوا ماسورة البندقية بين الباب و شاسية العربية واحنا مش قادرين نقفل الباب وهما مش عارفين يفتحوا وبيخبطوا عالازاز بتاع العرببة وبنحاول ندور وسط الخوف ده وبننطق الشهادة ومحصلش اي كلام منهم ولا قالولنا اي حاجة.
سمعت صوت الطلقة فودني الشمال ووشي من الناحية الشمال كله دم و محمود الله يرحمه ساكت. اول ما الطلقة اضربت جريوا نزلت من العربية اجري الحق احفظ ملامح العربية او ارقامها. ملحقتش لقيت عربية مقطورة الناحية التانية مهدية نزلي التباع بقولة ساعدني الراجل اللي معايا بينزف بنبص علي محمود لقينا الرصاصة كانت اضربت فدماغة شاف الدم وسابني وجري كانت الساعة 2:12 عمال اوقف اي عربية تساعدنا اتصلت بالطوارئ والنجدة حد يغيثنا وببردوا بكل برود اتصلت بيهم اكتر من عشر مرات وبتصل باختة بتشتغل معانا تبعتلنا عرببة اسعاف اي حاجة قولتها عملنا حادثة فالكيلو 60 طريق العين السخنة.
لحد ما وقف شاب بعد نص ساعة تقريبا عمال يتصل هو كمان بناس والاسعاف بس اكتشفنا ان محمود الله مات الرصاصة فجرت الدماغ. جالنا بعد تلت ساعة تاكسي ابيض ونزل منه اتنين شايفين الدم اللي فوشي قميصي في دم بيقولي هما ضربوا عليكوا نار؟ قولتلوا هما مين قالي اصلهم ثبتونا واخدوا مننا الموبايلات.
انا كنت خايف منهم يطلعوا هما او ناس تبعهم. الشاب اللي كان واقف معايا خاف وسابني ومشي. كان موجود عا لارض قدام العربية "فارغ الطلقة وميدالية بمفاتيح وعلبة سجاير مارلبورو صيني". سواق التاكسي بيقولي دى مفاتيحي وسجايري قولتله سيب كل حاجة الحكومة جاية حالاً مفيش حد هايخد حاجة سيب البصمات عليها زي ما هي.
جاتلنا بعد ربع ساعة عربية مرور نص نقل حمرا نزل منها اتنين، بيقولي ايه اللي حصل؟حكيتله واديته اوصاف العربية والناس مكنش معاه جهاز لاسلكي اصلاً، فاتصل من تليفونه يبلغ الطوارئ والاسعاف لأنه كان ماشي ووقفلي بالصدفة لحد ما وصلنا قرايب محمود واخواته قبل الشرطة اللي جت بعد حوالي ساعتين.
رحمك الله يا محمود واسكنك فسيح جنانه
والله كانت الدنيا في يده وليست في قلبه. كان صوام والله محافظ علي الصلاة.
اللهم انتقم لنا وشف صدورنا اللهم اقتص لنا ممن قتلوه. اللهم ابدله دارا خيرا من داره واهلنا خيرا من اهله.اللهم اكرم نزله ووسع مدخلة. اللهم انه كان في طلب الرزق الحلال ومات دون ماله اللهم اكتبه عندك من الشهداء."