هل نحن ملتزمون بقواعد القيادة

**sasatony** · 08-10-2008 05:17 PM

انا الحمدلله بعمل كل ده بس للامانة ساعات ببقي مستعجل فمش بستني حد بس بتبقي اديا علي الكلاكس لو في حاجة علشان انبه لكن الاشارات بستعملها اساسي حتي لو مستعجل وبجري بسرعة يعني

بس ساعات بتخنق من بعض السائقين لما يديك اشارة شمال وتلاقيه دخل يمين ولما تكلمه يقولك وانا جيت جمبك
بس الحمدلله انا مش بكلم حد غير بقول ده كلام او ينفع كده يعني

**ibrahimsaad** · 08-10-2008 06:16 PM

الحمد لله انى من الملتزمين بما ذكرت

والحقيقه انا قبل ان اقود السياره اخذت دوره فى المرور اولا وحقيقى اتعلمت اشياء نظريه مفيده جدا وخصوصا التى تتعلق بالادب والذوق والاخلاق

وبعد ان اخذت الرخصه واشتريت السياره تعلمت عليها عمليا وحتى الان اطبق بالحرف الواحد ماتعلمته بالمرور رغم ان الواقع مختلف تماما عما تعلمته

ولكن احاول بقدر الامكان الا اكون مثل الاخرين الذين لايلتزمون

حتى اصبح الالتزام لدى هو الاصل واصبح عاده تعودت عليها لدرجه اننى ارتدى الحزام وانا واقف وكذلك قبل ان ادير المحرك

وبخصوص السرعه لاازيد عن 40 ك داخل البلد وللعلم انا لست من القاهره يعنى لايوجد لدينا زحام مثلكم والسرعه على الطريق 60 - 100 كحد اقصى لااتعدى ال 100 باى حال من الاحوال حتى لو مستعجل ففى التأنى السلامه دائما
لدرجه اننى باحس ان الناس حواليا مجنونه كلهم مستعجلين وانا بس اللى مختلف عنهم
لكن الحمد لله ربنا ساترها معايا وباقدر اسيطر على العربيه كويس بسبب عدم التسرع اللى هو اساس كل الحوادث فى مصر لان شوارعنا اساسا لاتنفع للسرعات العاليه هذا ناهيك عن المطبات وشعبها للاسف المتخلف وهذه بكل اسف صفه موجوده بيه

لكن الشئ اللى بجد مزعلنى ومخلينى حزين هو الناس اللى فاكرين ان ليهم ظهر فى الدنيا واداهم حق العربده فى الشارع وتكسير قوانين المرور وعدم احترام الادميين وعدم احترام الاخرين

يعنى مثلا لاينتظر عبور المشاه بل يريد ان تنتظره المشاه
من ينظر لمن هو اقل منه بنظره احتقار وتعالى
من يعطى لنفسه حق ليس له ويعتبر نفسه فوق الاخرين
وللاسف كمان المرور عندنا بيحترم دول وبيوقف بس اللى شكله العام من الطبقه المتوسطه
وانا لاحظت ده بنفسى يعنى مثلا انا دكتور جامعى لكن راكب عربيه 128 ومش حاطط عليها اى بادجات فلاحظت ان فيه كمين ووقفنى انا بس وهات رخصك وشافها وشاف الطفايه وقعد يبص فيها ولانى سليم فقالى اتفضل
لكن المؤسف انه وقفنى انا وساب غيرى لان شكل عربيته حديثه وممكن يكون من اصحاب الظهور اللى ربنا هيقصم ظهرهم ان شاء الله يوم القيامه

للاسف هذه الاشياء تجعلنى حزين جدا لان الناس دى فاكره ان بفلوسها وبمنظرها الكاذب بتديهم حق ان يدوسوا فوق رقاب خلق الله

**Samir Elshahawy** · 08-10-2008 11:16 PM

السلام عليكم

تحية طيبة لكل اعضاء نايل موتورز و خاصة للدكتور ابراهيم سعد, و أحب ان اطمئن حضرتك ان مش كل صوابعك زي بعضها و انت مش مختلف و لا حاجة بدليل ان فيه اناس مثلك ملتزمون بالرغم من امتلاكهم لسيارات فارهة أو حديثة , وأبدا لم و لن يكون الالتزام بشكل السيارة و لكن هو سلوك قائدها

العربية احنا اللي بنمشيها مش هية اللي بتمشيني

**puma** · 09-10-2008 01:18 AM

يعني هية جت على قواعد المرور .. لما هم يلتزموا بالقواعد الأول : لما المخالفات تبقى حقيقية و رجال المرور ملتزمين و الشوارع نظيفة و الدنيا مش زحمة و لما يعملوا اللي عليهم نبقى نلتزم و فاقد الشئ لا يعطيه

**Samir Elshahawy** · 11-10-2008 01:47 AM

السلام عليكم

حاجة غريبة جدا , بالامس كنت مسافر الي الاسكندرية و بصراحة شوفت اللي عمري ماشوفته قبل كده

عربيات ماشية علي الشمال بسرعة بطيئة و اللي عايز يعدي يعدي من اليمين او يعدي زجزاج لانك ممكن تلاقي عربيات تانية في اليمين او الوسط ماشية علي مهلها

مافيش مشكلة , اللي عايز يمشي علي مهله يمشي بس يوسع الطريق للي جاي بسرعة في اقصي الشمال لكن كده انا مش عارف ده اسميه ايه جهل و لااستهتار ؟

لو جهل يبقي المفروض ان الناس دي ماتسوقش علي الطرق السريعة دي , و لو ده استهتار يبقي المفروض يتحاسبوا بشدة علشان مايعملوهاش تاني

عارف ان البلد مافيهاش قانون و لا حد يحاسب المخطئين علشان القائمين علي تنفيذ القانون هم اول من يضرب به عرض الحائط

بس ياجماعة دي ارواحنا , حرااااااااااااااام و الله حرام

**shanodaa** · 11-10-2008 01:50 AM

بعد قانون المرور الجديد وغلاء المعيشه الواحد يمشي جنب الحيط احسن له

**Amrrr** · 13-10-2008 04:15 PM

بالتزم على قد ما اقدر

-بشغل الاشارات والانتظار عشان امان عربيتي

-بطفي النور للي جاي في وشي عشان مايتعميش ويدخل في حاجة او يدخل في عربيتي لو هو مؤدب ومش ضارب العالي لكن لو عند معايا بالنور بعند انا كمان (ومعلي الرجلاش بتاع الفوانيس عشان يبقى عند صح )

- مش بعرف التزم بالحارة المرورية عشان بلاقي الحارة في معظم الشوارع واذا لاقيتها ومشيت مثلا على ستين في صلاح سالم المفروض اني امشي يمين هتلاقي اليمين مليان مقالب ( واحد ماشي بعجلة جنب الرصيف - واحد واقف بعربيتة عطلان او لأي سبب - ميكروباص او اوتوبيس واقف او وقف فجأة عشان واحد شاورله وفي داهية الشارع بعربياتة بسواقينها المهم يقف للزبون يركبه او ينزله ودي بتبقى انيل لأن اللي بيركب ممكن تاخد بالك منه وهو بيشاور لكن اللي نازل مش هتحس بأي حاجة غير بالميكروباص وهو بيقف مرة واحد وبمنتهى الغباوة ماهو لو طول سنة صغيرة عن اللي الزبون عايزها هتبقى مشكلة وطبعا اكيد معندوش لمبة فرامل ولا الكماليات اللي بتنور ورا ( الفوانيس واللمبات بتاعتها ) - برضة اليمين مشهور بالبلاعات
ولو التزمت بالحارة اللي في النص مثلا هتلاقي الناس بتيجي من اليمين والشمال وعامل ربكة في الطريق مانت ماشي ملتزم بسرعة ستين وفي حارة ثابتة

- المشاة عامةً سواء مسنين أو لأ اذا كان حالة الطريق تسمح بالوقوف هقف واحذر مثلا اللي على شمالي بايدي مثلا او كدة، حسب ، وعامة انا بهدي لما بلاقي حد عايز يعدي ولو رمى نفسة بقف ويعدي ، ولو محصلشي حاجة اديني ماشي في طريقي عادي بس هديت السرعة شوية ومخسرتش اي حاجة بالعكس وفرت حاجات كتير وحوارات غريبة ممكن تحصل وطبعاً لما بلاقي اللي بيعدي بارد وباصصلي بدور وشي الناحية التانية اوي ببص في المرلية او جوة العربية مثلا المهم اخليه يشوفني مش باصصله وداخل بسرعتي زي مانا وطبعا بيجري ومرة مجريش بس كنت ماشي في وسط البلد وفي آخر لحظة وانا معدي نط من قدامي وقاللي بص قدامك ودا كان بعربية سيات عشان محدش يقول انها سريعة ولا انا كابس عليه لاسمح الله

-في التقاطعات عدم الالتزام بمبدأ الأوليات حتى لو كانت الأولوية لي انا ، التعدية في التقاطع دي حسب الموقف واللي بيبلطج علي هسيبه من مبدأ الأمان للعربية

والموقف دا حصلي بجد : وانا ماشي في الطيران وبقطع الاوتوستراد وهكمل لصلاح سالم والاشارة حمرا وانا بقف خلاص والعربية اللي جنبي برضة غلطان وهيقف ووراة عربية 132 وسايقها معلم او حاجة زي كدة ( هو بجلابية وصوتة طخين وعمال يقوله امشي وخلص يابن *** وحاجات زي كدة ) لسة هبصلة وازعقلة على الكلاكسات وقلة الأدب والاشارة حمرا اساسا لقيت الظابط بيقول عدييييييييييييي
وطبعا الحكاية دي نتعلم منها ان الاشارات مش هينفع الالتزام بيها عشان الواحد يبقى بكرامته ودا بأمر من ظباط المرور !!!طب دلوقتي وانا داخل على اشارة من بعيد اشوف لونها ايه ولا ادور على واحد واقف في الاشارة على جنب بقى او على الرصيف او في اي مكان وادور على ايدة واشوف البيه بيقول ايه وسيبكم من الاشارات والوانها واخضر امشي أحمر قف لا لا لا لا لا - مفيش الكلام دا

**Amrrr** · 14-10-2008 03:27 PM

ممكن الناس اللي عملت الاستفتاء اول اختيار اللي هو ملتزم دائماً !!!
ملتزم دائما ازاي ؟
- حد بيسيبك تمشي في صلاح سالم والأتوستراد على 60كم/ساعة
- بتعرف تقف في اشارة حمراء من غير ماحد يشتمك او يحط ايدة على الكلاكس مايشيلهاش
- لما واحد بييجي في وشك ضارب العالي ومش راضي يطفيه بتعمل ايه ؟
- المشاة طبعا لازم الواحد يلتزم معاهم عشان خبطته تودي في داهية الا بالمراية او بطرف الاكصدام مثلا . . .
انا اخترت ملتزم حسب الظروف

**Samir Elshahawy** · 15-10-2008 12:50 PM

انا ها أقولكم علي موقف حصل معايا امبارح و أنا راجع من الاسكندرية
شاءت الظروف اني ارجع بالليل و طبعا ماكانش معايا عربيتي كنت راجع بعربية تانية ايجار بس نورها مش قوى كنت ماشي 100 - 120 حسب الطريق و امامي عربية في الحارة الوسطي و فجأة شاهدت بحيرة مياه علي الطريق

بصراحة دوست فرامل لحد اول الميه و بعدين شلت رجلي ومسكت عجلة القيادة كويس علشان العربية ماتحدفش يمين و لا شمال لان المياه غطت الزجاج الامامي و لم اعد قادر علي الرؤية

المهم بدأت السرعة تنزل و قدرت أسيطر علي العربية و شغلت المساحات و بدأت الامور تعود الي طبيعتها , و علي الفور شغلت الانتظار علشان احذر العربيات اللي جاية ورايا مسرعة علشان مايحصلش معاها اللي حصل معايا

المهم الموقف ده تكرر علي الطريق اكثر من مرة و لاحظت ان العربيات الملاكي اللي قدامي مابتشغلش الانتظار و لما كنت بشغل انا الانتظار كانت كل العربيات اللي ورايا بتهدي سرعتها و تشغل الانتظار

السؤال الان :
- اليس من الواجب تحذير السيارات خلفك من خطر تراه امامك , ام تدعهم يعانون ماعانيته انت من خطر ؟

- في أي شئ تستخدم اشارات الانتظار اذا لم نستخدمها لتحذير السيارات التي بالخلف ؟

**Amrrr** · 15-10-2008 05:36 PM

المشاركة الأصلية كتبت بواسطة SE_coralsea

المهم الموقف ده تكرر علي الطريق اكثر من مرة و لاحظت ان العربيات الملاكي اللي قدامي مابتشغلش الانتظار و لما كنت بشغل انا الانتظار كانت كل العربيات اللي ورايا بتهدي سرعتها و تشغل الانتظار

السؤال الان :
- اليس من الواجب تحذير السيارات خلفك من خطر تراه امامك , ام تدعهم يعانون ماعانيته انت من خطر ؟

- في أي شئ تستخدم اشارات الانتظار اذا لم نستخدمها لتحذير السيارات التي بالخلف ؟

عشان مفيش نظام وكل واحد واخد السواقة بوجهة نظرة هو اللي اكيد مقتنع انها صح وبالتالي غيرة غلط ، مع انها والله مش عايزة فكاكة
وخد بالك برضة من حاجة معظم الناس بتطلع الرخصة واسطة او بالفلوس وحتى اللي بيتعلم في مدرسة السواقة حتى اللي طلعها من غير واسطة ولا فلوس امتحن ازاي واللي ادالة الرخصة شاف منه ايه عشان يسمحلة يسوق وتسعين في المائة من اللي سايقين عربيات حتى لو بيسوقوا حلو بس محدش عارف قواعد ولا ارشادات (الامتتحان النظري بتاع الرخصة ) اللي محدش عارف عنه حاجة ( انا شخصيا مادخلتوش بس طول مانا ماشي عارف معاني اليفط اللي بتقابلني وبحاول على أد ماأقدر التزم عشان طبعا ممكن الظروف اللي حواليك تخليك مش ملتزم عشان تعرف تمشي في وسط العربيات

بعد دا كلة عايز حد ينبهك ان في مياه على الأرض في الطريق :k48: