قبل كبري الفنجري بالسيراتو - نصائح للحفاظ علي السيارة

**ethan82** · 08-10-2008 12:39 PM

بسم الله الرحمن الرحيم

اخواني عايز احكيلكم عن موقف حصل معايه امبارح وانا راجع من الشغل وكمان بجد محتاج نصائح اذاي احافظ علي عربيتي من البهدله:

اولا : موقف الحادث

خلصت شغلي الساعه 5:30 وراجع من التجمع الخامس ورايح بتنا وقبل كبري الفنجري بشوية واثناء التفاتي ببص علي حاجه جامبي ولسه برجع ابص قدامي لقيت نفسي باصيص في شنطة عربية فيات بونتو نبيتي الطبيعي اني دوست فرامل جامد جدا بس بصراحه يا جماعه بحس ان فرامل السيراتو مش بتسعف وده من مواقف كتير وعن تجربة بصراحه الألنترا بتسعف في النقطه دي جداً. المهم اني طبعا لبست وش في البونتو واخيار العربية وقفت

نزلت وانا منفوخ ومتعكنن

وطبعا اتعكننت اكتر لما لاقيت واحدة هيا الي نازلة من البونتو وقلت يا ويلي مش طالبة سرسعه المهم من الزوق وعلشان اتطمن روحت بصيت الأول بنظري علي عربيتها وكانت الصدمة بجد ان مفيش اي حاجه خالص عندها اقسم بالله والا حتي خدش والست واقفه نفسها تطلع حاجه ومش لاقية ومش عايزة تتكلم الا لما تطلع حاجه المهم بصيت عندي لاقيت النمرة دخلت نصها في الأكصدام وطبعا الأكصدام متشلفط. المهم ان الحمد لله مش حاجه مؤثرة. ودي كانت اول حادثة ليا بالسيراتو

ثانيا: حالة عربيتي بعد 11 يوم من استلامها :

تقريبا داخل علي ال 3000 كيلو و أول امبارح كنت مبدل مع واحد صاحبي ورجعهالي مخبوطة في تحت الفانوس و مخدوشة من الجانب وطبعا امبارح الحادثة الجميلة بتاعتي . كل يوم اقول هروح محطة بنزين اغسلها بس بكسل . فوق تانك البنزين واد الله يسامحه خدشها خدش غبي بمفتاح. أعتقد حتي الأن ده كل حاجه. بصراحه انا حاسيس ان العربية بقالها معاية قرون مش 11 يوم

ثالثا : بجد محتاج نصائح لمعاملة السيارة معامله كويسه

انا سواقتي زي الزفت جري وشد ونكت وهبد وكمان مهمل جدا اثناء القياده يعني بتلفت كتير وبعمل اكتر من حاجه وده طبعا غير عدم الأهتمام بالعربية وبالأضافه الي التهور.

من الأخر اذاي احافظ علي عربيتي واستعملها كويس ؟ وكيف الأهتمام بها؟؟

أفيدوني ومنتظر نصائحكم الغالية.

بعض المعلومات عن العربية :

سيراتو 2008 - أسود - مانيوال (مبحبش الأوتوماتك حتي لو كان ستيب ترونيك)

شكراً
محمد

**human** · 08-10-2008 01:27 PM

كل ده فى حداشر بوم!!!
انت شكلك مبصوص ليك
سييب الاكصدام شويه و متصلحوووش عشان الناس تتهد شويه

وبعدين برده فكر ان هى عربيتك و استمتع بيها و مش تبدل مع حد ولا تسوق عربيه حد

**blazer** · 08-10-2008 01:40 PM

مش شايف مشكله
بصراحه انت المشكله
حد يدى عربيته لواحد صاحبه وانت شاريها مبقالكش 10 ايام!!!
حاول تحافظ على العربىه ومتنساش ان دى فلوسك اللى انت تعبت فيها

**Scent7104** · 08-10-2008 02:14 PM

"نعيب زماننا و العيب فينا و ما للزمان عيب سوانا"

أنا بجد مش قادرة أفهم حضرتك عملت كل الحاجات اللي ممكن تتعمل أو تخطر ببال حد علشان يبوظ العربية !!!

سايق و مش باصص ... و بسرعة و فجأة ضربت فرامل ...و سواقة فحت و جري و شد و هبد ... و في شوارع زي الفل زي اللي عندانا...

و مش بتنظف العربية و مكسل ...

و كمان ما عرفتش تعمل ايه أكتر من كده رحت مديها لواحد صاحبك!!!

أنا رأيي من الآخر أحسن حاجة تعملها علشان تحافظ على العربية انك ما تسوقهاش أو تتعلم السواقة الصح.

**ahmedfd** · 08-10-2008 02:26 PM

المشاركة الأصلية كتبت بواسطة blazer

مش شايف مشكله
بصراحه انت المشكله
حد يدى عربيته لواحد صاحبه وانت شاريها مبقالكش 10 ايام!!!
حاول تحافظ على العربىه ومتنساش ان دى فلوسك اللى انت تعبت فيها

نفس الكلام...

**hamedo0** · 08-10-2008 02:35 PM

يا راجل يا مفترى 3000 كم في 11يوم اتقي الله في نفسك وفي فلوسك حرام عليك الانت بتعمله ده

**ethan82** · 08-10-2008 02:40 PM

ايه يا جدعان واحده واحده مش كده انا عايزكم تنصحوني مش تهزئوني وبعدين كله ضرب ضرب مفيش شتيمه .

يا جماعه انا قلت ومعترف اني مهمل بس للأسف انا اتعودت علي السواقه كده ومعرفش اعمل ايه. وبعدين انا قلت بدلت مش اديتها لواحد صاحبي يلعب بيها يعني. الواحد بلاش يكون جدع مع صحابه ..

ياجماعه الي عنده كلمه كويسه يقولها غير كده ملوش لازمة علشان انا فيا الي مكفيني

**ethan82** · 08-10-2008 02:42 PM

المشاركة الأصلية كتبت بواسطة Scent7104

"نعيب زماننا و العيب فينا و ما للزمان عيب سوانا"

أنا بجد مش قادرة أفهم حضرتك عملت كل الحاجات اللي ممكن تتعمل أو تخطر ببال حد علشان يبوظ العربية !!!

سايق و مش باصص ... و بسرعة و فجأة ضربت فرامل ...و سواقة فحت و جري و شد و هبد ... و في شوارع زي الفل زي اللي عندانا...

و مش بتنظف العربية و مكسل ...

و كمان ما عرفتش تعمل ايه أكتر من كده رحت مديها لواحد صاحبك!!!

أنا رأيي من الآخر أحسن حاجة تعملها علشان تحافظ على العربية انك ما تسوقهاش أو تتعلم السواقة الصح.

شكلك انتي الي كان معاكي البونتو - هما البنات الي بيحبو يقفوا مرة واحده

**Abdo_Eldesokey** · 08-10-2008 04:50 PM

بص يا باشا معروف في المجتمعات الراقية إن الراجل يتعرف من مظهره

يعني مثلا ً الراجل الـ Shoes بتاعه يكون نضيف ومتلمع

العربية بقى نفس الكلام بالظبط ، هيا الواجهة بتاعتك ، أنا لما أشوف واحد عربيته نضيفة أقول ما شاء الله الراجل ده شكله محترم

لما أشوف واحد بقى العربية كلها متخربشة ومخبوطة وماشي ينكت في العربية الانطباع الوحيد الي باخده إن ده شخص مهمل

متزعلش مني ، بس دي نظرتي وأكيد نظرة كل الناس هنا

اعتبر العربية دي زي الـ T-Shirt أو القميص الي انت لابسه ، أكيد مش بتنزل بقميص مقطوع أو مش نضيف ، وأكيد وانت بتقلع القميص مش بتقطع الزراير

عامل العربية بنفس الكيفية وهيا هتبقى عروسة إن شاء الله

**tamera** · 08-10-2008 04:55 PM

علشان تحافظ ع العربية عين سواق بمرتب شهري

الموضوع: قبل كبري الفنجري بالسيراتو - نصائح للحفاظ علي السيارة

LinkBack

أدوات الموضوع

عرض

-

-

-

-

المواضيع المتشابهه

نصائح للحفاظ على الكاسيت السى دى

نصائح مهمة للحفاظ على سيارتك من السرقة

نصائح للحفاظ على تكييف العربيه

نصائح غالية للحفاظ علي الكليتين طوال حياتك

الكلمات الدلالية لهذا الموضوع

المفضلات

المفضلات

ضوابط المشاركة