الموضوع: أول تجربة قيادة لمازدا 3 الجديدة .. موديل 2015

السلام عليكم يا أعضاء المنتدى الكرام

بقالي حوالي سنة مستني نزول مازدا 3 الشكل الجديد .. و من كتر الرفيوهات اللي قرتها عنها و الانطباع الممتاز عنها في أوروبا و أمريكا قولت ان شاء الله أول ما تنزل هبدل عربيتي بيها و اركبها كام شهر اتدلع بيها و بعد كده اسيبها للمدام

المهم العربية نزلت هنا في الكويت يوم الأحد اللي فات .. و روحت اتفرجت على العربية و جربتها

العربية هنا بتنزل بفئتين :

فئة ال 2000 سي سي .. ودي فيها موتور Skyactiv

155 حصان و عزم 200 نيوتن

الفئة دي مجهزة من الأبرة الى الصاروخ ..

الفئة التانية بتاعة الغلابة هي ال 1600 سي سي .. ودي فيها موتور مازدا 3 القديم MZR

107 حصان و تقريبا عزم 145 نيوتن

و دي مفيهاش اي حاجة تذكر من الكماليات .. و ان كنت اعتقد انها في مصر هتنزل أحسن من اللي نازلة في الكويت

المهم

الانطباع الخارجي

العربية تصميمها من احلى العربيات اللي شوفتها في حياتي .. مع ان هنا في الكويت العربيات اشكال و الوان .. بس دي تصميمها رائع بمعنى الكلمة .. و منظر الشنطة الصغيرة اللي ورا ده مديها طابع رياضي بحت ..

الانطباع الداخلي

مع ان العربية كانت مفيهاش اي حاجة تذكر من جوه .. بس خامتها الداخلية جيدة جدا

الكاملة منها بالجلد و الشاشة و الشغل اللي جوه هتبقى ممتازة

وضعية الركوب

انا رجعت الكرسي الأمامي لحد اخره .. و كانت المسافة معقولة .. مش واسعة أوي بس تؤدي الغرض
كرسي السائق مرتفع لأعلى .. جربت نزلته لحد أخره .. بس بردو كان عالي .. مع ان المفروض ان القعدة هتخليك شايف ابعاد العربية احسن بس انا عن نفسي مبحبش اكون قاعد لفوق كده .. ده غير ان دماغي كانت قريبة اوي للسقف .. حاجة رخمة بصراحة

وضعية الركوب للراكب الأمامي كويسة جدا

الكنبة الخلفية مع رجوع كرسي السائق لورا خالص .. بتفضل مساحة معقولة للراكب الخلفي

عايز اقول لكم ان العربية اكبر من القديمة .. فالمساحة الداخلية و شكل العربية اكبر من القديمة

التكييف

ممتاز .. أول ما ركبت روحت مشغل التكييف على رابع درجة (هم تقريبا 7 درجات) .. مفيش دقيقتين و روحت موطيه ل 2

العربية على الطريق

انا عملت التست درايف و التكييف شغال .. دي كانت حاجة مهمة جدا بالنسبالي لأني بشغل التكييف حوالي 9 شهور في السنة .. يعني بالنسبة ليا الأداء لازم اقيمه و التكييف شغال .. اعتقد في مصر الوضع مش هيختلف كتير

العربية يا جماعة سحبها وحش أوي ..
الجير بوكس ال 4 سرعات ده عقيم ..
كنت ببقى ماشي على 20 - 30 مثلا و عايز اطلع من عربية .. ادوس بنزين على اخر الدواسة .. متوقع تنزل للغيار الأول .. مفيش اي حاجة .. مفيش Kick down .. حتى التسارع بيفضل زي ما هو .. كل اللي يحصل ان العربية تفضل تجمع لحد ما توصل السرعة 70 مثلا تروح نقلة على الغيار اللي بعده

حتى الموتور نفسه مش مساعد .. يعني لو الفتيس عمل Kick down .. الموتور ولا هو هنا .. ميديش تسارع اعلى .. كل اللي يحصل ان الموتور صوته يعلى .. و النقلة تطول .. بس

حتى عزل الموتور .. تعبان بردو .. صوته داخلي جوه العربية .. بس بصراحة عزل الهواء على جسم العربية كويس جدا .. ده طبعا بسبب التصميم الانسيابي الرائع

الثبات بقى كعادة مازدا .. محترم جدا .. انا ما جربتش فوق 120 للأمانة .. بس انا واثق انه هيبقى جيد جدا

العربية بردو فيها درسكيون باور كهرباء انما ايه .. دلع .. و لما جريت بالعربية محستش خالص انه خفيف

قعدة السواقة زي ما قولت ما عجبتنيش .. بس يمكن تكون مفضلة عند غيري

في حاجة مهمة للتوضيح .. انا عارف ان في فرق كبير بين قدرة موتور عربيتي و المازدا 3 .. بس انا في مصر عندي عربية فيرنا .. بركبها حوالي شهر في السنة .. اول لما بنزل و بسوقها بحس بحاجتين

اولا .. انها اسرع من عربيتي و خصوصا في طلعتها
ثانيا .. ان في حد ماسكها من ورا وعمال يلعب بيها يمين و شمال .. ثبات في الهوا

يعني اللي توقعته من المازدا 3 انها تكون حلوة في طلعتها لحد 60 او 80 مثلا .. وبعد كده على قد حالها .. و ده الموجود في اي عربية 1600 و صغيرة في الحجم .. مش متخيل ابقى راكب عربية ب 200 الف و تيجي عربية فيرنا تعلم عليا في اشارة

في النهاية

عايز اقول ان العربية دي كان اكرم لها ما تنزلش مصر .. العربية يا جماعة كانت بتتنافس مع ال Audi A3 و ال BMW 4 Series .. على World car of the year

و بردو كانت بتتنافس مع BMW i3 و Mercedes C-Class على World Car of the Year Design award

World Car of the Year: Audi A3 | The Detroit News

يعني العربية بره بتنافس على الأداء و التصميم و السعر

هنا هتنافس على التصميم بس

الأداء في احسن منها موجود .. و السعر حتى في السماء

خسارة فعلا

تحياتي