الموضوع: تبخر الزيت... هل هو حقيقة أم خرافة؟؟

المشاركة الأصلية كتبت بواسطة khmonir

أشكرك على مواضيعك القيمة عن الزيوت واللي أفادتني كتير
والحقيقة فيه موضوع قلقني شوية لكن المعلومة دي طمنتني شوية بس حبيت أسأل حضرتك لزيادة التأكد
عربيتي بولونيز 90 ، اشترتها من 5 سنين تقريباً وكانت عاملة 98000 كم تقريباً
كنت بحط لها شل اﻷصفر وكنت بغيره على 3000 كم زي ما البنزينة قالو لي
المهم السنة اللي فاتت حصل معايا موقف العربية سخنت وأنا سايقها بالليل في الشتا ووصلت الحرارة وأنا ماشي لـ 100 درجة ولما كنت بجري بالعربية تنزل الحرارة لـ 90 درجة
بعد ما قدرت أقف وكشفت على الردياتير لقيته ناقص مياه كتير كملته طبعاً والحرارة انضبطت
بعد كده لاحظت إن المياه بتقل من الردياتير طبعاً في كل مشوار ، لما كشفنا عند الميكانيكي لقينا جوان وش سلندر ...... وغيرناه
وساعتها غيرت الزيت ﻷن وقته كان قرب وغيرت معاه الفلتر كمان ....... طبعاً حطيت شل اﻷصفر زي كل مرة (بس المرة دي اشتريته من محل قطع الغيار اللي جبت من الجوانات والفلتر ..... مش من بنزينة شل زي كل مرة)
بعد كده بكشف على الزيت وانا عند 800 كم لقيت الزيت وصل لنص المؤشر ..... ومشيت بيها لحد ما فوجئت إن الزيت وصل للميني وكملت الزيت بلتر كان معايا وغيرت عند 2000 كم
الميكانيكي غيرلي بكالتكس غيرته عند2000 كم بس مكنش قل إلا حاجة بسيطة جداً
فغيرنا لشل اﻷحمر دلوقتي أنا عامل 1500 كم والزيت بقاله في العربية 11 شهر ﻷني مش بتحرك كتير بالعربية
هل كده معدل طبيعي تبعاً للمعلومة السابقة بتاعة 1 لتر لكل 1000 كم ، وهل مدة بقاء الزيت في العربية له تأثير في استهلاك الزيت
ودلوقتي هل أزود الزيت ﻷني كنت هكمل بيها علشان أشوف معدل الاستهلاك ﻷني خايف ليكون الموتور حصل فيه حاجة من السخونة

شكراً وآسف للإطالة

أشكرك على مجاملتك الرقيقة... أرجو من الله أني أفيدك فعلا..

أولا.. عايزين نتأكد إنك بتستخدم الزيت المناسب لموتور عربيتك زي ما الكتالوج بيقول..

عشان كده لازم تقولنا إيه هي مواصفات الـ3 زيوت اللي حطيتها.. اللزوجة بالذات.


لحسن الحظ.. أحد الزملاء كان جايب صفحة الزيت لكتالوج البولونيز..



حسب الكتالوج.. الزيت المطلوب لعربيتك لازم تكون لزوجته 20W-40 .. ومستوى أداؤه API SD أو أعلى (مع العلم بإن مستوى SD بقى قديم جدا.. وأقل مستوى موجود في السوق حاليا لا يقل أبدا عن SF).

لو ما لقيتش 20W-40.. تقدر تروح على 15W-40...


أنا ملاحظ إنك مش بتمشي بالعربية تقريبا... وكون إن الزيت "المعدني" قعد في الموتور أكتر من 6 شهور.. فده في حد ذاته ممكن يكون سبب في زيادة استهلاك الزيت علشان الإضافات اللي بتساعد على ثبات الزيت ممكن جدا تكون هي نفسها اتحللت.

عموما.. لازم تاخد في الاعتبار إن استخدام العربية بمعدل قليل يعتبر مجهد للزيت.. وكلمة "مجهد" معناها إن الزيت بيتحلل بسرعة نتيجة وجود مركبات كربونية وكبريتية + أبخرة مياه... وكل ده لإن الموتور بيشتغل مدة بيسطة وما بيلحقش يسخن... خاصة مع إزالة ثرموستات الكوعة (اللي أتوقع إنها متشالة في 95% من السيارات القديمة).

عشان كده... لازم تغير الزيت بالوقت.. مش بالمسافة... والمفروض تغير الزيت كل 6 شهور.


عموما ... لو استخدمت اللزوجة اللي موصى عليها في الكتالوج ولقيت إن الزيت لسه بينقص.. لازم تعمل "اختبار كبس" على الموتور علشان تعرف إذا كنت محتاج تغير شنابر ولا لأ (نص عمرة).


...

المشاركة الأصلية كتبت بواسطة khmonir

أشكرك أحي القاضل على اهتمامك
الحقيقة لا أعرف مواصفات الشل اﻷصفر الذي كنت أضعه عند شرائي للسيارة فلم أكن أعرف تلك المعلومات وكنت أضعه لني اعتقدت أنه اﻷفضل
أما الكالتكس فهو sae 40 / api cd وسأرفق صورة له
أما الشل اﻷحمر فهو sae 50 - api sl/cf وسأرفق صورة له

حسب ما أنا فهمت من شرح حضرتك .... الكالتكس ده للديزل ، والشل اﻷحمر ده يغطي احتياجات سيارتي صح ولا أنا فاهم غلط
وأرجو توضيح اﻷنسب لو أن تلك اﻷنواع غير مناسبة للسيارة

شكراً أخي الفاضل

يبدو إني ما عرفتش أوصل المعلومة بالوضوح الكافي..

حضرتك استخدمت زيوت أحادية اللزوجة... ودي أسوأ زيوت ممكن تفكر تحطها في عربيتك...

ليه؟؟

أقوللك..


فيه فرق جوهري بين الزيوت "أحادية اللزوجة" و "متعددة اللزوجة"

الزيوت أحادية اللزوجة هي زيوت عادية جدا.. بتبقى لزجة في الجو البارد وسايلة في الجو الساخن... وفيه منها كذا درجة لزوجة..

جمعية مهندسي السيارات الأمريكية (SAE) عملت مواصفة من زمان بتحدد درجات لزوجة الزيت علشان تسهل على المستخدمين واامصانع اللي بتعملها.. وسمت درجات اللزوحة دي باسمها

فحضرتك هتلاقي زيت مكتوب عليه SAE 30 أو SAE 40 مثلا... ده معناه إن الزيت ده أحادي اللزوجة بدرجة 30 أو 40

وده كويس ولا وحش؟؟؟

الزيوت دي مشكلتها إن استخدامها موسمي.. يعني الزيوت التقيلة تستخدمها في الصيف بس.. والزيوت الخفيفة تستخدمها في الشتا بس.

الزيوت التقيلة درجاتها 30. .. 40 .. 50
والزيوت الخفيفة درجاتها 10. .. 15. .. 20

المشكلة التانية.. إن الزيوت الخفيفة منها بتبقى سايلة لما الموتور يسخن وما بتديش الحماية الكافية..


حل المشاكل دي ظهر سنة 1950... لما اخترعوا الزيوت متعددة اللزوجة..

ودي عبارة عن زيوت خفيفة أحادية اللزوجة بس عليها إضافات بتخلي الزيت يتخن لما يسخن!!!

وبالتالي الزيت يبقى خفيف أول ما تدور العربية.. ويتقل لما العربية تسخن ويحمي الموتور.. وبكده.. تقدر تستخدمه طول السنة

الزيوت دي دايما بيوصفوا اللزوجة بتاعتها برقمين.. الأولاني بيبقى صغير وبعديه حرف W.. والتاني بيقى كبير..

زي كده مثلا.. 15W-40

ده معناه إنه زيت خفيف درجة لزوجته 15.. بس لما بيسخن مع حرارة الموتور بيبقى عامل كإنه زيت سخن لزوجته 40


الرسمة دي فيها مقارنة لدرجات الحرارة اللي أغلب الزيوت بتشتغل فيها..



بص على التدريج اللي فوق.. فيه درجات الحرارة ابتداء من 30 تحت الصفر لحد 50 مئوية

كل خط ومن الخطوط اللي تحت بيقوللك مدى التشغيل بتاع كل درجة زيت...

كده المفروق يكون الفرق بقى أوضح..



حضرتك بقى بتحط زيت تقيل أحادي اللزوجة.. وأكيد بتستخدمه صيف شتا.. وده معناه تدمير شامل للموتور في الشتا. .

ده غير إن حضرتك كمان استخدمت زيت مخصص لمحركات الديزل... اللي بيبقى فيه مواد تنظيف زيادة أشبه بالصنفرة..


المؤكد دلوقتي إن الزيوت دي غير مناسبة لموتور عربيتك..وإذا نويت تستخدم زيوت أحادية الدرجة فلازم لزوجته تبقى SAE 40 على أقصى تقدير... وده في الصيف بس..
وفي الشتا ابقى حط لزوجة SAE 30

والمؤكد كمان إن زيت كالتكس ده ما تقربوش من موتور عربيتك تاني ولا تفكر فيه أصلا.

الأفضل بدون شك إنك تحط زيت متعدد اللزوجة زي ما قلت لحضرتك في المشاركة اللي فاتت... ده بعد ما تتأكد من إن الموتور ما حصلوش حاجة.

ولو إني بصراحة... أشك.


...