الموضوع: تبخر الزيت... هل هو حقيقة أم خرافة؟؟

حضرتك سألت كمية أسإلة كبيرة عايزة موضوع لوحده

وأنا بجد ببقى مبسوط لإن الأسئلة دي بتوضح المعلومة أكتر وبتخليني أحيانا أدور وأوسع معلوماتي علشان أرد وأنا متأكد من المعلومة.

وبعد إذنك أنا هرد على كل سؤال لوحده علشان الرد يكون واضح بقدر الإمكان..

المشاركة الأصلية كتبت بواسطة khmonir

اﻷخ الفاضل borio1704

جزاك الله كل خير أخي الفاضل ، وجعل هذا العلم في ميزان حسناتك إن شاء الله
وأسئلتي فعلاً لحضرتك للتأكد من أن فهمي صح للموضوع
وأشكرك على توضيح الفرق بين الـ 15w40 و الـ 20w50 ﻷني كنت سأتجه له ، وسأتبع نصيحة جضرتك إن شاء الله

الحمد لله إني قدرت أوضح الصورة.. ويارب أكون قدرت أفيدك فعلا.

المشاركة الأصلية كتبت بواسطة khmonir

بس سؤال تاني هو إيه المعدل الكبير لنقص الزيت اللي لو حصل يبقى كده الموتور فيه مشكلة ﻷن الموتور عندي فعلاً يبدو جيد مش بيدخن دخنة استهلاك الزيت ولا فيه تسريبات زيت غير بس البخر على فايظ الموتور والغطا

المعدل الكبير له اعتبارات ليها علاقة بطريقة السواقة ونوع الزيت وحالة الموتور...

في الأحوال العادية .. يفترض إن نقص الزيت يكون في حدود ¼ - ½ لتر كل 5000 كيلومتر تقريبا...

طبعا الكلام ده للوهلة الأولى بيناقض الكلام اللي أنا قلته في الموضوع الأصلي فوق.... ولكن الموضوع موضح إن المعدل الكبير لاستهلاك الزيت بيحصل تحت ظروف معينة من التحميل وسرعة الدوران ولزوجة الزيت .. اللي نادرا ما بتحصل مع حد فينا.

عموما.. حضرتك أشرت لحاجة مهمة جدا.. البخر من فايظ الموتور والغطا...

ده في حد ذاته مؤشر مهم جدا لسبب نقص الزيت.. والواضح إن الموتور عندك خفيف.. يعني إحكام الشنابر مع الشمايز ضعيف.. وبالتالي جزء مهم من ضغط الحرق بيتسرب ويدخل إلى البلوك.. وما لوش منفذ إلا من خرطوم الفايظ... وده معناه إنك محتاج نص عمرة .

المشاركة الأصلية كتبت بواسطة khmonir

السؤال التاني أنا كده الزيت زي ما قلت لحضرتك عند النص هل أكمل الزيت لحد ما أغير ولا مفيش ضرر لو مشيت كده بالعربية (يعني امتى يتم الزيادة هل مع أي نقص ولا لما المؤشر بوصل للميني) سؤالي لمعرفة التصرف الصحيح عند نقص الزيت عامةً وفي حالتي طبعاً خاصة

في الأحوال العادية كنت هقوللك : يا ريت تغير الزيت دلوقتي علطول... وما تخلطش زيوت على بعض.. يعني لو هتزود.. يبقى لازم من نفس نوع وماركة الزيت اللي حضرتك حطيته.

إنما حسب الوضع اللي أنا فهمته... فالأفضل تحط زيت 20W-50 وتحط معاه زيت شنبر (بيقلل من نقص الزيت) لحد ما تعمل نص العمرة...

وعموما... طول ما الزيت بين العلامتين (Min - Max) يبقى مفيش مشكلة.. المهم ما يزيدش ولا ينقص عن كده.

المشاركة الأصلية كتبت بواسطة khmonir

أسئلة بقى للعلم فقط والفهم ﻷن فيها لخبطة شوية عندي:
1- حضرنك انتقدت الزيت اﻷحادي (شل اﻷحمر) وقلت إنه كان لازم يتغبر مع الصيف والشتا .... بس اللي لاحظته من الكتالوج إن درجة الحرارة اللي هما حاطينها للصيف هي دي درجة حرارة مصر صيف وشتا .... أليس هذا يعني أن استخدام الزيت الأحادي الموصى به في الكنالوج لحالة الصيف عندهم يصلح عندنا صيف وستا (طبعاً مع استخدام الموصى به)

أيوه فعلا.. الزيت الأحادي الموصوف في الكتالوج (SAE 30) ينفع صيف شتا عندنا... يس الأفضل طبعا هو الـ20W-40.. لإنه بيكون سائل بما فيه الكفاية مع بداية التشغيل.. ولزج بما فيه الكفاية لما الموتور يسخن.

المشاركة الأصلية كتبت بواسطة khmonir

2- أنا مستخدم SAE 50 وده طبعاً أعلى من الموضى به بـ 20 درجة فكده بقى ثقيل قوي على العربية صح

SAE 50 مشكلته الأساسية في حاجتين..

1- مش هيديك حماية للموتور نهائيا في بداية التشغيل في الشتا بالذات.. وبالعكس.. ده هيكون سبب أساسي في تآكل الموتور

2- في الصيف.. هيحمي الموتور.. بس هيسبب زيادة واضحة في استهلاك البنزين بدون داعي.

المشاركة الأصلية كتبت بواسطة khmonir

3- من مناقشات حضرتك مع اﻹخوة فهمت إن استهلاك الزيت بيكون بمعدل 1 لتر/ 1500 كم أو لكل 1000 كم طيب اللي بيخط زيت يقعد 3000 كم مثلاً هيكون خلص على ما يوصل للـ 3000 كم دول والا في الحالة دي بنتابع ونزود النفص لحد ما نوصل لميعاد التغيير فنغير

طبعا.. لو الزيت بينقص بالمعدل الكبير ده.. يبقى مفيش معنى لتغيير الزيت أصلا.. لإن التزويد المستمر يعتبر تغيير (أو تجديد) في حد ذاته.

معدلات الاستهلاك العالية دي بتحصل في الحالة التالية:
تحميل الموتور بأوزان عالية أو قطر لكرفان مثلا + دوران عالي جدا في حدود الخط الأحمر على عداد الـRPM + استخدام زيت خفيف (حاجة زي 5W-30 أو 10W-30 مثلا).

أغلب الناس اللي بيعانوا من الوضع ده عايشين في أوروبا على الجبال.

المشاركة الأصلية كتبت بواسطة khmonir

4- عدد الكيو مترات اللي بيقعدها الزيت الناس كلها مش عارفاها ودايماً فيه اختلاف بين كل عامل وبايع وميكانيكي .... طيب هو المعدل ده بيبقى مكتوب على العبوة ﻷني دورت عليه على العبوات اللي عندي ما شفتهوش ، ولو مش مكتوب على العبوات بيتعرف منين ..... الناس كلها محتارة في الموضوع ده ... أنا فاهم إن ده بيحدده الـ API زي ما حضرتك شرحت بس أنا أقصد المعدل اللي بيتقال من البنزينات أو الشركات أو الميكانيكية هل له مصدر نعرف منه ولا ﻷ؟؟؟

إن شاء الله هنزل موضوع مخصوص علشان حتة معاد تغيير الزيت دي.. وملخص الموضوع كالتالي:

مفيش حاجة تحدد عدد الكيلومترات اللي الزيت بيقعدها غير كتالوج العربية.. وفي أغلب الأحوال... الكتالوج بيوصي بمسافة حوالي 5000 كم .. مش أقل من كده..

والعربيات الحديثة بتوصي بمسافات بتوصل أحيانا لحد 20 ألف كيلومتر ... وأحيانا أكتر.

وعلى فكرة... لو اخترت الزيت أحسن من توصيات الكتالوج.. يبقى أقل مسافة تغير عليها الزيت هي 5000 كم.

الـAPI مش بتحدد عمر أي نوع زيت.. إنما هي بتحط مواصفة معينة للأداء... مش من ضمنها المسافة اللي بتمشيها العربية... لإن ده في حد ذاته مش مقياس لتحديد عمر الزيت ولا عمر الموتور نفسه.

ومش هتلاقي أي ماركة زيت بتقوللك الزيت ده يتغير على مسافة معينة... لازم بيقوللك ترجع للكتالوج.

شغل الـ3000 والـ5000 والـ10000 ده شغل قديم قوي... أنا شخصيا بحس من الكلام ده إني عايش في سنة 1950.. أيام ما كان الكلام ده فعلا له معنى.

.
.
.

ادخل بردو على الموضوع ده علشان تفهم قصدي.

http://www.nilemotors.net/Nile/477071-100.html

المشاركة الأصلية كتبت بواسطة khmonir

معلش أسئلتي كتير بس بحاول أفهم كويس وكل ما بتابع الحوارات مع حضرتك بيطلع لي أسئلة فاعذرني


وأشكرك مرة أخرى لمساعدتي

أنا تحت أمرك.. ويسعدني دايما إني أكون سبب في مساعدتك ومساعدة الناس عموما.


...

المشاركة الأصلية كتبت بواسطة ahmedz310

الله ينور عليك ويزيدك علم
كان عندي استفسار بسيط
هل من الممكن ان زيت ينقص بسرعة و زيت تاني معدل نقصه اقل رغم ان الاتنين نفس اللزوجة ونفس المواصفات ورغم ان ظروف التشغيل هي هي؟
(وطبعاً تم تجريبهم علي نفس العربية)
يعني اسمع ناس تقول جربت توتال وشيل بس توتال اتبخر اسرع رغم ان الاتنين نفس اللزوجة والمواصفات

أيوة ممكن يحصل.. واللي يفرق أساسا هي أكواد مستوى الخدمة أو الأداء المكتوبة عليه.

وكل ما كانت الأكواد دي مطابقة للمطلوب في الكتالوج كل ما كانت نسبة النقص أقل.

علشان كده بنقول إن اختيار الزيت حسب متطلبات الكتالوج هي الأساس اللي بنبني عليه اداء الموتور بعد كده.


...