مشكلة في سيريون 2000 - يدور المارش ولا تقوم

السلام عليكم،
اشتريت عربية سيريون 2000 من حوالي سنة،
العربية كانت شغالة كويس من أول ما جبتها ولمدة 3 شهور تقريبا لما حصلت أزمة البنزين،
وبعدين في يوم شطبت بنزين واضطريت احط لتر 80 يوصلني لحد البنزينة، وفولت 92 عادي،
وبعدها بيوم تقريبا العربية بدأت تهيس، كل يوم الصبح أدورها ويفضل المارش يلف وماتلطقتش، وأفضل أحاول فيها لمدة ربع ساعة وساعات نص ساعة ومرة فضلت أحاول ساعة كاملة لحد ما تقوم.

المهم لما عرفت أوديها للحرفيين فضلت دايخ وماحدش عارف لها حل ونحط اسبراي مع البنزين ونغير بوجيهات ومفيش فايدة.
كل دا والبطارية سليمة والشحن سليم والكهربا زي الفل.

وبعدين في الفترة دي العربية اتخبطت واضطريت اوديها تتسمكر وتترش وفضلت عند السمكري فترة، وبعدين أخدتها وقلت اظبطها عفشة وميكانيكا وغيرت حاجات كتير، وغيرت البطارية معاهم.
بعدها العربية اشتغلت تمام وبقيت تدور وتقوم كل يوم عادي وحتى سبتها اسبوع ورجعت دورتها وقامت عادي من أول مرة.

وفضلت شغالة كدا 3 شهور تقريبا ورجعت تعمل نفس الحركة تاني، من غير بنزين 80 ولا أي حاجة، هي مع نفسها كدا، تشتغل 3 شهور وتنام 5.
ولا حد عارف هي بتبوظ من إيه وهي اتصلحت قبل كدا ازاي.

في الفترة اللي كانت فيها المشكلة دي أول مرة وحاليا، ساعات العربية بتشتغل لما أخلي حد يدور وأسد بوابة الهوا بإيدي، أو أشفط للبوابة، اللي هي فوق الموتور دي ومتوصلة بالعمة (مش عارف اسمها بوابة الهوا كدا صح وللا لها إسم تاني).

ياريت اللي عنده خبرة في العربية دي يقول لي أعمل إيه أو أغير إيه أو العيب فين.

- فيه ناس بتقول بطارية بس حتى لما باخد توصيلة من حد مش بتقوم، وساعات بتقوم لما تتزق لمسافة طويلة وسرعة عالية بالنسبة للعربيات اللي بتتزق وتقوم من أول كام متر.

- وفيه ناس تانية بتقول مشكلة حساسات وخاصة حساس الidle وبيشاوروا على الحساس اللي فوق الموتور.

- فيه صديق ليا كان قال إنها مشكلة سبراتير وقال إنه سأل ورشة في مصر الجديدة وعرف إنه قابلته نفس المشكلة في سيريون 2007 وبردو دوخته لحد ما لقى الاسبراتير فيه مشكلة ولما غيره اشتغلت تمام، بس انا عندي برده اشتغلت لوحدها من غير ما أغير الاسبراتير.

- طبعا من شرحي واضح إن أنا لسة جديد في استعمال العربيات :) ياريت اللي عاوز يساعدني يتفهم دا ويحاول يشرح الكلام بشيء من التبسيط.