الموضوع: عايز راى اهل الخبرة فى الاسبيروا

المشاركة الأصلية كتبت بواسطة hazemsherif2000

السلام عليكم و رحمة الله و بركاتة
انا بفكر اشترى عربية اسبيروا اتوماتيك 1994
ناس كتير تقولى ملهاش قطع غيار و محدش بيفهم فيها ؟؟
و ناس تقولى لا
عايز اعرف راى ملاك العربية من حيث قطع الغيار
و عايز اعرف رنج السعر بتاعها

وعليكم السلام ورحمه الله وبركاته
اهلا بيك معانا ف المنتدى يا ريس
أولا لو كنت دورت شويه كنت هتلاقي موضوع بيتكلم عن الاسبيرو واي حاجه فيها خد اللينك اهو
http://www.nilemotors.net/Nile/363261-a.html

ثانيا : الاسبيرو عربية جميله ثبات وقوه ع الطريق اقتصادية ف البنزين صالون واسع جدا شنطة واسعه وكمان شكلها مايديش تسعينات
ثالثا : علشان تشتري اسبيرو يبقي اوعى ترمى فلوسك ف الرخيص وتجيب حاجه متهالكه علشان ماتكهرش العربية ف لازم تجيب حاجه فابريكااااااا واهم حاجه الاساسياااات واللى اعرفه ان رنج الاسعار فى القاهرة لو حالة نضيفة بيبقى من 34 الى 36 لو حاجه تعبانة بتبقي ف العشرينات
رابعا : قطع الغيار مين قالك انها مش موجودة اومال العربيات اللى بتمشى دي بتمشى من قطع غيار بلادها لسه ؟!!! عمتا يا ريس قطع الغيار موجودة كتيير سواء استيراد ( شونة ) او جدييد وكمان بيشترك معاها حاجه الدايو الرايسر والسيلو والاوبل والنوبيرا
والله الموفق ولو فيه حاجه عايز تعرفها ادخل على موضوع الاسبيرو وهتلاقي اللى هيساعدك ان شاء الله

المشاركة الأصلية كتبت بواسطة hazemsherif2000

السلام عليكم و رحمة الله و بركاتة
انا بفكر اشترى عربية اسبيروا اتوماتيك 1994
ناس كتير تقولى ملهاش قطع غيار و محدش بيفهم فيها ؟؟
و ناس تقولى لا
عايز اعرف راى ملاك العربية من حيث قطع الغيار
و عايز اعرف رنج السعر بتاعها

وعليكم السلام ورحمة الله وبركاته
بص يا باشا مش مشكلة الموديل 94 او 95 او 96
المهم الحالة والحالة النظيفة في العربية ده مش رخيصة وبتبقى سعرها غالي
طبعا بعد ما تتأكد من دواخلها بالكامل حوض وشنطة وقوايم وغيره تيجي لأهم نقطة في العربيات ده وهي الاكسسوارات التابلوه وفرش الابواب وزراير التابلوه التكييف والمرايات الكهربا والفوجات لأن لو بتتكلم في ندرة قطع الغيار فهي الندرة في الحاجات ده تحديدا
بالنسبة للماتور والعفشة بتشترك في حاجات كتيير مع اللانوس وحاجات كتير مع النوبيرا وحاجات تانية مع الاوبل فكترا فبالنسبة للماتور والعفشة متقلقش منهم وتوافر قطع الغيار جديد واستعمال .
نيجي بقى للسعر العربيات ده من 25 الف ممكن تلاقي عربيه منهم لحد 36 او 37 الف طبعا السعر مبني على الحالة والموديل وعلى فكره هي يا كاملة مانويل يا كاملة اتوماتيك
وعندك الموضوع اللي قالك عليه صديقى عمرو لو احتجت اي حاجة في العربية ده .
بالتوفيق ان شاء الله

طب هى الجنوط الحديد بتاعتها العاديه مقاس كام 14 و لا 15

14 زي بتاعة النوبيرا بالضبط
والكاوتش برده 14/185/65