الموضوع: موضوع خاص ببنات المنتدى-هو لازم نبيع هدومنا عشان نفرح !!

السلام عليكم
مررت منذ أيام باحد الموضوعات المطروحة للمناقشة
عن تكاليف الزواج والعرس والإعداد لليلة الزفاف من
قاعة وفرح وزفة وخلافه....وتكاليف الزواج المبالغ فيها
-----------
تعجبت حقا ....ليه مجتمعنا مجتمع معقد ؟؟
رغم اننا مجتمع مسلم واسلامنا دين سمح وسهل
وبيسهل على كل الناس كل حاجة
ليه ايام النبى صلى الله عليه وسلم و الصحابة من بعده
مكنش فيه عقد فى الزواج ولا كنش فيه بطالة
ولا كنش فيه طلاق ولا قايمة ولا نايمة
ولا سمعنا عن واحد مات أعذب وكان نفسه يتجوز
ولا سمعنا عن واحدة عاشت عذباء وعنست وكانت نفسها تتجوز؟؟
-----
ليه مجتمعنا بيعقد الشباب والبنات وبيعقد الحياه
وبيعقد كل حاجة حوليه؟
ليه المجتمع العربى ميبقاش زى المجتمع الغربى
فى الحاجات الكويسة؟
ليه بناخد منهم الوحش ونسيب الحلو؟
ليه المجتمع بتاعنا بيبص للشاب الى بيشتغل شغلة شريفة متواضعة
انها عيب وميصحش وبرستيج العيلة ومش عارفة ايه
ليه بلدنا بلد الشهادات؟
ليه الشاب الى تخرج من كلية قمة ومش لاقى شغل
يتكسف يشتغل اى شغل متواضع عشان
ياكل وميعش عالة على اهله
ليه البنت الى خريجة كلية قمة
مترضاش بشاب ناجح وطموح وكل ذنبه فى الحياه
انه اتولد فى بلد لا تقدر المواهب ولا الذكاء
فاضطر يشتغل شغلانة متواضعة زى سواق
او مندوب مبيعات او صاحب مشروع من مشاريع الشباب
المتنقلة
او فتح محل عطور ولا مطعم أكل....................الخ !!!
---------------------
ليه المجتمع اجبر العريس على شبكة بالشئ الفولانى
وفرح فى قاعة وزفة وكوشة ودى جى ومغنى وبهلوان .......ومش عارفة ايه
ليه العقد؟
-----------------
هل كل الناس الى عملوا الى المجتمع الزمه بيهم
عايشين فى سعادة وانبساط وراحة بال؟
هل الناس الى قرروا يتحدوا العقد وتقاليد المجتمع عاشوا فى ضنك
وهم وغم؟
---------------------------------------------------
أختى الغالية
ايه المشكلة لو تتحدى العقد وتسهلى على نفسك وعلى غيرك
ارحموا من فى الأرض يرحمكم من فى السماء
عَنِ ابْنِ مَسْعُودٍ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " يَحْرُمُ عَلَى الَّنارِ كُلُّ هَيِّنٍ لَيِّنٍ قَرِيبٍ سَهْلٍ "
أختى جربى تكونى هينة لينة وتهونى على غيرك
كونى سهلة وسهلى على غيرك
ربنا يحرم عليكى نار الآخرة
من يسر على معسر يسر الله عليه فى الدنيا والاخرة
----------------
أختى الغالية يرضيكى ربنا يعذبك؟
ترضى لنفسك بالعذاب؟
(إِنَّ اللَّهَ يُعَذِّبُ الَّذِينَ يُعَذِّبُونَ النَّاسَ فِي الدُّنْيَا) (صحيح مسلم).

انتى عارفة انك لما تعقدى امور الزواج انتى او اهلك
يبقى كدا بتعذبى الشباب ؟ الشباب كلهم
مش عريسك وبس
لأن عريسك دا له اصحاب شباب زيه وعايزين يتجوزوا
طبعا لما يسمعوا انك والى زيك بيحلموا بطقوس زواج مكلفة وباهظة
هيحصل عزوف عن الزواج والشباب
يعيش اعذب ويموت اعذب
--------------------
صديقنى يا غالية الحياه اسهل واحلى من كدا بكتير
وصديقنى لو قلتلك مفيش بنت كلفت زواجها باغلى الأثمان واكبر التكاليف
الا وعاشت تعاسة وغم وهم ونكد وأرف فى حياتها كلها
-------------------------
ليه منعملش كلنا هنا حملة لتغيير ثقافات وعادات المجتمع
فى بنات بدأوا بالفعل يتغيروا وتتغير نظرتهم للزواج واساليب الحياه
وبدأوا يستبدلوا اساليب الفرح الباهظة باساليب موفرة وعملية
ومفرحة فى نفس الوقت
----------
اعرف بنات كتير تزوجوا بأقل تكاليف
شبكة ...عبارة عن خاتم ومحبس
خطوبة فى البيت على الضيق ........اهل العروسة مع اهل العريس المقربين بس
كتب كتاب فى المسجد....
وترجع البيت تكمل فرحتها مع اهلها واهل العريس المقربين
جهاز البيت ....كانت كلها حاجات سمبل وبسيطة
عامل زى فرش المصايف كدا
ولا فيش نيش ولا هاميش
والحياه ماشية زى الفل
وفروا فلوس عفش دمياط فى تكييفات او شفاط للمطبخ
او غسالة محترمة
او مطبخ امكانياته تسهل على ست البيت كل حاجة
ديكورات شقتها عملتها من وحى افكارها هى وعريسها
او دورت على النت وبحثت و تقصت لحاد ما توصلت لأفكار جميلة
ونفذتها على ارض الواقع
----------
مش لازم تفرشى شقتك كلها التلات اوض او اكتر
ايه المشكلة لو تجيبى الاوض الاساسية
زى اوضة النوم والمطبخ واوضة ليفنج تستقبلى فيها ضيوفك
واوضة صالون لاستقبال الرجال
ومش لازم سفرة
ممكن تستبدلى السفرة بطربيزة خشب سمبل وبسيطة
وحوليها ست كراسى عشان لو هتعملى عزومة لاهلك
او اهل جوزك
بنات استبدلوا
البراقع والستاير ..و اختصرتها بستاير بسيطة وشيك
وعملية
دهانات الشقة نفذتها بنفسها هى وخطيبها
ووفروا فلوس النقاشة والذى منه
فستان الفرح...كلفته باقل التكاليف
اعرف الى اشترت فستان فرحها من على النت
بثمن بخس جدا لا يتعدى الف جنيه وفى اسعار اقل من كدا
وفيه الى اشترت قماش بسيط ...دانتيل رقيق ....وكام متر تول
وراحت تفصله عند خياطة متواضعة ....وقفلته بتطريز على ايديها
يعنى متكلفش على بعضه الف جنيه وفيه اقل من كدا
و فى الى عملت فى خطوبتها كوشة فى البيت
ولا احلى من اى فندق او قاعة
جابت كام متر تول على كام متر لمبات زينة
على كام بالونة على كام ورداية
على كام متر ستان
وعملت ديكور فى منتهى الشياكة
وفرحت وفرحت اهلها واحبابها
بس بأقل التكاليف بدون بذخ او اسراف
------------------
فى بنات عملوا فرحهم فى مسجد....وزفة رقيقة بالعربيات
ووليمة العرس ....وفرحت نفسها واهلها
بدون ما تغضب ربها
مش لازم تروحى لصالون تجميل عشان تتجملى يوم فرحك
وتدفعى اد كدا
ايه المشكلة لو تتعلمى ازاى تتزينى وتتجملى عشان تبقى شطورة
وتوفرى؟
كدا كدا ...انتى لازم تتعلمى تتزينى فى بيتك بعد الزواج
يبقى اتعلمى من قبل الجواز احسن
---------------------
طب تعالوا كدا نحسب لو واحد شاب عايز يتجوز ومستواه متوسط
وعايز يتجوز ويتهنى ويتبسط مع عروسته هيكلف كام؟
شبكة متوسط ...من الفين الى 3 الاف جنيه
+
اوضة نوم عمولة متوسط 5 الاف او 6 الاف ج
+
اوضة ليفنج عمولة متوسط الفين ج
+
مطبخ من 3 الى 4 الاف ج
+
صالون سمبل وبسيط عمولة متوسط 3 الاف ج
+

اجهزة كهربائية ...متوسط من 5 الى 7 الاف ج
+
لمض وكهرباء الشقة متوسط ...الف الى الف ونص
+
مهر مثلا حوالى الف جنيه
+
تكاليف المأذون حوالى 300 او 500 ج
+
تكاليف فرح فى مسجد ...بدون وليمة بعصير وشيكولاتة متوسط من 700الى الف ج
+
لو وليمة ممكن تكون متوسط 3 الاف ج
+
فستان العروسة متوسط الف ج
+
لو فرضنا هيقضوا شهر عسل ظريف
افضل شهر عسل ممكن يبقى فى بلكونة الشقة
يعنى لو العروسة الجميلة تعمل قاعدة ظريفة فى البلكونة
وفيها شموع وورود وقلوب وبلونات واكلة حلوة
ايه المشكلة؟
ولو عايزين يسافروا مكان يغيروا جو ويتبسطوا
فى اسكندرية -بورسعيد-الاسماعيلة
ممكن الفسحة دى تكلف فى متوسط
500 الى الف ج

يعنى اجمالى تكاليف اى جوازة بسيطة
فى الزمن دا
هيكون فى متوسط

من 15 الف الى 20 الف تقريبا
طبعا دا غير تكاليف الشقة نفسها
سواء كانت ايجار او تمليك
------------------
ايه رأيكم يا بنات موافقين على الحملة؟؟؟؟

بس متقوليش مجتمع مسلم

بص حواليكى كويس احنا واخدين من الاسلام اسمه بس

احنا بنطبقه فى الزواج اقصد يعنى كتب الكتاب الشرعى عند المأذون
و كمان ساعات بنطبقه فى الميراث و فى حالات الوفاه و الدفن الشرعى

طيب و الباقى المعاملات و التجاره و ...... و كتيييير

ده احنا بنتخانق مع بعض علشان نسوى الصف فى الصلاه

إن الله يقيم الدولة العادلة وإن كانت كافرة ولا يقيم الدولة الظالمة وإن كانت مسلمة