انا عضو جديد اسمى احمد ومبهور واللة اوى بالموقع الجميل دة ويا رب دايما فى ازدهار انا بقالى 3 شهور او اكثر بقارن جين ولا اكسنت ودة يقول ماليزى وحشة وعفشة مش اوى وبتستهلك بنزين وتقفيلها زفت بس انا مش عارف والنيو اكسنت انا بصراحة ركبتها تقفيلها تحفة وناعمة بس مسقتهاس على طرق سريعة فيا ريت اهل التجربة والخبرة يقولى مقارنة بين السيارتين من حيث الاتى
1- المميزات (كل شىء صغير وكبير فى العربية ادق ادق التفاصيل)
2- العيوب (اهم حاجة بردة الدقة فى التفاصيل)
ولمنتدى البروتون جميعا جزيل الشكر
اخى الفاضل
بالنسبة للبروتون لازم تتقبل شوية عيوب قبل ماتشترى لانها دايما بيطلع فيها عيوب تقفيل
من حيث الكماليات الجين 2 تتفوق على النيو اكسنت بمراحل
من حيث قوة الصاج طبعا الجين 2 تكسب
من حيث سعر اعادة البيع الهيونداى يكسب طبعا
اعتقد ان دى الحاجات الاساسية و الباقى تقدر تحكم عليه بالتجربة بنفسك
العربيتين كويسين وزي الفل
*الجين 2 غنية بكماليات اكثر من النيو اكسنت ... كمثبت السرعة و الاير باجز و الاي بي اس ..
* اعتقد ان الجين 2 الكاسيت بتاعها اوديو سي دي .. بينما الاكسنت ام بي 3 + وصلة لتوصيل الفلاشة او البلاير الي الكاسيت مباشرة
*الصالون تقريبا متماثل في العربيتين .. مساحة كافية من الامام .. و ضيق الي حد ما من الخلف .. الاكسنت ( كنزة ) شوية عن الجين 2 .. بينما الجين 2 مجال الرؤية الخلفية فيها اسوأ من الاكسنت نتيجة لدرجة ميل البربريز الخلفي ...
*الجين 2 صاجها قوي زي ما اخويا احمد صيام قال فوق .. لكن الاكسنت صاجها مش ضعيف .. بل ممكن اقول انها من افضل عربيات هيونداي من ناحية الصاج ..
* العربيتين ( كشكل ) فيهم نفحة رياضية .. لكنها بالطبع اكثر ظهورا و تميزا في الجين 2
* الاكسنت من الداخل شكلها كلاسيكي الي حد ما ... تابلوه بيفكرني الي حد كبير باللانسر ..و يحتوي علي العديد من اماكن التخزين في التابلوه و جيوب الابواب
*الجين 2 ..التابلوه اكثر رياضية .. و اكثر روشنة .. و شكل عداداتها حلو جدا .. و دريكسيونها ظريف اوي .. يعيبها في هذه النقطة ( من وجهة نظري ) عدم وجود درج للتابلوه
*بالنسبة للثبات .. ملاك الجين 2 بيشكروا فيها جدا ..و بيقولا فيها كلام كويس جدا
و مسمعناش حد اشتكي من الاكسنت ..شخصيا ..انا وصلت بيها 130 و كانت ثابتة كويس ( و قصدي بالثبات ليس السير علي خط مستقيم .. و انما القدرة علي المناورة علي هذه السرعة .. و بعد 130 خفت اكمل )
*سمعنا عن بعض مشاكل التقفيل في الجين 2 .. و سمعنا ان التوكيل بيصلحها ... لسه مسمعناش عن مشاكل تقفيل في الاكسنت باستثناء ( اتلكاسيت و الانذار ) لانهما الوحيدان اللي راكبين بايد مصرية .. و اي مالك لسيارات هيونداي بيبقي عارف انه حيصلح السنتر علي الاقل في ال 6 شهور الاولي .. و برضه التوكيل بيصلحه بسهوله و ببلاش .. و اذا كنت ساكن قريب من مصر الجديدة و ما حولها .. فممكن تعمل الكاسيت او الانذار عند عشم نوار في شارع دمشق .. و في الضمان برضه
* محرك الاكسنت ..استجابته افضل من الجين 2 .... خاصة علي السرعات المنخفضة .. و الاتنين استجابتهم هايلة علي السرعات العالية ..و عزمهم مش بيقل بعد ال 100 .. بل بالعكس .. بتحس ان هي دي المنطقة الي بيشتغلوا فيها كويس .
*تكييف الجين 2 كويس جدا ( بس لما ركبتها جالي احساس ان فتحات الهوا مختلفة عن بعض في قوة توزيع الهوا ) ممكن تكون دي في العربية اللي كنت راكبها بس ..
تكييف الاكسنت قوي جداجدا.. و بالفعل كفء.. و يساهم في ذلك صغر حجم المقصور نسبياعن الجين 2 .. و ده بينعكس علي قلة الوقت اللازم لتبريد السيارة ..
*الانتشار .. الجين 2 انتشارها مش بطال .. و اعتقد انها بتنتشر بنسبة الي حد ما - ثابتة - بينما الاكسنت - في الشهور القليلة السابقة - اخذة في الانتشار بقوة .. و فعلا بقيت اشوفها كتير في الشوارع .. شارعنا لوحده فيه 2 فيراني + 3 كحلي ( الامورة بتاعتي واحدة منهم )
* اعتقد ان العزل في الجين 2 افضل من الاكسنت .. لكن الاكسنت صوت محركها اقل من الجين 2
---------------
ده اللي ممكن اقول لحضرتك عليه دلوقتي
لا تنسي استخارة الله عز وجل
و ربنا يوفقك لما فيه الصواب
*اضافة بالنسبة لهذه النقطة ..اقتباس:
المشاركة الأصلية كتبت بواسطة Hassan Khalil
ان الجين 2 فيها كوتسول في المنتصف بين الكرسيين الاماميين ..عبارة عن مساحة تخزين و يعلوه غطاء يستعمل كمسند للذراع ... مساحة التخزين فيه كبيرة .. و ممكن تحط فيع سيديهات بالعلب بتاعتها
* بينما الاكسنت تحتوي علي مساحة تخزين كبيرة في الابواب ..سواء في جيب التخزين الموجود في الباب من الاسقل .. او الجيوب الصغيرة الموجودة بجانب اكرة الباب الداخلية .. و ممكن لهذه الجيوب الصغيرة ان تسوعب موبايل من الاحجام الكبيرة
لو مكانك هتغاضي عن عيوب التقفيل في الجين 2 و اشتريها