سن العروسه

**mustafavet** · 04-05-2014 04:41 AM

البنات في الاقاليم والقري والنجوع بيتجوزوا بدري لانهم معروفين النسب والاصدقاء
في المدن الكبري الحال يختلف قليل ان تجد جار يعرف جارة وتوجد بعض العائلات المحافظة جدا في الاختلاط وبالتالي دول فرصهم قليلة في الزواج
وعليه فقد تجد بنت في مدينة ذو مواصفات عالية تاخرت ف الزواج عن بنت في قرية تكون اقل في تلك المواصفات

**shiko85** · 04-05-2014 08:18 AM

مش معنى ان سنها كبير يبقى مش جميله
من فتره طويله روحت فرح زميل اخويا فالشغل و كان فيه بنت جات سلمت على اخويا و الناس اللى معانا على الترابيزه (كلهم زمايل فالشغل) و كان اخويا فالوقت ده بيدور على عروسه و لفت نظرى جدا انها ما شاء الله فمنتهى الجمال و كمان كان باين من كلامها و من الأسلوب اللى سلمت بيه (سلام عليكم و طبعا من غير سلام البيد ) و انها دورت على البنات اللى معاها فالشغل و راحت تقعد معاهم انها مؤدبه جدا غير ان لبسها محترم جدا جدا فسألت اخويا عليها اكدلى ان كل اللى فالشغل بيشهدوا لها بالأدب و الأخلاق و التربيه و الأحترام و انها كمان من عيله كبيره و معروفه قلتله ما تتقدم ليها قالى يا ريت بس هى عندها 28 او 29 سنه و اخويا كان فالوقت ده 25 سنه بس سبحان الله اللى يشوفها يقول 21 او 22 بالكتير
و زميل ليا كان بيدور على عروسه و شاف كتير جدا جدا و فالأخر ربنا كرمه بأنسانه محترمه جدا و اتجوزوا كان هو 31 و هى 29 تقريبا و عنده ولد دلوقتى
الموضوع كله نصيب

**Mohamed_Hamid** · 04-05-2014 09:59 AM

اخى الكريم:
الجمال مطلوب ولا خلاف. فلا يوجد رجل لا يحب أن تكون زوجته على قدر من الجمال. لكن ما هو الجمال؟ الجمال أن ترى المرأة على شئ من الحسن من الظاهر والأهم أن تكون كذلك حسناء من الباطن فهذا هو الجمال فعلا. اذا أمرتها أطاعتك حتى ولو كان على خلاف هواها. واذا غبت عنها صانت عرضك. تحب أهلك وتكرمهم كما تكرم أهلها وتحبهم ( مش لازم بنفس المقدار 100% لكن تحبهم وتكرمهم )
سؤال: لو كل واحد فينا ساب البنات اللى عمرها عدى 27 او 28 او 30؟ البنات دول من هيتجوزهم وهيعملوا ايه؟!!! والله كثير منهم جدا بنات زى الورد ولا يعيبهم اى شئ الا ثقافة المجتمع المتخلف الذى نعيش فيه.

**Ahmed abdkarim** · 04-05-2014 10:58 AM

الموضوع ملوش اى مقياس خالص فى واحده جارتنا

جميلة جدا ومن عيله كبيرة جدا جدا و غنية جدا جدا ولغاية دلوقتى متجوزتش سنها حوالى 35 سنة

**ahmedteam** · 04-05-2014 11:31 AM

و طبعا بعد كل الكلام الجميل ده لا تنسى

لاتحزن اذا فاتك قطر الزواج فأن يفوتك القطار خير من ان يدهسك

**mostafa3000** · 04-05-2014 11:38 AM

نصيحة ومن الاخر فرق السن من الافضل الا يقل عن خمس سنين وكلما زاد كان افضل

**canner** · 04-05-2014 11:53 AM

لا يجب ان يكون العمر فى المقياس الاول فى الزواج فهناك حاجات اهم بكثير و اهمها الراحة النفسية و العقلية

**hhhhhm** · 04-05-2014 12:32 PM

والله يا جماعه أنا شايف أن الموضوع مالهوش قواعد ثابته يعنى ممكن تكون الأكبر منك أفضل من الصغيره وممكن العكس يعنى كل واحد يشوف هو بيرتاح مع مين

**mmohamed15** · 04-05-2014 01:12 PM

الاراء متباينه جدا و كل واحد ليه وجهه نظر تحترم بغض النظر ان البنت حلوه او لأ بس من الواضح ان السن عامل مؤثر جدا و اساسي في الاختيار

**prof2013** · 04-05-2014 01:38 PM

انا بالنسبالي السن مش فارق معايا خالص
يعني لو اتعرضت عليا واحده اكبر مني سنا بس مش كتير يعني بسنتين تلاته كده بس متوفر فيها المواصفات اللي انا عايزها يبقى ليه لاء ؟؟
فيه بنات كبيرة في السن بس مش بيبان عليها وده مربط الفرس
وفيه بنات صغيرة في السن وتديهم 100 سنه يبقى ايهما افضل ؟؟
طيب انا مره عجبتني واحده قمر قمر يعني .. اتصاحبت عليها بحيث اطلب ايديها بعدين وبعد فترة من التعارف افاجأ ان عندها 37 سنه وعندها اولاد قي ثانوي ههههههههههههههههههههههه
اندهشت ومكنتش مصدق نفسي شكلها تديله 20 سنه
بس ايه قمررررر