شوارع رئيسية بدون عبور مشاة+عدم وجود اشارات مرور=ناس ارواحها في خطر

واحد من الشوارع دي هو جامعة الدول من عشر دقايق بالظبط قاعد عادي فجأة سمعت صوت احتكاك عجل العربية بالاسفلت(بتزحف) بس صوت كان عالي بطريقة و كان صوت طويل و صوت حاجة اتهبدت هبدة رهيبة (انا ساكن في الدور ال17 و الصوت عندي كان عالي عندي) طلعت البلكونة اشوف في ايه ﻹن كان في صوت واحد بيصرخ من الالم و صونه كان واصل لعندي.بعد ما خرجت لقيت عربية سيراتو مطيرة واحد كان بيعدي الشارع(كان جنب الحتة اللي العربيات بتبقي راكنة فيها صف تاني) طبعا الشارع كله إتلم و الراجل صاحب العربية مهربش و فضل و اقف و الاسعاف مكملتش 5دقايق و كانوا وصلوا و شالوا الراجل.انا دلوقتي مش عارف هو الشارع ده ليه نفق مشاه و احنا مش واخدين بالنا مثلا؟ولا من شارع السودان لحد آخر احمد عرابي او عند شارع النيل مفيش ولا اشارة(بإستثناء اللي عند مصطفي محمود اللي معمولة اشارة و عبور مشاة في ناحية واحدة بس) ده غير التخطيط المعفن اللي بيعملوه كل كام شهر مرة من السنة اللي فاتت و ميكملش اسبوع و تلاقي الخطوط مش موجودة.والحتة اللي اتفاجئت انها عبور مشاة و مكنتش مصدق ساعتها هيا الحتة اللي عند الجزيرة اللي بين شارع شهاب و شارع محي الدين ابو العز بقت موقف ميكروباصات و اوتوبيسات وبيبقوا واقفين صفين و طبعا مش شايف العربيات اللي جاية من ورة و كذا مرة كنت هتداس بسببها زائد إن الميكروباصات و الاوتوبيسات فجأة يطلعوا عليك هجم قال يعني بيهوش اللي واقف قصاده فاكر نفسه روش الجزمة.
الواحد ممكن يعمل ايه علشان يعدي الشوارع دي بأمان؟؟

محافظ الغربية الحالى أول ما مسك عمل مشروع لتوسعة شارع البحر الرئيسى فى طنطا بـ 24 مليون جنيه وازل الجزيرة الوسطى بالكامل من الأشجار لمعمرة
والطريق بقى أوسع من الزراعى
والعربيات والميكروباصات والتاكسيات بيمشوا عليه بهبل منقطع النظير
أنا لما بمشى بعربيتى فيه ببقى حاسس انى فى وسط سيرك وببقى قلقان جدا من الهبل اللى حواليا
المشاه بقى حدث ولا حرج
اللى بيعدى الشارع مفقود واللى ربنا وفقه وعرف يعديه مولود !!!

لو شارع خطر أو لو معاك حد و خايف عليه من التعدية اركب تاكسي للناحية التانية, مش عيب.

للاسف ناس كتيرة فخطر
بسبب الطرق دي

انا اكتر من مرة فى صلاح سالم الاقى هدف فجاءة ظهر امامى وربنا بيستر وبفاديه
الهدف عبارة عن مواطن بيعبر الشارع

سواء فيه خطوط أو لأ, العيب على الكل, من أول اللى عمل الطريق لحد السواق واللى بيعدى.

الواحد لما بيعدى الشارع بيبص يمين وشمال, وبيستنى لما الدنيا تهدى أو على الأقل يعدى من قدام سواق مركز مش واحد بيتكلم مع اللى جنبه أو فى الموبايل, وبشكره لما بيبطأ علشانى, وعمرى ما أعدى من قدام أوتوبيس أو ميكروباص علشان أولا لو ماشى صعب يفرمل, ولو واقف العربيات اللى بتعديه مش كاشفة الطريق ولا أنا شايفها ولا هى شايفانى.
ده أنا فى ناس بخرج معاها بتحسسنى أنى جاى من اوروبا, اللى ينط فى وسط الشارع ويتفلق السواق اللى جاى بسرعة, واللى ينط قدام عربية بتتسارع ويزعل ويعلى صوته لما السواق يغرز منه أو يقف بنص متر بعيد عنه, والبنت اللى فاكرة الطريق بتاعها وبتعدى بكل تناكة وتبصلك كأنك كان المفروض تنزل تشيلها وتعديها الشارع, ولا الناس ال $%##@ اللى بيعدوا بضهرهم.
والسواقين اللى متخرجين من مدرسة Need for speed لتعليم القيادة , والعباقرة اللى بياخدوا غرز من ميكروباصات وأتوبيسات وهما مش كاشفين الطريق, واللى بيتكلموا فى الموبايل أو أنيل بيلعبوا فى الموبايل, فيس, واتس أب, ولا مركز ولا فارق معاه ويزعل لما تحصل مصيبة.

أسف على الأطالة بس بفضفض, أحنا فى بلد الفوضى, والبقاء للأكثر حظا.

بلد بدون اشارات مرور بكاميرات مراقبه ف سنه 2014 دوله متخلفه وحكومه قذره ... والدوله المتخلفه والحكومه القذره لابد يحكموا شعب متخلف .. لكي الله يامصر ..