الموضوع: عندي 28 سنة عاوز أغير مجالي -خصوصا مهندسين الاتصالات والالكترونيات-

المشاركة الأصلية كتبت بواسطة amz2011

انا مش موافق على اللى انت بتقوله
عارف ليه
انا كنت خريج اتصالات 2004 حلوان سيبت التخصص بتاعى و اشتغلت مع ابويا فى مجال المساحة (هندسة المساحة)
المهم مرت السنين و اختلفت مع ابويا فى الشغل المهم جيت اسيب الشغل معاه و اشتغل بره كله بيعمالنى على انى خريج اتصالات و كل ما اقدم فى الخليج او حتى فى مصر يقولولى شهادتك اتصالات مش مساحة مع انى بفضل الله اشرح المساحة لدكاتره هندسة شبرا

هما كلهم في نفس التخصص بتاعي ياباشمهندس الميكروكنترولر تحت الالكترونيات والشبكات تحت الاتصالات ...... كلهم في نفس الدائرة مهندس الكترونيات واتصالات ........ بمعنى إني مش هخرج من مجالي أو تخصصي إن شاء الله

المشاركة الأصلية كتبت بواسطة kar!m

على فكرة المجال بتاعك مطلوب و مرتباته كويسه جدا لو انت فعلا شاطر .. بس يمكن انت مخبطتش في شركات في مصر شغاله في الحاجات دي .. بس في و بيدوا مرتبات كويسه.

و بعدين بصراحه مجال الشبكات انتشر أوي مع احترامي .. احنا كنا بنشتغل نتورك من 15 سنه المجال كان لسه جديد .. بس دلوقتي أنا اكمني بسافر كتير .. بشوف ال ccie و ال jncis دلوقتي كتير مع فقراء الهنود غير زمان خالص.

المهم ابعت لي ال سي في بتاعتك و أنا هديها لواحد شغال في نفس مجالك ان شاء الله و هقولك على كذا شركة في مصر كويسة و بتعمل شغل كويس في المجال بتاعك لشركات كبيرة لو انت شاطر بجد زي ما بتقول .. بس تكون سي في كويسة .. مش السيفيهات اللي مكتوب فيها cv من فوق :-)

بالتوفيق ان شاء الله.

الف شكر ليك ياباشمهندس كريم فعلا مشكلتي إني مادخلتش شركة محترمة بتدي مرتبات محترمة ...... أنا بعدل السي في بتاعتي وهبعتهالك وجزاك الله كل خير وده شئ متوقع من أعضاء نايل موتورز المحترمين

المشاركة الأصلية كتبت بواسطة amrelsaqqa

بص من الاخر خالص ، خليك في مجالك بس امشى السكة اللى تدخلك واحدة واحدة للـ Management ومن ثم للـ Business
شغل التكنيكال في البلاد بتاعتنا مش بيأكل عيش خالص ولو كلت عيش هيبقى مر جدا وهتكره نفسك
فنصيحة حاول تخليك في مجالك عادي بس تحط قدامك هدف تشتغل واحدة واحدة على انك تطور نفسك من ناحية الادارة والاعمال بعد كدة تبقى Manager أو Director ليك وزنك وقيمتك بدون الفحت الكتير بتاع التكنيكال

فكر كويس اوى وحط الجملة دى قدام عينك : "انا بحب البرمجة اوى وبحب الهاردوير والمايكرو بس مش هينفع اعيش عمرى كله بكتب كود "

أنا عارف موضوع الادارة ليه وزنة وتقله بس أنا مش بفكر فيه دلوقتي الا لما أشبع من التكنيكال الاول ... يعني ممكن الموضوع ده بعد 5 سنين مثلا بإذن الله أبدأ اخد شهادة إدارية .... بس أنا حاسس إن ليك خبرة في الموضوع ده تقدر تفيدنا لأني سمعت عن شهادات كتير ومش فاهم طبيعة موادها أو الوقت اللي بتتاخد فيه أو ايه الشركات اللي بتطلبه

المشاركة الأصلية كتبت بواسطة miceg

شوف ميولك فين وتوكل على الله ومتسيبش شغلك
وممكن تعتمد على الدراسة الذاتية
لغايت ماتنمي نفسك وتبقا مؤهل تجتاز اختبارات في انترفيوهات وخلافه
تحياتي

ما هو ده اللي وصلتله لحد دلوقتي هكمل في شغلي زي ما أنا وأذاكر مع نفسي كورسات الشبكات CCNA , CCNP وبعد ما أخلصهم ادور على شغل تاني إن شاء الله

المشاركة الأصلية كتبت بواسطة moudy88

باشا انا اتكلمت معاك قبل كده في موضوع انا كنت عامله عن شغل الاتصالات

انا خريج 2012 اتصالات ..وفاكر من كلامك انك شغال في ال embbeded ..وده احلى حاجه ياباشا في التخصص ده

انت ممكن يكون ربنا لم يكتبلك التوفيق في شركه معينه

بس والله العظيم انا اعرف ناس في mentor graphics و valeo والسويدي بيقبضوا الالاف ..واللي عرفته منهم انهم حتى out source valeo

ده غير شركات تانيه it solutions مش مشهوره اوي بس منتشره

دور ياباشا على واحده من الشركات دي ..وخساره انك تسيب الامبيديد

انا شغال في الموبايل ..تريكيبات اريكسون فودافون ..والشغل طحن جدا وتعب ..والناس بتهرب منه وتاخد دبلومة 3 شهور في الامبيديد

وبالنسبه للشبكات شغلها مش لذيذ وغالبيتها تيكنيكال سبورت كول سنتر

وفيه برضه حاجات مجالات تانيه حلوه

زي الاوبيتكال فايبر ..وده برضه ابتدى شغله يفتح في مصر وبالذات في الاحياء الراقيه زي التجمع الخامس
واهم حاجه تكون متعلم لحام فايبر وبعد كده بالخبره هتتعلم ال planning فيه

والله ياباشمهندس الشركات اللي بتشتغل في الموضوع ده بتتعد على أصابع الايد الواحدة ..... يعني أنا زهقان دلوقتي من الشركة اللي أنا فيها مش عارف أعمل ايه أو اروح فين لأنه مش مطلوب في السوق ....... وللأسف الشركات اللي اشتغلت فيها مش شركات كبيرة تأهلني أني أدخل شركة كبيرة تاني ....... عشان كده أنا مخنوق وبفكر في الشبكات عشان أفتح لنفسي مجال والاقي شغل تاني وتقدير مادي ومعنوي

المشاركة الأصلية كتبت بواسطة pro_samir

انت اكتر حد تعرف نفسك وظروفك وتقدر تقرر

المهم انك متقررش تحت ضغط الاحباط..

لو كان في ايدك حاجه تعملها في مجالك زي اللي الأماكن اللي الشباب بيتكلمو عليها ، أو في طريق ممكن تمشي فيه للأفضل وممشيتش، تأكد انك مش هتعمل كده في أي مجال تاني !

ساعات الواحد من الاحباط بيكون محتاج تغيير لمجرد التغيير ومقتنع ان التغيير الجذري هو الحل .. لكن ده مش دايما صح

أتمني ان ميكونش ده اللي حاصلك علشان متجيش في يوم لا قدر الله تلاقي نفسك في الهوا ولا حصلت سما ولا أرض ..

زيي كده دراستي في مجال وبدأت حياتي وشغلي في مجال تاني من قبل الدراسة ، ومع الوقت غيرت تخصصي في نفس المجال !

بقي ال cv بتاعي سمك لبن تمر هندي منفعش اشتغل غير مدير أو مدير تنفيذي علي الأقل :))

ربنا ييسرلك الحال

والله ياباشمهندس التحديات اللي في الشغل ومجال العمل هو اللي بيحتم عليك القرائة والاجتهاد في مجال معين ....... لأن المجال ده تطبيقي من المقام الاول ......... محتاج وقت ومجهود ومتغيراته كتير جدا ........ أنا اشتريت kits وأدوات واشتغلت في البيت وعملت حاجات كتير وموقع الكتروني لكن ملهوش لازمة لأن الشغل الحقيقي زي اللي بشتغله في الشركة مش مطلوب وهو ده الفيصل ......... المشروع اللي بتشتغل فيه هو اللي بيخليك تقرأ وتنفذ وتحاول وهو ده اللي بيديك الخبرة والعلم .......... لكن لو كانت المشاريع ده مجالها محدود هتشتغل اه لكن هتقول وبعدين وتتخدل في الدايرة بتاعتي ......... المشكلة أني من النوع الجبان في إتخاذ قراراته المصيرية عشان كده الموضوع بياخد وقت معايا ....... بالاضافة إني عندي أسرة الحمد لله فالموضوع أصعب وأصعب ........... الله المستعان يارب

المشاركة الأصلية كتبت بواسطة drcobra

كلمه واحدة هرد بيها على كل اللى انت قولنه
برمبرممممممممممممم برممممممممممممم هههههههههههه

الكلمة هى (جمد قلبك )
عايز تغير غير ومتخفش الحياه للمغامريين

الحياة للمغامرين فعلا .... أنا شخصيتي ضعيفة في الموضوع ده لازم أفكر كتير أوي قبل ما أتخذ أي قرار وده بيأخرني في حياتي أوي ........... إدعيلي ربك يصلح حالي يارب

المشاركة الأصلية كتبت بواسطة amrelsaqqa

والله ياباشا انا تقريبا اصلا كنت في نفس المشكلة بتاعتك
انا مش خبرة اوى ولا حاجة انا برضه لسة يعتبر في الاول كل خبرتى في الشغل اقل من 3 سنين
وانا خريج هندسة الكترونية قسم حاسبات يعنى تقريبا ممكن اشتغل في اي حاجة في المجال كله

كنت بحب الميكرو والامبدد جدا ومشروع التخرج بتاعى كان فيه هاردوير و في نفس الوقت في اول سنتين في الكلية كنت حبيت مجال الـ web جدا ، وبدأت اتعلم كل حاجة فيه وخصوصا لغة php ويعتبر اكتر حاجة خدت فيها خبرة قبل ما اتخرج من الكلية
لما جيت اتخرجت لقيت كل اللى كتبته في السي في اغلبه في اتجاه الويب ، والميزة والعيب في المجال ده في نفس الوقت انك ممكن كـ fresh تلاقى فرصة بسهولة جدا طالما مستواك كويس بعكس مجال الامبدد الشركات كبيرة ومحترمة بس الفرص محدودة مع انى حاولت برضه في مجال الامبدد بس الفرصة اللى جتلى كانت outsoure لـ valeo ومكنتش موفق فيها ، فقلت يلا الحمد لله والخيرة فيما اختاره الله ، وكملت كـ php developer ومع الخبرة العملية مستوايا بقى كويس جدا وبقيت سنيور في فترة قياسية

المهم عشان ما اطولش عليك انا اشتغلت في شركتين ولسة سايب اخر واحدة من اسبوع
لقيتنى مش هتطور خالص في المجال ده واكتشفت ان البزنس بتاع الويب اغلبه في مصر للشركات الصغيرة جدا جدا اللى مفيهاش اي benefits في اي حاجة ، والشغل بيعتمد على حاجات بتيجى من برة ودايما ضغط على طول وعدم تنظيم في الشغل لان بما انها شركة صغيرة جدا جدا فـ انت developer و tester و project manager في نفس الوقت وعليك ضغط رهيب في الشغل ، واحدة واحدة بدأ مرتبى يزيد وكنت بقبض كويس جدا جدا وانا يعتبر لسة في اول سنتين في حياتى الوظيفية ، بس مكنتش سعيد ( فعلا المرتب مش كل حاجة ) ، حسيت انى بالطريقة دى هفضل اشتغل في شركات صغيرة وشغل ما بيرحمش مفيش اي benefits لو حصللك حاجة او اضطريت تتغيب عن العمل لاي سبب مفيش كيان محترم انت شغال فيه هيعمللك تأمين صحى او اجازة مرضية او او ..
على طول في ضغط نفسى رهيب ، الحاجة اللى انت حاببها طول عمرك بدأت تكرهها لما اتحولت لروتين وضغط وقرف
من الاخر انت بتحس في وقت انك كأنك شغال في الفاعل بس شغلانة شيك ومرتب كويس ، انما انت شغال بتتحاسب بالساعة وممكن ينطلب منك كمان تكتب time sheet تقول عملت ايه بالتفصيل لمدة 8 ساعات كاملة يوميا يوميا يوميا !

خدت قرار تغيير بسيط في الكارير باث ودلوقتى انا في مكان تانى احسن بكتير من الاول هبدأ اشتغل في الـ erp أو الـ sap تحديدا في الجزء التكنيكال بتاعه يعنى ما يعتبرش غيرت الكارير اوى لان برضه هيبقى مهمتى حاليا programmer أو developer بس الفكرة انك بقيت في مكان اوسع ، وظيفة مش مطلوبة غير في الشركات الكبيرة والمحترمة ، بالاضافة انك لما بتتعامل مع الـ erp والحاجات دى بتبدأ واحدة واحدة تفهم الـ management و الـ business اكتر عن قرب وبسهولة فلما تكبر يبقى ده التطور الطبيعى بتاعك

اعتذر عن الاطالة وربنا يوفقنا ويكرمنا جميعا :)

ولا إطالة ولا حاجة قصتك حلوة جدا ......... كويس إنك أخدت الخطوة ده لأني فعلا محتاج كده الجرأة عشان اخد قرار ....... كويس إنك عارف عاوز أية أنا سمعت عن erp من صديق ليا بيقول نفس كلامك عليه بالظبط ........ ربنا يوفقك وادعيلي ربنا يوفقني ويكرمني ......... وفعلا مشكلة الامبيديد شركات معدودة جدا ولو مجالكش فرصة في شركة محترمة وكيبرة هتشتغل في شركات صغيرة زيي وبعدين مش هتعرف تدخل شركة كبيرة للاسف ........ الله المستعان وشكرا ليك ياباشمهندس