الاسئلة الشائعة عن الريو واجابتها
النهاردة عملت تقرير عن الجميلة " كيا ريو 2014 " بعد
6000 كم
انا ماعنديش حاجات كتير جديدة اقولها على العربية لكن هحاول ارد على الاسئلة اللي بتيجي في دماغ اي حد لسه شاريها او بيفكر يشتريها
و ده لينك التقرير اللي كتبته بعد 1000 كم
http://www.nilemotors.net/Nile/400651-2014-1000-a.html
>> نيجي بقا للكلام المهم والاسئلة المتكررة
مشكلة استهلاك البنزين واللي بقت معروفة في الريو ..
طبعا ملاك الريو 2012 و2013 عارفين انها كانت مشكلة سوفت وير وانه بيتم تحديثه في التوكيل والمشكلة بتتحل
بس الحمدلله 2014 نازلة من غير المشكلة دي
طب اللي معاه 2014 وحاسس ان الاستهلاك زيادة ده يبقى ايه !!
اول حاجة تانك البنزين صغير 43 لتر وده كافي انك تحس ان البنزين تم استهلاكه بسرعة ..
تاني حاجة موتور الريو 1400 سي سي .. لكن بيطلع كام حصان ؟
بيطلع 109 حصان .. يعني يعتبر موتور 1600 بس صغير شوية :Copy of rfds:
تالت حاجة و دي بتعتمد على اللي سايق العربية .. طلعة العربية جامدة لو دوست بنزين زيادة حتة وانت طالع وده اكيد بيسخن ناس كتير انها تشد وبالتالي استهلاك اكتر للبنزين ..
رابع حاجة الزيت اللي في موتور العربية .. عرفنا من كلام كتير من اعضاء عمالقة هنا في المنتدى ان لزوجة الزيت عامل مهم في استهلاك البنزين ..
اشتري خليجي ولا وكيل ؟! ..
سؤال متكرر دايما وبيسبب حيرة لاي حد
مبدأيا انا عن نفسي قليل لما بشوف ريو وكيل ماشية في الشارع غالبا بتكون خليجي وكل واحد له وجهة نظره في اختياره
ما يميز الوكيل عن الخليجي فقط هو الضمان لا غير ..
وللاسف اللي هيشتري وكيل عشان يحس انه ما دفعش فلوس على الفاضي لازم يجيب الهاي لاين ماينفعش الفئة التانية لان اهم اوبشنز فيها مش هتكون موجودة زي الايرباج وفرامل ABS ده غير الاوبشنز الرفاهية زي فتحة السقف ..
على عكس الخليجي ممكن تشتري الهاي لاين او الفئة التانية وهتلاقي في الفئة التانية ايرباج وفرامل ABS وممكن تلاقي فتحة سقف او مفتاح بصمة ..
يعني خلاصة الحيرة دي من وجهة نظري المتواضعة
لو حد قادر يجيب الهاي لاين ممكن يجيب وكيل او خليجي عادي
انما لو الفئة التانية افضل الخليجي عشان الاوبشنز اللي فيها ومش هيلاقيها في الوكيل
يا ترى تكييف العربية عامل ايه ؟ ..
التكييف بسم الله ما شاء الله جميل وبيخليني ابرد بسرعة وجربته كتير في موجة الحر اللي احنا فيها اليومين دول والحمدلله ادائه جيد جدا ولكنه مش متفوق على الياباني زي اللانسر او التويوتا على سبيل المثال .. لكن مفيش حد هيجربه ويصرف نظر عن الريو عشان التكييف مش عاجبه بالعكس التكييف هيعجبه جدا
طب ارتفاع العربية عامل ايه ؟ ..
ردي هو :dribble: ههههههه ماتستغربوش عشان ببقى ماشي في امان الله والاقي مطب شكله عادي اول ما اطلع العربية تاخده بالاحضان فنصيحتي هنا بقا اي مطب من عمايل ايدين الاهالي حتى لو شكله محترم ابعد عنه ابعد عن حيحا اطلع المطب بالعرض ان شا الله تنزل تشيل العربية او تنزل اللي راكبين معاك وتعدي الاول :hugging:
ييجي واحد ويقولي يا باشا بس الكوري معروف انه اخف من ريشة الحمامة ..
فأحب انا ارد عليه واقوله عشان سيادتك بتقارن العربية الكوري ايا كان نوعها بعربية ألماني على سبيل المثال بي ام وسعرها ضعف العربية الكوري اللي بتتكلم عنها
ده غير انك بتحكم عليها بدون تجربة انت بتحكم من خلال كلام ناس تانية هما كمان مجربوش ده غير ان كل عربية بتنزل على أد سعرها بغض النظر عن ان اسعار العربيات في مصر مبالغ فيها جدا ..
عموما الريو ثباتها بالمقارنة بالعربيات اللي في نفس رينج سعرها ثبات جميل ومعقول جدا ومرضي وده بالنسبة للخليجي عشان الجنط الـ 17 بالنسبة للوكيل جنط 15 معرفش
اكتر سرعة جبتها بالريو كانت 170 على الطريق الدولي وكانت ثابتة بشكل عادي خصوصا اني مجربتش اخد غرزة وخلافه لكن لحد 140 و150 ثباتها جميل
واكتر حاجة عجباني في ثبات الريو في الملفات لامة نفسها وبتعرف تتحكم فيها
يعني الخلاصة من وجهة نظري المتواضعة
لو بتسافر كتير وعلى سرعات عالية الريو اختيار كويس بس ممكن تلاقي اختيار افضل خصوصا لو زودت شوية في السعر ..
لو بتسافر بس مش كتير اوي وسرعاتك ما بين العالية والمتوسطة الريو اختيار ممتاز ..
دي اكتر اسئلة بتتسأل عن الريو وجاوبت عليها بقدر استطاعتي
ولو في حاجة تانية افتكرتها هقولها اكيد ان شاء الله
واي استفسار وسؤال تاني انا تحت امركوا ..
وارجو من الادارة تثبيت الموضوع في حالة التأكد من قيمة التقرير ..
وشكرا :tumb:
