الموضوع: هل تعلم أن ....... كله 301 وبس !!!

المشاركة الأصلية كتبت بواسطة wel781

فى وقت صعب جدا و فى ظل الحرب الغريبة على 301 حبيت أعمل حاجه جديدة ..... :u_thin1[1]:

موضوع جديد ... مختلف ... فى بعض الاوبشنز اللى موجودة فى العربية وفى ناس كتير ممكن ماتعرفش عنها حاجه.

كل ده إجتهاد شخصى فلو فى خطأ بدل ما تنتقدنى قول أنت الصح .انا خبرتى فى الهاى لاين فا مش عارف الحاجه ديه موجوده فى الفئات التانية ولا لأ

يا ريت حد من ملاك الفئات الاخرى يقولنا. وأسف على الاطالة مقدما.

هل تعلم ان:

- انت عارف انك لو ركنت على جنب وشغلت الانتظار وفضلت مدة أكثر من دقيقتين صوت التكتة بتاع الانتظار هايتكتم لوحدة علشان مايعملكش إزعاج.

- انت تعرف كمان ان نور الاشارات بتاع الانتظار اللى فى العدادات هايطفى برده ، لدرجة انك ممكن تحس ان الانتظار مطفى بس هو فعلا شغال من بره العربية.

- أنت بقى عارف أنك ممكن تكتم صوت الراديو لو دوست على زرارين تعليه وخفض الصوت مع بعض (من الكاسيت او من المالتى فنكشن).

- انت عارف لو عملت نفس الخطوة اللى فوق و انت بتسمع حاجه عن طريق الـ usb أو الـ cd أو حتى الموبايل هاتعمل pause للاغنيه.

- تقدر تفك الـ pause بأنك تدوس على اى زرار فى الاتنين.

- كل mode فى الكاسيت (cd-aux-bluetooth-radio) ليه تظبيطه صوت مختلفة عن التانيه ،بتعملها أول مرة وخلاص. من علامة الموسيقى فى الكاسيت.

- لو رجعت لورا والحساسات إبتدت تعمل صوت التنبيه أى حاجه مشغلها على الكاسيت صوتها هايوطى أوتوماتيك وبعدين يرجع تانى لما تشيل الفتيس من على الـ r

- أرفع الهاند بريك الاول قبل ما تجيب الفتيس على الـ p

- لو مشيت على العربية وانت رافع الهاند بريك هاتديلك رسالة تحذيرية بتقولك نزل الهاند يا شوماخر :d

- لو انت حطيت المفتاح فى الكونتاكت من غير ما تدور طرمبة البنزين هاتشتغل وعلشان كده هاتسمع صوت زنة خفيفة كده.

- طيب لو مدورتش وفضلت واقف شوية بره العربية ، هاتفصل لوحدها و اول ما تفتح الباب تانى العربية هاتفهم انك كده هاتتحرك هاتشتغل تانى.

- لو فتحت شنطة العربية من الريموت العربية كلها هاتتفتح فا خللى بالك علشان انا وقعت فى الموضوع ده وسيبت العربية مفتوحة بتاع 4 او 5 ساعات.

- لو دوست على زرار الغلق فى الريموت والعربية أصلا مقفولة هاتفضل تنور الانتظار بتاعها تقريبا دقيقة. علشان لو بتدور عليها فى جراج مول ولا حاجه.

- أنت تقدر توصل أكثر من تليفون على البلوتوث بتاع العربية، بس واحد بس هو اللى هايشتغل ماينفعش كلهم يشتغلوا مع بعض.

- غالبا مش هايقبل أكتر من 4 تليفونات. جرب لو عرفت تعمل أكتر من 4 عرفنى أزاى.

- لو عايز تعمل مكالمة private مش لازم تفصل التليفون ممكن تختار أوبشن التحدث فى التليفون من الكاسيت او التليفون نفسه.

- لو جالك تليفون وانت بتركن وبطلت العربية وقفلتها الكاسيت مش هايفصل إلا لما تخلص تليفون او تفصل البلوتوث.

- لو عندك تليفون بشريحتين هايبقى مكتوب على الشاشة 2 جنب علامة قوة الشبكة.

- لو حاولت ترفع إزاز بابك وباب السواق مع بعض بإيد واحده مش هاتعرف!!!! جرب

- المساحات مابطلتعش للاخر بس بعد ماتطفى المحرك تحرك زراع المساحة هاتتحرك المساحات فى وضع رأسى و يثبت على ذلك. رجع الدراع هاترجع تانى.

- أنت عارف أن سرعة المساحات بتتناسب طرديا مع سرعة السيارة يعنى بتزيد لما تسرع وتبطا لما تهدى. :w_022:

- لو حسيت بدأره فى الدركسيون يبقى بسيطة وطى أيدك واسحب الدواسة لورا أو أخرمها وحطها فى مكان الدواسة الاصلية.

- فوانيس الشبورة مش هاتشتغل إلا لو منور نور التابلوه.

- لو لفيت بكرة الشبورة مرة واحد هاتشغل نور الشبور الامامى، لو لفيته مرة كمان هايشغل نور الشبورة الخلفى.

- كل حاجه فى العربية بتفصل لو بطلتها، ومع ذلك تقدر تشغل الكاسيت حتى بعد ما تشيل المفتاح.

- أنت عارف بقى لو فضلت قاعد فى العربية ومشغل الكاسيت وهيا مبطلة بعد فترة هايطفى لوحده ويقولك power save، تقدر تشغله تانى.

- لو معلى الكاسيت على الاخر هاديلك رسالة تحذيرية بتقولك audio system overheating.

- لو ماشى فى حارة وعايز تغير الحارات مش لازم تجيب الدراع للاخر مجرد حركه بسيطه فى الاتجاه اللى انت عايزه وهو هايشغل الاشاره 3 مرات بس ويفصل.

- انت عارف ان من قرايات العربية بتاعت البنزين وخلافه ممكن تعرف طريقة سواقتك وكمان الطرق اللى بتمشى فيها مثال توضيحى فقط وليس طريقة حساب:

لو نصف التنك مليان و متوسط سرعتك 30 مثلا واستهلاك البنزين اعلى من 9 لكل 100ك والمسافة اللى اتمشت على التفويلة ديه أقل من 150 يبقى يأما أنت رجلك تقيلة يا اما كنت ماشى فى زحمة.
لو نصف التنك مليان و متوسط سرعتك 70 واستهلاك البنزين فى حدود 7 لكل 100ك والمسافة اللى اتمشت على التفويلة فى حدود الـ 300 يبقى أنت طريقك صحراوى يا كبير :d

- فيوز الولاعة 10 أمبير فلو انت جايب منفاخ كهرباء اعلى من 10 هايحرق الفيوز ويفصل الولاعه. متحاولش تستنصح و تحط فيوز تانى 15 علشان السلك نفسة مش هايستحمل.

- تقدر تفصل الايرباج بتاعت جنب السائق من التابلوه هاتحط المفتاح بتاع العربية فى الفتحة اللى لونها أحمر وتلفها.

فى النهاية العربية حلوة مافيش كلام. وربنا يبارك فى كل ملاكها واللى حاجزينها.
التوكيل سىء زيه زى اى توكيل تانى أو اى حاجه فى مصر.

يارب المعلومات ديه تكون أفادتكوا.

مافيش حرب و لا حاجه, الطبيعى إن دائماً فى إنتقادات موجهة لكل شئ بهدف التطوير و التحسين, أهم حاجة إن النقد يكون إيجابى و موضوعى و بصورة لائقة و مش مبالغ فيها (لدرجة تحويل الحاجات الإيجابية لسلبية و الإفتراء على العربية).

أحب أشكرك على المعلومات الجميلة و المجهود الرائع, فى حاجات كتيرة ماكنتش واخد بالى منها بصورة مؤكدة (زى موضوع الإشارة لمدة 3 ثوانى). و كويس إنك لفت نظرنا لموضوع الفيوز الـ 10 أمبير, انا عندى مكنسة للعربية (يا رب ماتطلعش اكتر من 10 امبير).

بالمناسبة, إزاى ارفع المساحات و أسيبها؟ وهل لازم العربية تبقى متبطله و لا ممكن تبقى دايرة؟



أحب اضيف كمان كام حاجة عجبتنى فى العربية:

1- بعد ما تبطل العربية معاك حوالى 30 ثانية عشان تنزل الإزاز, على شرط إن مايكنش فى باب مفتوح أو تفتح الباب بعد ما تبطل العربية.

2- فى ذراع خلف المرايا الداخلية, لو نزلته لتحت المرايا مش هاتعكس ضوء الشمس فى عينيك و مش هاتعكس ضوء العربيات اللى ماشيه وراء فى عينيك (خصوصاً لو سايق بالليل و واحد ضارب النور العالى).

3- انا لاحظت عندى - فى الهاى لاين - لما بافتح العربية من الريموت بتقفل نفسها تانى بعد ثوانى لو مافتحتش اى باب من ابواب العربية.