الموضوع: فرحان ومحتار بسبب الكيا كارينز

المشاركة الأصلية كتبت بواسطة إبراهيم المصرى

يا عمرو باشا الاسود عايز جراج وازاز فاميه ومتخرجش بيها الا بليل فى الطراوه او فى الشتا زى الفل
هههههه
بجد من الناحية العملية عشان الحر والتكيف وبرضه روعه الالوان المعدنيه ( الميتالك ) كلها جميله وعموماً الألوان ده ازواق ربنا يوفقك فى اللى تتمناة ويكفيك شرها ويديك خيرها ان شاء الله

هههههه فعلا يا استاذ ابراهيم اللون الاسود مش معمول للدول العربية دة معمول لاوربا :-) ... ومتشكر على الدعوة الحلوة دى ومتابعتك للموضوع .. كلك ذوق والله ... وانا حاليا ان شاء الله بفكر فى السليفر والفيرانى كنت عايز ابيض بس انت حضرتك عارف المصريين يقولك هتركب تاكسى ؟؟

المشاركة الأصلية كتبت بواسطة عمرو مجايفر

متشكر على اهتمامك وردك يا ريس .....انا لما سألت الوكيل قالى مبتحكش وارتفاعها دة هيفضل ثابت الا لو حملت فيها اسمنت وزلط :-) وثانيا : الاسبورتاج جميلة جدابس مش هتنفعنا كعائلة وغير السعر دة انا بصوت من سعر الكارينز .... الجراند تريوس عربية تقيلة فى مشيها وشكلها وكمان فى سعر اعادة البيع ...الافانز عربية ملهاش وجود فى الوجود عرلية تحس انها تايهة ... وغير الناس الى جبوها محدش شكر فيها بالمرة وغير ثابتة .. وكفاية كشكلا انها شبه ميكروباص الشفيرولية بتاع اعلان شعبولا :-) ..... بس هو فعلا من واقع تجربة او حد مالك كارينز بلغ حضرتك انها بتحك فى المطبات مع التحميل الكلام دة لو اكيد هروح اسحب فلوس الحجز حالا

انا شغلتى بيع السيارات من كيا وهيونداى ورينو وفولكس واوبل وجيب بانواعه وبقالى حوالى سنتين ونص
وجربت كل انواع العربيات
وانا بفرج العملا على الكارينز اول تعليق العربيه واطيه وطويله يعنى المسافه بين العجلتين كبار
وسلمت كذا عميل
وكله العربيه عامله ايه الرد ممتازه بس واطيه مع الاسف ( الكارينز القديمه كان ارتفعها ممتاز وصالونها قعدته اريح من الجديده فى الوسع والرحابه
بناءا عليه انا بقولك راجع نفسك
المعارض فيها بضاعه 2014 كتير جدا وياعالم هتخلص ولا لا بدليل سعرها نزل من 205000 الى 192000 برده منتشرتش الانتشار المتوقع زى الاسبورتاج وال ix35 بسبب وطى العفشه

الاسبورتاج وصلت ل 257000 وال ix35 وصلت ل 245000 وبرده بيبيعو عشان ارتفاع العفشه مع ان تقفيل الكارينز والخامات انضف من الاسبورتاج وال ix ولكن واطيه مع الاسف

المشاركة الأصلية كتبت بواسطة memo823000

انا شغلتى بيع السيارات من كيا وهيونداى ورينو وفولكس واوبل وجيب بانواعه وبقالى حوالى سنتين ونص
وجربت كل انواع العربيات
وانا بفرج العملا على الكارينز اول تعليق العربيه واطيه وطويله يعنى المسافه بين العجلتين كبار
وسلمت كذا عميل
وكله العربيه عامله ايه الرد ممتازه بس واطيه مع الاسف ( الكارينز القديمه كان ارتفعها ممتاز وصالونها قعدته اريح من الجديده فى الوسع والرحابه
بناءا عليه انا بقولك راجع نفسك
المعارض فيها بضاعه 2014 كتير جدا وياعالم هتخلص ولا لا بدليل سعرها نزل من 205000 الى 192000 برده منتشرتش الانتشار المتوقع زى الاسبورتاج وال ix35 بسبب وطى العفشه

الاسبورتاج وصلت ل 257000 وال ix35 وصلت ل 245000 وبرده بيبيعو عشان ارتفاع العفشه مع ان تقفيل الكارينز والخامات انضف من الاسبورتاج وال ix ولكن واطيه مع الاسف

انا مبشككش فى كلام حضرتك ( وفوق كل ذي علم عليم ) ... يعنى افهم من كلام حضرتك انها هتحك فى المطبات مع ركوب جميع افراد الاسرة .... انا متفق مع كلامك ان الاسبورتاج وال اى اكس ٣٥ والقشقاى عربيات ممتازة ...
انا عندى لحضرتك كام استفسار : واعذرنى لو هتقل عليك
الكارينز بتحك فى كل المطبات حتى لو مطبات العادية ولا المطبات الغبية الى بتستدعى تاخدهم بالربع عجلات ؟؟؟
الكارينز مصفحة من تحت ؟؟؟
هل هينزل منها شكل جديد فى ٢٠١٥ ؟؟
هل النيو كارينز بتنزل على الارض مع الحمولة الكاملة ؟؟

طمنا عليك يا أستاذ عمرو ......ربنا يوفقك للخير

المشاركة الأصلية كتبت بواسطة Hazem Osman

طمنا عليك يا أستاذ عمرو ......ربنا يوفقك للخير

ربنا يكرمك يا استاذ حازم ... انا كويس طول محضرتك بخير ... انا انهاردة نزلت المصرية للسيارات عشان اتفرج على الالوان ولفيت كام معرض كدة.. لان فى وكيل كيا الى فابو رواش مكنش عندة غير لونين بس الموكا والابيض .... ومع حبى للابيض وزن الاصحاب والاسرة فى انة بلاش الابيض ... شفتها فى السيلفر مش قد كدة مش مديها قيمتها .. والموكا ... فوانيس العربية الخلفية تايهة فيه .. البترولى جميل برضة عليها بس انا معايا لانوس كحلى قريبة منها ... وجاءت اللحظة الحاسمة شوفتها فالاسود تحفة ... مع انى عارف انة لون صعب فالحر وخصوصا انى مبحبش اشغل التكييف بس يلا اهوة منها سواقه وسونا وتخسيس فنفس الوقت ... فرسيت على الاسود وان شاء الله هكلمهم بكرة فالوكيل يحضروها واول ميدونى ميعاد الاستلام هنشره فورا .. وكانت ثارت شكوك عندى فأنها هتسلم على كل المطبات وخصوصا وان فى احد الاعضاء الكرام اكدلى انها هتنام على الارض مع الحمولة ... مع مناقشتى مع بتوع المبيعات فالمعارض الى روحتها انهاردة .. قالولى هتحك فعلا فى المطبات الغبية وانت محمل وقالولى الشكل القديم برضة مع الحمولة كان بيحك فى المطبات الغبية الى ليتعمل كأنة حد بيبنى حيطة مش مطب ... بس كلهم اجمعوا انها عربية ممتازة تستاهل تمنها و عفشتها جميلة وماتورها احسن بمراحل من القديم وكل الى استلم بيشكر فيها ... اسف على الاطالة ومتشكر جدا لمتابعة حضرتك ..

المشاركة الأصلية كتبت بواسطة masryxt

استاذ عمرو انا مالك للكارينز الجديدة وحاليا انا عامل 23 الف كيلو بيها وعاثلتي كبيرة ودايما محمل ودة كان ردي علي اخ بيستفسر عن ارتفاع العربية مع بعض الاسئلة الاخري اتمني يكون فيها اجابة عن اسئلتك وتحت امرك في اي سؤال



شكرا على الاهتمام ..انت حاسس ان العربية تستاهل تمنها؟ ..العربية عالية عن الارض بالقدر الكافي؟ الدخول للكراسي الاخيرة سهل عشان لما شفتها لفيت فى صعوبة بصراحة.. مساحة الشنطة والصف الاخيرة مستحدم ممكن ياخد شنط سفر ولا اية؟ كمان اخبار استهلاك البنزين فى الزحمة ..واخيرا اسعار قطع الغيار والصيانات؟

السلام عليكم
اولا بالنسبة للسعر وهل تستاهل تمنها ؟؟؟؟
لو انت عاوز سيارة عائلية يبقي مافيش منافس في نفس الفئة السعرية وخصوصا لان المساحات متوزعة بشكل زكي جدا وعملي جدا وارجع تاني اقول اية البديل بالنسبة لصاحب عائلة كبيرة

ثانيا العلو عن الارض؟؟
بالنسبة لتجربتي وانا ماشي بيها 21 الف كيلو حتي اليوم الارتفاع معقول جدا بالنسبة لجميع السيارات فيما عدا ال suv وال 4x4 طبعا
المطبات اللي ممكن تحك فيها اما مطب غشيم وواقف وانت محمل او انت داخل بسرعة علي مطب وبتفرمل جامد وانت في المطب.

ثالثا الدخول للصف التالت؟؟
الكرسي الاوسط الظهر بتاعة بينحني للامام زائد ان الكرسي بيتحرك للامام لحد الكرسي الامامي ودة بيديلك مساحة ممتازة للدخول وعن تجربة كافية جدا.

رابعا مساحة الشنطة والصف الاخير مستخدم؟؟
لو انت مستخدم الصف الاخير كلة يبقي الاجابة طبعا مش هاتاخد اكتر من بضعة اكياس وشنط صغير ودة علي فكرة ينطبق علي كل الفئة دى والا كانت هاتبقي طويلة جدا "حتي التاون اند كانتري والفويجر ودي اكبر عربية ممكن تتركب في الفئة دي هاتلاقي نفس الوضع
اما لو عاوز اللس انا بعملة انا باستخدم كرس واحد من الاتنين الي ورا لان انا العدد 6 افراد وبسيب الكرسي الثاني مش مفرود ودة بيديني مساحة تحميل اكبر من اكبر شنطة لسيارة سيدان طولا وارتفاعا وسعة

خامسا استهلاك البنزين في الزحام؟؟
اكيد بتستهلك
انا المعدل بتاعي 190-220 كم في الصفيحة "20 لتر"
زحام يبقي 190 - 200 كم في الصفيحة
سفر بتكون موفرة وممكن توصل ل 220-240 في الصفيحة
وصدقوني المعدلات دي بتتاثر بالطريق وبطريقة سواقتك
خد بالك ان المعدلات اللي انا كاتبها تقريبية باحاول اقرب بيها الصورة

سادسا اسعار قطع الغيار والصيانات؟؟
اولا :انا ماشي 21000 كم فمادخلتش في الصيانات الكبري
ثانيا انا وكيل فاللي بيقول علية بتبصم وتدفع وانت زي الباشا
لو ليا الاختيار فاعمل كل صياناتي برة وهاتوفر اكتر من 50 % بس للاسف كدة يخرجك برة الضمان اللي هو 5 سنين يعني مش قليل

اتمني اكون جاوبت علي تساؤلاتك وتحت امرك في اي سؤال اخر

كل ماكتبتة بالاعلي هو عن تجربة شخصية خاضعة للصواب او الخطاء وهي محاولة مني لايصال المعلومة بدون غرض او هوي

__________________

متشكر جدا يا استاذ مصرى على توضيحاتك ومشاركاتك الفعالة ... انا سبب من اسباب اقتناعى بالكارينز الجديدة مع انى كنتى ناوى على الشكل القديم هو تقييم حضرتك لعربيتك وشرحك الوافى بطريقة تعطى القارئ ارتياح وثقة ....
وفعلا كلام حضرتك اكدهولى انهاردة كذا شخص من مسئولى المبيعات .... وانا الحمد الله استقريت على اللون الاسود .. وبكرة هبلغ الوكيل باللون وهشوف هيسلمهالى امتى وابلغ حضرتكم .
.... بس سؤال هى العربية بتنزل متلينة ولا لازم امشى اول الف كيلو على مهلى لحد متلين ؟؟؟ كل مفتكر اسأل السؤال دة انسى ... وكيفية التليين الصحيح ليها ... يعنى نفس معاملة التليين فى المانيوال ولا هى بتختلف ؟؟