الموضوع: صباح الخير على الجميع...عايز افضفض

المشاركة الأصلية كتبت بواسطة friendship7897

أنا مش فاهمة يعني أيه أحباط ؟!
لو على المرور .... أنا أتولدت لاقيت المرور كدة .
لو على الزحمة .... أنا فتحت عيني لاقيت الزحمة دي .
لو على الرشاوي والفساد ... ما شوفتش غيرهم من يوم ما بدأت أتعامل مع القطاع العام أو الخاص أو حتى قطاع الأعمال .
لو على المية الملوثة .... من يوم ما عرفت يعني أيه فلتر مياة ما بنغيروش إلى لما نستغرب على منظره بعد التغيير من نسبة التلوث اللي كنا بنشربها وما زلنا بنشربها وبنضحك على نفسنا إننا بنستخدم فتلر .
لو على الخضار اللي لا ليها لون ولا طعم .... ما هو من يوم ما حطوا مبيدات وكيماويات على الأراضي الزراعية وأحنا مش حاسين بلون ولا طعم .
لو على البلطجية والصوت العالي .... ما هما دول بس اللي بيخدوا حقهم هما والحرامية وذو المناصب الرفيعة في البلد .
لو على قانون الطوارئ ... ما أحنا طول عمرنا في قانون طوارئ غير معلن .
لو على أنقطاع الكهرباء ... ما أحنا طول عمرنا بنهرب السولار ومفيش سولار لتشغل المولدات أو بنبيعه بأقل من سعره لينا أحنا .
لو على حقوقنا ... ما أحنا طول عمرنا مش بناخد حقوقنا من تعليم ولا صحة ولا ضرائب ولا كرامة إلا بالدفع المقدم للمدارس الخاصة والمستشفيات الغالية وياريت بنعرف برضوا ناخد حقنا .
فوقوا ... أحنا مش محبطين
أحنا مقهورين ، ومحتاجين قنبلة ضمير تنفجر في البلد دي تصحي ضمايرنا كلنا ( المتعلم والجاهل / الغني والفقير / الكبير والصغير / الجيش والشعب / المسلم والمسيحي )

وأملي الوحيد
إن دوام الحال من المحال ، فأكيد لحظات الإحباط دي لن تدوم
وفرج الله قريب إن شاء الله
كما قال الله تعالى:" حَتَّى إِذَا اسْتَيْئَسَ الرُّسُلُ وَظَنُّوا أَنَّهُمْ قَدْ كُذِبُوا جَاءَهُمْ نَصْرُنَا فَنُجِّيَ مَنْ نَشَاءُ وَلَا يُرَدُّ بَأْسُنَا عَنِ الْقَوْمِ الْمُجْرِمِينَ "

اقلك يعنى ايه احباط
يعنى كل الكلام دة نسبته زادت بنسبه لا تقل عن 50 %

اه كان النور بيتقطع مره ايام مبارك ومن ساعت ما اتولدنا ( لكن متوصلش انه يقطع 3 -4 مرات كل مره ساعه....وفى ناس مناطق بتبقى اكتر من كده فى المحافظات )

اه كان في زحمه مرور.....بس حاليا زاد الموضوع عن حده بشكل ملحوظ

اه كان في رشاوي ....بس حاليا كل حاجه لازم تبقى بالرشوه

اه كان فيه بلطجه ...بس دلوقتى ما شاء الله...بقى في تقدم رهيب فى عالم السرقه بالاكراه

دلوقتى صعب جدا جدا جدااااااا تدخلى ابنك مدرسه محترمه
الموضوع اختلف نهائى...دلوقتى فية cv واستمارات ولازم يعرفوا اهل الابن وهيئتهم ومستواهم وبعد دة كله ....الولد بيترفض


طبعا محبطين وطبعا الياس مالينا
واه كرهنا البلد وكرهنا العيشه واللى عيشنها
واللى يقلك بحب مصر قوليلوا مصر دى تبقي ................

الحل من وجهه نظرى السفر لاي دوله اقل مستوى فيها احترام الانسان والمواطن

بس هقول ايه............

ولا تهنوا ولا تحزنوا وانتم الاعلون ان كنتم مؤمنين

المشاركة الأصلية كتبت بواسطة zarif

كلنا عندنا مشاكل وهموم يا اخ احمد
بس انا هقولك على حاجة بسيطة وعميقة وهتخليك تحس بالرضا
...
بص لنص الكباية المليان مش النص اللى فاضى
يعنى اية الكلام دة

يعنى عايزك تتخيل ان الظروف والقدر بالنسبة لك كان غير كدة وان انت بتعيش حياة تانية

يعنى مثلا تخيل انك موظف غلبان فقير
ومرتبك ضعيف جدا
واللحمة مبتدخلش بيتك الا يوم فى الشهر
واولادك مبيلبسوش غير الهدوم اللى بتضيق على اللى اغنى منهم ويشحتوهالهم
وانك بتجرى ورا الاتوبيس كل يوم عشان تتشعبط فية وتحشر نفسك وسط الناس فى الحر والارف
وان لو مسمار نتش بنطلونك بدل ما بترمية وتشترى واحد جديد بتروح تودية لبتاع الرفة يعملهولك ب 5ج
وان مراتك 80% من لبسها بتشحتة من اختها الاغنى منها ومبتلبسش جديد غير فى الاعياد

عايزك تتخيل الحياة دى بكل تفاصيلها وانت هتلاقى نفسك فى اسوأ الحلات عايش ملك

الوصفة السحرية فى كل الكلام دة تتلخص فى كلمتين ((( الرضا والتعايش)))

باشا...كلامك علي العين والراس

بس حضرتك فاهم الغلط

انا مش ساخط...ودايما بقول الحمد لله اني بشتغل وباخد مرتب وغيري مش لاقي شغل

بس انا بتكلم كمشكله عامه....مشكله شعب مشكله مواطنين ليهم حق عند بلدهم

الحمد لله علي كل شيء....امال احنا عاملنا ثوره ليه!!!! مش عشان نغير النظام والظلم ونعيش عيشه افضل

مش عشان مبنحمدش ربنا بس في حقوق احنا لازم نخدها ومن حقنا...ده القصد

مهو مش ناخد علي دماغنا ونقول ربنا رايد كده والحمد لله بقي وخلاص

هو حضرتك لسا مصدق اننا ف دوله فقيره ملهاش دخل ولا ليها اقتصاد !!!!

هو حضرتك مقتنع ان دي مصر !! فقيره بطبعها???

مسمعتش عن النهب والسرقه وسوء الاداره اللي وصل البلد دي للمرحله دي

انا بذاكر لبنت اختي تاريخ....شوفوا مصر كانت ايه...شوف حكم محمد علي ...ارجع للتاريع هتعرف ان مصر مش فقيره